JOSUA 18 - Kok Borok (Re-edited) Bible (BSI)

Bára tong rwkjak hano banta khlaimani

¹ Bórok bebak ha segwi nabaimani ulo Israilni bororok Subraiyung bai malaijaknai rínok tang laina bagwi Silo-o kuthum lai kha.

² Israilrokni bisingo bosong songsnirokni bagwi ha banta rwjak ya kho.

³ Hakhe Josua Israilni bororokno hai hwnwi sa kha, “Subraiyung Kaitor norokni chuchusongno rwmani ha-o thángwi achuk yaui tei bwswk lerwi naising lai tong sinai?

⁴ Bosong thwgwi khoroktham saiwi chong di, bórokni bosong thwgwi ang a hano bórokno bagwi rwui manna tẃi khe a hano saka-kháma kaham khe naiwi aboni kókrokno bebakno ano swiwi rw phai thung.

⁵ Bórok hano khaksni khe banta ma khlainai, Juda khe salgrabai bwkhak bini amchoino ma tongnai tei Josep khe salsibai bwkhak bini amchoi-o ma tongnai.

⁶ Bebak hano khaksni khe khagwi ani thani ma tubunai; hakhe ang norokni bagwi Subraiyung chini Kaitorni bwskango pat karwi nainai.

⁷ Lebirok khe norokni bisingo mungsa ha banta man glak, tamni hwn ba Subraiyungni ochai samung se bórokni banta; Subraiyungni seleng Musi rwmani tẃi’-no Gad, Ruben tei Manaseni khaksa bosongrok Jordanni salka bwkhak ha manẃi se pái bai kha.”

⁸ Hakhe bororok hano phiklai-phiksa khlainani tháng lai khe Josua bórokno hai hwnwi phrwngwi rohor kha, “Kuchuk hacher bebak ha-o tháng laiwi bebak phiklai-phiksa khlaiwi ani thani kiphilwi phai lai di, ang Subraiyungni bwskango norokni bagwi Silo-o pat ka rwui nai anw.”

⁹ Hakhe bórok kuchuk hache bebak ha-o tháng laiwi khaksni khagwi aboni kami kotorrokno kaisa bijabo swi laiwi, Josuani thani Silo-o kiphilwi phai lai kha.

¹⁰ Hakhe Josua Subraiyungni bwskango bórokni bagwi pat karwi naiwi, Israilni bororok bisingo ha banta khe rwui rw kha.

Benjaminno rwmani amchoi

¹¹ Pat karmani Benjamin bosongni núkhungrokni bagwi swkang wng kha, bórokni ha Juda bai Josep bosongni kwcharo klai kha.

¹² Salsibai bwkhak Jordan tẃi bórokni ha ari cheng kha, aroni khe Jerikoni salsibai bwkhak hakchen tẃi thángwi, saltháng bwkhak hathái kami tẃi khe Bethaben hasing panthoro thak phai-o.

¹³ Aroni khe salgrabai bwkhak Lujno (abo Bethel) nahorwi Atarot-Adaro nongkhorwi tháng kha, hakhe Bet-horonni salgrabai bwkhak halap-harung jora.

¹⁴ Aroni tei babaisa bwkhak naharwi hachukni salthángbaini khe salgrabai bwkhak uphilwi, Kiriat Balo tháng kha (abo khe Kiriatjearimni) Juda bosongni kamiyung klai-o. Abo salthángbaini ha ari.

¹⁵ Salgrabaini ha ari Kiriatjearimni chengwi Nephtoa twimuk chersajak jora nongkhorwi

¹⁶ Hinom harung naikhlaiwi hachuk yaphang abo Rephaim harungni salsibai bwkhak páithak klai-o, aroni Hinom harung nongkhorwi, salgrabai bwkhak Jebussarokni haruak Enrogel jora.

¹⁷ Aroni salsibai bwkhak uphilwi Ensemeso thángwi aroni Gelilot, aboni tei babaisa bwkhak khe Adumimni laima, aroni Rubenni bwsa Bohan holongo nongkhorwi

¹⁸ salsibai bwkhak Jordan harung naikhlaimano laiwi, harungo nongkhorwi

¹⁹ Bet Hoglani salsibai bwkhak tẃi thángwi twijlang kwthwini salsibaini tẃi hapmani khe Jordanni salgrabai-o thak kha. Abono salgrabaini ha ari klai-o.

²⁰ Jordan khe salka bwkhakni ha ari, abono Benjamin bosongni núkhung thwgwi ha manmani.

²¹ Benjamin bosongni núkhungrokni kamiyungrok wng kha: Jeriko, Bet Hogla, Emek-kejij,

²² Bet Araba, Semaraim, Bethel,

²³ Abim, Para, Ophra,

²⁴ Khepharamoni, Ophni tei Geba, kamiyung khungchinwi teibo kamirok.

²⁵ Gibeon, Rama, Birot

²⁶ Mijpa, Kephira, Moja

²⁷ Rekem, Irpil, Tarala

²⁸ Jela, Haelep, Jebus (abo khe Jerusalem), Gibea tei Kiriatjearim kamiyung khung chibrwi tei kamirok, omono Benjamin bosongni núkhungrok manmani ha.