JOSUA 7 - Kok Borok (Re-edited) Bible (BSI)

Akonni sumsok

¹ Tamo khe Israilni bororok Jerikoni mungsa manwino Subraiyung ta khocha di hwnmani dagimano khna li ya wngwi Karmini bwsla Akan Jabdini busuk, Jerani bora, Juda bosongni, aroni manwino na kha hakhe, Israilrokno Subraiyung belai khe jolijak kha.

² Josua Jerikoni Bethabenni gana Ai-o bororokno rohor kha, abo Bethelni salka phaising, bo bórokno hai hwnwi saui rohor kha, “Tháng di a hano naichomwi nai di,” hakhe a bororok thángwi Aino naichomwi nai lai kha.

³ Bórok Josuani thani kiphilwi hai hwnwi sa lai phai kha, “Aro bebak borok thángna nang glak, nwisai wng ya khe thamsai swk tháng kheno chúk anw, aro aswk borok tháng yaui’-no wngo, tamni hwn ba bórok belai kisicha se.”

⁴ Hakhe borok thamsai swk tháng lai kha, hakhe Aini bororokni bwskangni khárwi ma phai lai kha.

⁵ Hakhe Aini bororok bórokno khorok thamchidok buthar kha tei kamiyung duglamni simi Sebarim jora riphrigwi rohor kha, hachuk nongkhor khlai tháng phuru bórokno buthar kha. Aboni bagwi bororokni bwkha kirima habwi twi hai wng bai kha

⁶ Hakhe Josua bini rí sichigwi Subraiyungni swmai bokhokni bwskango ha-o sanja jora-o pwtapsa khe klai tong kha, bo bai baksa Israilni tẃiphangrokbo hai kheno tong lai kha tei bórokni bokhorogo hadlwi phul lai kha.

⁷ Hakhe Josua hai hwnwi sa kha, “O Subraiyung Kaitor! Nwng tamni chwngno Jordan basu rwui tubu-uiba Amorrokni yago da sokomornani nai lang tamo? Tamni chwng ba Jordan ayang naro’-no tong laijak li ya wng lang!

⁸ O Subraiyung, Israilrok bórokni arini bwskangni phikung ma uphil khe, ang tei tamo sa sinai?

⁹ Kanan tei bebak o ha-o tongnairok abono khna bai sinai, chwngno kitingwi tongnairokbo omono khnanai tei chini mungno o ha sakani hu-ui páinai, hakhe aswk nini mung kotorni bagwi nwng tamo khlainai.”

¹⁰ Subraiyung Josuano, “Bacha di, tamni nwng omo hai khe ha-o klaiwi ma tong? Hwnwi sẃng kha.

¹¹ Israil sumsok khlai kha; bórokno ang ta khlai di hwnmani swmaino dera rw kha. Bórok swraimung nangjak manwirokno na kha, khok kha tei bandi kha; sakni manwirok bai baksa abono ton kha.

¹² Abo bai’-no Israil bororok bórokni arirokni bwskango bachaui man li ya, bórokni arirokni bwskangni phikung uphilwi se ma khár si-o, tamni hwn khe bórok komorna bagwi se swraimung nang kha. Norokni bisingni a swraimung nangjakno norok sokomorwi pái ya sak, ang norok bai tei tong glak.

¹³ Bacha di! Bororokno kwthar khlai di tei sa di, khwnani bagwi norok bebak sak sakno kwthar khlai bai di, hwnwi Israilni Subraiyung Kaitor sa-o; O Israil norokni bisingo ang ta na di hwnmani swraimung nangjak manwi tongo! Norokni bisingni abono nor ya sak norokni arirokni bwskango norok bachaui man glak.”

¹⁴ Phung aisirisiri norok bebak dopha mareui bwskango phai bai di. Subraiyung ringmani hai kheno bosong kaisa kaisa khe bwskango ma phai lainai; Subraiyung ringmani bosongni núkhungrok kaisa kaisa khe ma phai lainai; tei Subraiyung ringmani núkhungni bororok khoroksa khoroksa khe bwskango ma phai lainai.

¹⁵ A manwirokno nanai borok manjak khe bo tei bini tong kwrwi hór bai sokjaknai. Tamni hwn ba bo Subraiyungni swmaino swbai kha tei Israilrokni bisingo lachimasingcha samung tang kha.

¹⁶ Hakhe Josua phung aidrobo bachaui Israilrokno dopha kaisa kaisa khe tubu kha, Judani bosongno saiwi najak gra kha.

¹⁷ Bo Judani bosongno gan-o tubu-ui phai kha, hakhe Serani bosongno saiwi najak kha; ulo Serani bosongno núkhung kaisa kaisa khe gana-o tubujak kha, Serani núkhungni khoroksa khoroksa khe tubu phuru khe Jabdi saiwi najak kha,

¹⁸ hakhe Jabdini núkhungni bororokno khoroksa khoroksa khe bwskango tubu kha, Jabdini busuk phiya Karmini bwsla, Sera núkhungni Juda bosongni Akon saiwi najak kha.

¹⁹ Hakhe Josua Akanno hai hwnwi sẃng kha, “Angsla, Israilni Subraiyung Kaitorno chẃngsacha khlai di tei bini bwskango kubui saui gosi di, tabuk ano sa di, nwng tamo khlai kha, ano ta hui di, tatal ta sa di.”

²⁰ Hakhe Akan Josuano hai hwnwi sa kha, “Kubui’-no, ang Israilni Subraiyung Kaitorni thani sumsok khlai kha, tei aboni bagwi ang omo hai omo hai khlaijak kha:

²¹ chwng sokomorwi pái laimani bisingo ang kaisa naithokma Babilonni rí tei rukphai kilo kainwi swk, kilo khaksa hilik rangchak bokong nuk khe abórokno muchungwi najak kha, abórok ani rínok bisingni ha-o phobjak rukphaino khe nwng teibo bising kugo mannai.”

²² Hakhe Josua borok rohor kha tei bórok khachigwi thángwi rínok bisingo huijak khe rukphaino bisingo phobjak khe nuk kha.

²³ Tei bórok aroni khachigwi Josuani thani tei bebak Israil bororokni thani tubu lai kha tei bórok Subraiyungni bwskango tikhlai lai kha.

²⁴ Josua tei bebak Israilrok, Jerani bwsla Akanno rukphai, rí rangchak bokong, bini bwsarokno, bwsajwksongno, bini musukrokno, korairokno, merarokno, ríni nok tei bini bebak tong kwrwi bebakno, bórok abórokno Akor harung jora tubu lai kha.

²⁵ Josua hai hwnwi sa kha, “Tamni nwng abo hai chini saka-o tubu lang?” Subraiyungbo tini nini saka-o sátokma tubunai. Hakhe bebak Israil bono holong bai khitarwi buthar lai kha tei bórok bono hor bai sók lai kha.

²⁶ Bórok bini saka-o holong kwbángma rúngwi rw lai kha, abo tabuk jorabo tong kho, hakhe Subraiyung jolimabo ham kha. Aboni bagwi abo tabuk jora Akor (eba birman) harung hwnwi sajak kho.