JOSUA 21 - Kok Borok (Re-edited) Bible (BSI)

Lebirokni kamiyung

¹ Lebi bosongni tẃiphangrok, Ochai Eliasarni thani, Nunni bwsla Josua tei Israil bosong núkhungni bokhorokrokni thani phai lai kha.

² Tei bórok ha Kananni Silo-o thángwi hai hwnwi saui kha, “Chwngnobo tongnani bagwi kamiyungrok bai chini mal matarokni bagwi bórokni harok bai baksa haphar rw di hwnwi Subraiyung Musini khúk tẃi khe dagi kha.”

³ Hakhe Subraiyung dagima haino Israilrok sak sakni bantanino’-no Lebirokno kamiyungrokno tei bórokni hapharno banta khe rw lai kha.

⁴ Swkang pat karmani Kohat núkhungni mung kasa kha. Ochai Aron bosongni núkhungrok, bórok Lebi bosongni tei kamiyung khung chitham Juda, Simion tei Benjamin bosongrok aro pat karwi man lai kha.

⁵ Phiya bebak Kohat bosongni kamiyung khungchi Ephraim, Dan tei khaksa Manase bosongrok aroni patkar rwi ha banta man kha.

⁶ Gerson bosong kamiyung khung chitham pat karwi Isakar, Aser, Naptali, Basanni tei khaksa bosongni, Manase bosongrokni aroni man kha.

⁷ Merari bosong núkhung mareui kamiyung chinwi Ruben Gad tei Jebulun bosongrokni aroni man kha.

⁸ Subraiyung Musini khúk tẃi dagimani hai Israilni bororok pat karwi Lebirokno a kamiyungrok bai hapharno banta khe rw lai kha.

⁹ Hakhe bórok o kamiyungrokno’-no Juda bai Simion bosongni khe khlaiwi rw lai kha, omorok mung bai chongwi rwjak kha,

¹⁰ Aron bosong Lebi bosongni Kohat núkhungrokni’-no kaisa, tamni hwn khe bórok Lebini’-no bosongrok; tamni hwn khe bórokni mungno pat ka rwui swkang kasa gra-o.

¹¹ Bórok bórokno Kiriat-arbano rw kha, (Arba khe Anakni bupha) tabuk abo Hebron hwnjago, Judiani hathái kami tei abono kitingjak hapharrokno rwjak kha.

¹² Tamo khe kamiyungni hapharrok tei kami kotorrokno Jephuneni bwsla Kalebni bagwi rwui rwjak kha.

¹³ Ochai Aron bosongno kamiyung Hebron (kaisa khárwi tongjaknai kamiyung) bai baksa hapharrok tei Libna,

¹⁴ Jatir, Estemoa,

¹⁵ Holon, Debir,

¹⁶ Ain, Juta, Bet Semes tei hapharrok, kamikotor khung chukurok Juda bai Simion bosongrokni.

¹⁷ Hakhe Benjamin bosongni khe Gibeon, abo bai Geba,

¹⁸ Anathot, Almon tei hapharrok bai baksa khung brwi kamiyungrok.

¹⁹ Bebagwi kamiyung khung chitham tei ha hapharrokno Aron bosongni ochairokno rwjak kha.

²⁰ Tong rwkma khe Lebi bosongni Kohat núkhungrokno Ephraimni kamiyungrokno rwjak kha.

²¹ Bórok hatháini kami Sekemno kubun harok bai baksa rw kha, (borok butharnairok khárnani bagwi) tei harok bai baksa Gejerno rw kha,

²² tei harok bai baksa Kibjaimno, Bet-horonno tei harok bai baksa rw kha: kamiyung khung brwi;

²³ Danni bosongni khe tei harok bai baksa Eltekeno tei Gibethonno tei harok bai baksa rwjak kha,

²⁴ tei harok bai baksa Aijalonno tei Gat-rimonno tei harok bai baksa rwjak kha: kamiyung khung brwi;

²⁵ hakhe Manaseni khaksa bosongni aroni khe tei harok bai baksa Tanakno tei Gat-rimon bai baksa tei harokno kamiyung khungnwi.

²⁶ Kohat bosongni núkhungrokni bagwi khe tei harok bai baksa kamiyung khungchi man kha.

²⁷ Tei Lebi bosongni Gersonsarokno rwjak kha: Manaseni khaksa bosongrokni aroni: Basan hani Golan (kaisa khárjaknai kamiyung), Bistera bai baksa tei harokno rwjak kha kamiyung khungnwi;

²⁸ Isakar bosongrokni aroni khe, Kision, Daberat,

²⁹ Jarmut tei Enganimni bórokni tei harok bai baksa kamiyung khung brwi;

³⁰ Aser bosongni khe: Misal kamiyung tei aroni sularok Abdon,

³¹ Helkat bai Rehob, bórokni harok tei sula bai baksa khe kamiyung khung brwi man kha;

³² Naptali bosongni aroni khe Galilini Kades (borok butharnairokni khárna bagwi) Hamot-dor tei Kartan tei bini harok bai baksa kamiyung khungtham.

³³ Gerson bosongni kwbángma núkhungrok bebagwi kamiyung khung chitham tei abórok bai baksa hapharrok man kha.

³⁴ Merarini bosongrok khe (Lebini tong rwkma teirok) Jebulunni, Jokniamni, Kartani aroni rwjak kha,

³⁵ Dimnani bai Nahalalni tei harok bai baksa: kamiyung khung brwi;

³⁶ Ruben bosongni khe Bejer, Jahas tei bórokni harok bai baksa,

³⁷ Kedemot bai tei harok tei Mephat bai tei harok bai baksa: Kamiyung khung brwi;

³⁸ Gad bosongni aroni khe tei harok bai baksa Ramot Giliad: Ramot (khárjaknai kamiyung khungsa), Mahanaim bai tei bini harokno rwjak kha,

³⁹ Hesbon tei Jajerni tei bórokni hapharrok man kha: Bebagwi kamiyung khung brwi.

⁴⁰ Hakhe Merari bosongni núkhung mareuino rwjak kha, Lebini bosongrok tei núkhungrokbo pat karwi kamiyung khung chinwi man kha.

⁴¹ Israil bororok hani bebagwi kamiyung khung brwichichar bai baksa tei hapharrokno Lebirokno rw kha.

⁴² Bebak o kamiyungrokno kitingwi’-no haphar tongo; omorok’-no o kamiyungrok.

Israilrok ha manẃi achuk laimani

⁴³ Hakhe Subraiyung Israilrokno bórokni chuchusongno rwnai hwnwi swmai tangmani hai kheno bebak hano rw bai kha, bórok abono na bai kha tei aro tongthai kha lai kha.

⁴⁴ Subraiyung bórokni chuchusongni thani-o swmai tangma haino bórokno bebakno rw kha. Bórokni arirokni bere khoroksa phano bórokni bwskango bachaui man li ya. Subraiyung bórokni bebak arirokno bórokni yago yaphar kha.

⁴⁵ Subraiyung aswk kwbángma Israilrokni bagwi swmai tangmani tháisa phano ha-o klai li ya. Bebakno nang bai kha.