JOSUA 2 - Kok Borok (Re-edited) Bible (BSI)

Josua Jeriko-o naichomnai rohormani

¹ Nunni bwsla Josua, Sitimni khoroknwi naichomnairokno hai hwnwi saui tepsa khe rohor kha, “Tháng di, o ha bai Jeriko kami kotorno kaham khe naiwi di,” hakhe bórok thángwi Rahab hwnwi baliknaijwkni nogo tongwi lai kha.

² Jerikoni habugrano hai hwnwi sajak kha, “Nai di, Israilni borok kisa chini hano naichomnani bagwi, oro tini horo phai kha.

³ Hakhe Jerikoni habugra Rahabno nini thani phainai bororokno tikhlai tubu di, bórok o hano naichomnani se phai-o, hwnwi sa hor kha.”

⁴ Tamo khe a bwrwi borok khoroknwirokno tlangwi huiwi tonwi hai hwnwi sa kha, “Kubui’-no, kisa swk bororok ani thani phaima le phai kha, hai phano bórok buroni phai ang saui man ya.

⁵ Bórok sal tongsani, kamiyung duglam sonani swkang’-no nongkhorwi tháng bai kha, biyango a bororok tháng bai kha ang saui man ya, dakti bórokno rwkthar di, norok romwi manna phano tong kho.”

⁶ (Tamo khe Rahab a khoroknwirokno núkhúng saka-o tubu-ui bo narwkmani khulphang becheng bisingo hui ton kha.)

⁷ Hakhe, bórok Jordanni lama tẃi khe lama bupra jora rutuk lai kha, bórok riphrik lai tháng khe kamiyungni duglambo sojak kha.

⁸ Naichomnairok thunani swkang a bwrwi núkhúng saka-o kasaui bórokni thani phaiwi

⁹ hai hwnwi sa kha, “Ang saui mano Subraiyung norokno o hano rw kha tei bebakno ma kiri bai kha, bebak o ha-o tongnai bororok norokno belai khe kiri bai kha.”

¹⁰ Tamni hwn khe, norok ha Ijipni nongkhorwi phai phuru bahai khe norokni bwskango Subraiyung Twijlang kwchakno ran rw kha tei norok bahai khe Jordan narni Amorni khoroknwi habugra Sihon bai Ogno mechenwi sokomor súk kha, abono chwng khna kha.

¹¹ Abórokno khna kheno chwng belai kiri kha, khoroksa phano kiri ya kwrwi kha, tamo khe Subraiyung norokni Kaitor wng kha chukha kuchukni tei o hanibo Kaitor.

¹² Hakhe tabuk, Subraiyungni mung bai ano kók rw di, ang norokno khairok khaba ani núkhungni bororoknobo khairok ja di tei ano kaisa mari phunugui rw di.

¹³ Norok ani apha, ani ama ani takhuksongno ani bukhuksongno tei bebak chini langmano mwthang ja di.

¹⁴ Hakhe bórok a bwrwino hai hwnwi sa kha, “Nini bagwi chini langma rwnai, norok chwng khlaimani kókrokno sa yaui tong khe, Subraiyung o hano yapha-o yaphar phuru chwngbo nono kók narwgwi kaham khlainai.”

¹⁵ Hakhe Rahab bórokno buduk bai khe bini nokni tailam tẃi khe nongkhorwi rohor kha, tamni hwn ba bini nok wng kha kamiyungni chokdeualo thepajak.

¹⁶ Hakhe bo hai hwnwi sa kha, “norokno riphriknairok bai malai ya tẃi khe hathái-o thángwi aro saltham jora huijagwi bórok kiphil ya sak tongwi lai di, ulo norokni lama-o thángwi man anw.”

¹⁷ Hakhe bórok a bwrwino hai hwnwi sa kha, “Nwng chwngno swmai tang rwmano chwng narwknai.

¹⁸ Tamo khe nai di, chwng o ha-o hap phai phuru nwng chwngno tikhlai rohormani a tailamo khutwng kwchak khaui ton di tei nini nok bisingo nini nwma nwpha, nini takhuksong tei bebak nini nwphani sandairokno tong kwrwi tubu-ui ton di,

¹⁹ khoroksa swk nini nok bisingni phataro nongkhorwi tháng khe, bini thẃi klaimani bini bokhorok saka’-ono klainai tei chwngno ber thai kwrwi; phiya ba nini nok bisingo tongwi khoroksa swkno yak tisajak khe aboni cha ya chini saka’-ono klainai.

²⁰ Tamo khe chini o kókno buino sa khe le, chwngno swmai tang rwmani abo nang ya wngnai.”

²¹ A bwrwi, “Norok sama hai’-no wng si thung,” hwnwi sa kha. Hakhe bórok thángwi pái lai kha, a bwrwi tailamo rí kwchak khaui ton kha.

²² Bórok hathái-o thángwi naituknairok kiphil ya sak saltham jora aro huijagwi tong lai kha; bórokno naituknairok bebak lamarogo naitugwi man súk li ya.

²³ Hakhe borok khoroknwi naichomnai hatháini nongkhorwi phaiwi twima bárwi Nunni bwsla Josuani thani kiphilwi phai kha tei bórok aswk wngmarokno saui khna rw kha.

²⁴ Hakhe bórok Josuano hai hwnwi sa kha, “Kubui’-no Subraiyung bebak hano chini yago yaphar kha tei bebak aroni bororok chwngno kirijak bai kha.”