JOSUA 8 - Kok Borok (Re-edited) Bible (BSI)

Ai kamiyungno segwi sokomormani

¹ Hakhe Subraiyung Josuano hai hwnwi sa kha, “Bebak sengkrakrokno nini logi-o tlangwi Ai-o tháng di, tabo ta kiri di, khábo ta bái di, ang Aini habugrano, bini bororokno, bini kamiyungno tei bini hano nini yago yaphar kha.

² Jerikono tei aroni habugrano khlaimani haino, nwng Ai tei aroni habugrano ma khlainai, tabuk le aroni manwirokno tei mal-matarokno naui mannai, uklok tẃi khe kamiyungno gerepsana nai di.”

³ Hakhe Josua bebak bini sengkrakrok bai Ai-o thángnani tiyar wng lai kha. Josua phan gwnang borok khorok thamchisai saiwi bórokno horni bisingono rohor kha.

⁴ Tei bo bórokno hai hwnwi dagi kha, “Kamiyungni uklok bwkhak huijagwi tongwi di, aboni kwbáng hakchalo ta tháng di, hapnani tiyar khe tong di.

⁵ Ang tei ang bai tongnai bebak bororok khe kamiyung bwkhak swkang thángnai. Aini bororok chini bwkhak phai khe swkango khlaima hai bórokni bwskangni khár lainai”

⁶ bórok chini uklogo riphriknai tei chwng bórokno kamiyung bai hakchalo tubu-ui mannai. Bórok sanai khár bai kha hwnwi, swkango khlaima haino bórokno khlainai.

⁷ Hakhe norok huijagwi tongmani nongkhorwi phaiwi kamiyungo habwi di, tamni hwn ba Subraiyung nini Kaitor nini yago abono rwnai.

⁸ Kamiyungno na bai khe aro hór phnangwi rw di, Subraiyung sama haino khlai di, omo norokno dagijak kha.

⁹ Hakhe Josua bórokno rohor bai kha, hakhe bórok huijak thai-o tháng lai bai kha, Aini salthángbai phaising Bethel bai Aini kwcharo tong lai kha, tamo khe Josua khe horo bororok bai’-no bathamo tong rwk kha.

¹⁰ Josua phung aidrobo bachaui bebak sengkrakrokno thansa khe ring kha. Hakhe Israilrokni tẃiphangrokno tẃiwi Ai bwkhago tháng lai kha

¹¹ Ai-o thángwi salsi bai phaising bórok kamiyung Ai bai harungni kwcharo khe tong lai kha.

¹² O horo Josua sengkrak khorokbasai rohorwi kamiyungni salthángbai phaising Ai bai Bethel kwcharo huijak rwui ton kha.

¹³ Sengkrakrokno chobani bagwi kamiyungni salsibai tei salthángbai phaisingo khe tong rwjak bai kha. Phiya ba Josua khe, a horo harungo’-no tong rwk kha.

¹⁴ Aini habugra Josuani bororokno nuk khe, bo bai bebak bini bororok dakti khe Jordan harungo Israilrok bai choba nang lainani bagwi nongkhorwi tháng lai kha, phiya ba bo kamiyung uklok tẃi kasujak tongmano saui man ya.

¹⁵ Josua bai bebak Israilrok bórokni bwskango swprakjakmani hai khe phunugui hasing panthor bwkhak khárwi tháng lai kha.

¹⁶ Hakhe kamiyung bisingo tongnai bebak bororokno riphrik di hwnwi ringjak kha, hakhe bórok Josuano riphrik lai khe kamiyung bai hakchal wng kha.

¹⁷ Khoroksa phano Israilni uklogo tháng ya kwrwi kha, Ai eba Bethelo kebo kwrwi kha, bórok kamiyung bukcha khe klangwi riphrik lai kha.

¹⁸ Hakhe Subraiyung Josuano hai hwnwi sa kha, “Nini yago tongmani olongano Aini bwkhak rohor di, tamni hwn ba ang abono nini yago rwnai.” Josua bini yago tongma olongano Aini bwkhak rohor kha.

¹⁹ Bo yak tisaui har khe baksa huijagwi tongnairok dakti bachaui kamiyungo hap laiwi hór phnangwi rw lai kha.

²⁰ Aini bororok uklogo uphilwi nai ba kamiyungni hoku kasama nokha-o se khusaui tong si-o. Bórokni yókna tei kaisa lama kwrwi kha. Tamni hwn ba hasing panthor phaisingo khárnai Israilrok tabuk uphilwi swprak phi kha.

²¹ Josua bai bini bororok huijagwi tongnairok kamiyungo thángwi hoku kasaui tongmani nuk khe, bórok kiphilwi Aini bororokno butharna cheng lai kha.

²² Aphuru kamiyungno kebengwi kasujak kha tei bórok Israilrokni kwcharo klai kha tei ayang baksa uyang baksa wng bai kha, hakhe Israilrok khoroksa phano khárwi yók ya tẃi khe buthar bai kha.

²³ Phiya ba Aini habugrano kwthang khe Josuani thani tubu lai kha.

²⁴ Israilrok Aini bororokno hasing panthoro riphrigwi aro bórokno bebak buthar bai khe, Ai-o kiphilwi tháng laiwi aro khoroksano phano phiyók ya khe buthar lai kha.

²⁵ Hakhe bwrwi bai chwla a salo Aini bororok thwinairok bebagwi khorok chinwisai ká-o

²⁶ Aini bororok komor bai ya sak Josua bini olongano harmani tikhlai li ya.

²⁷ Subraiyung Josuano dagimani hai Israilrok kamiyungni mal-matarokno tei manwirok simi bórokni bagwi narwk lai si-o.

²⁸ Josua Aino hór bai sógwi sokomor súk kha, tabuk jora abo haino tong kho.

²⁹ Sarik jora bo Aini habugrano buphango khachiui ton kha, sal hap twtwi-o khe Josua abono buphangni kariui kamiyung duglamo khibiui rw di hwnwi dagi kha, hakhe bini saka-o holong kwbángma rúngwi rw lai kha, abo tabuk jorabo tong kho.

Ebal hachugo kerong porijakmani

³⁰ Hakhe Josua Subraiyung Israilni Kaitorni bagwi Ebal hachugo háyá tang kha.

³¹ Subraiyungni seleng Musi Israilsarokno dagimani hai’-no khlai kha, Musini kerongo omo hai swijak tongo, “Khoroksa phano sorni manwi bai holongni háyá-o rathar ya kho,” tei bórok aro Subraiyungni thani sókmung bai khakchangma yapharmung yaphar lai kha.

³² Aro Israilni bororokni bwskango’-no, Josua holongo Musi swi langmani kerongno swi kha.

³³ Bebak Israilrok buini ha-o tongnai bai sakni ha-o tongnai okrarok, tẃiphangrok, buj thumnairok swmai bokhok gana-o khaknwi khe Lebi ochairokni bwkhak naharwi bacha lai kha, khaksa borok Gerisim hachuk bwskango tei khaksa borok Ebal hachuk bwskango bórokno Subraiyungni seleng Musi borokrokno hamari rw di hwnwi dagima hai khlai kha,

³⁴ hakhe Josua kerong bijabo swijak tongma tẃi’-no hamari bai swraimung bebak kerongno poriui khna rw kha.

³⁵ Josua Israilrok luku thum laimani bwskango Musi dagiui klangmani kókrokno tháisa kar ya tẃi khe pori kha, aro bwrwirok, chwrairok tei buini ha-o tongnairokbo duljago.