JOSUA 17 - Kok Borok (Re-edited) Bible (BSI)

Saltháng Manase

¹ Aboni ulo banta khe rwjakma ha khe, Manaseni baksa bosongno rwjak kha, bórok khe Josepni bwsla okrani bwsarok Jordanni salkabai-o khe Giliad tei Basanno swkango’-no rwui páijak tamni hwn khe Makirni núkhung khe chobani sengkrak se. Makir khe Manaseni bwsla okra tei Giliadni bupha.

² Tei salthángbaini hano khe Manaseni tong rwkma bosongno rwjak kha: Abiejer, Helek, Asriel, Sekem, Hepher tei Semidasong, Josepni bwsla Manaseni bosong tei bórokno núkhungni bokhorokrok.

³ Manaseni bwsla Makir, bini bwsla Giliad, bini bwsla Hepher, bini bwsla Selophehadni chwla bwsarok kwrwi, bwrwi máng se, bwsajwksongni bumungrok: Mala, Noa, Hogla, Milka tei Tirja.

⁴ Bórok ochai Eliasar, Nunni bwsla Josua tei tẃiphangrokni thani-o phaiwi hai hwnwi sa lai kha, “Chwngnobo chini takhukrok bai baksa ha rw di hwnwi Subraiyung Musino dagi lang kha,” hakhe bo Subraiyung dagimani haino bórokni takhukrok bai baksa ha rw kha.

⁵ Aboni bagwino Manase Giliad tei Basanno karwi tei banta kaichi Jordanni salka bwkhak man kha.

⁶ Tamni hwn khe Manase bosongni bwrwi bwsarok chwla bwsarok bai baksa ha banta man kha. Giliadno khe Manaseni tei chwlani bosongrokno rwjak kha.

⁷ Manaseni amchoi Aserni Mikmethat jora, abo Sekemni salka bwkhago. Aboni ha ari khe salgrabai phaising thángwi En-tapuani bororok tongmani jora.

⁸ Tabuk ha Tapua Manaseni wng kha, phiya ba Tapua Manaseni ha ari khe Ephraim bosongni wng kha.

⁹ Tei aboni ari Kanan twisa bwkhak tháng kha, twisani salgrabai bwkhak. O Ephraimni kamiyungrok Manase kamiyungrokni bisingo klai-o. Manaseni ha ari khe twisani salgrabai-o; tei abo twijlango thagwi-o.

¹⁰ Salsibai-o khe abo Ephraimni, salgrabai-o khe Manaseni tei aboni ari khe twijlang. Manaseni amchoi khe salgrabai-o Aser jora sógwi-o tei salka-o khe Isakarni jora.

¹¹ Tei Manase Isakar bai Asero amchoi-o Betsean bai bini kamiyungrokno tei Ibliam tei bini kamiyungrokno man kha teibo Dorrok tongmani bini kamiyungrok, En-dor bai bini kamiyungrok, Tanak bai bini kamiyungrok, Megido tei bini kamiyungrok, abono karwibo tei kwtham ha man kha.

¹² Hai phano Manaseni bwsarok a kamiyungo tong bainai bororokno rwkhlai rohorwi man li ya. Tamo khe Kananrok khe a ha-o tongnani bwkha chong lai kha.

¹³ Israilrok phan gwnang wngwi bacha khe, Kananrokno bebak rwkhlai rohor yaui bórokno romwi samung tang rw kha.

Ephraim bai Manase teibo ha sanmani

¹⁴ Josepni bororok Josuano hai hwnwi sa kha, “Tamni bagwi chwngno ba aswk kisa ha banta rw lang? Chwngbo borok kwbángma tei Subraiyung chwngno kwbángma hamari rw kha.”

¹⁵ Josua hai hwnwi sa kha, “Tumungno norok aswkno borok báng lai-o hwn khe, Ephraim hathái kami norokni bagwi khochor kuk khe hakhe bolongo thángwi Peressasong bai Rephaimrokni hano hogwi nai lai di.”

¹⁶ Josepni bororok hai hwnwi sa phi kha, “Hathái kami chini bagwi kasuk ya tei hapharo tongnai Kananrokni sorni korai malkhungrok tongo tei o Betseano tei Jejril harungo tongnairoknibo sorni korai malkhungrok tong bai-o.”

¹⁷ Phiya Josua Josepni núkhung Ephraim bai Manaseno hai hwnwi sa kha, “Norok kubui’-no borok kwbáng tei phanbo gwnang. Norok banta kaisa simino man glak.

¹⁸ Hathái kami norokni wngnai, abo bolong wng phano saiwi yaphang buchuk na bai di; norok Kananrokno, bórokni sorni korai malkhungrok tong phano, phan gwnang wng phano rwkhlai rohorwi mannai.”