JOSUA 13 - Kok Borok (Re-edited) Bible (BSI)

Teibo ha najaknai tong kho

¹ Tabuk Josua belai khe chakra wng kha tei umor kwbángma wng kha, Subraiyung bono hai hwnwi sa kha, “Nwng belai chakra wng kha, hai phano kwbángma hano najaknai tong kho.

² Omorokno tong rwkmani harok: Bebak Philistiasa bai Gesursarokni amchoini harok,

³ (Sihorni simi abo ha Ijipni bwskango tei salgrabai phaising Ekronni ari jora, abórok Kananrokni hwnjago: Philistiasarokni khorokba habugra Gaja, Asdod, Askelon, Gat tei Ekron) tei Abitsarokbo,

⁴ salgrabaini bebak Kananrokni ha bai Meara (abo Sidonsarokni klai-o) ha Aphekni simi ha Amorni ari jora;

⁵ Gebalsarokni ha, salka phaisingni bebak Lebanon, salgrabai phaising Harmon hachukni Balgadni simi Lebohamato hapmani jora.

⁶ Lebanon hachuk bai Misrephotmaim kwcharni hathái kami-o tong bainai Sidonsarokni bebak ha. Ang sak baithang’-no bórokno Israilrokni bwskangni rwkhlai rohornai. Ang nono khlai di hwnwi dagimani haino nwng Israilrokni bisingo se o hano banta ma khlainai.

⁷ Tabuk hakhe o hano bórokni sak-sakni ha wng sukna bagwi, dopha kaichukurokni bisingo tei khaksa Manase bosongno banta khlai rw di.”

Jordanni salka phaising amchoino bakmani

⁸ Subraiyungni seleng Musi rwmani bai swkang’-no Ruben tei Gad tei Manaseni khaksa bosongrok ha man bai kha; omo Jordan twimani salka phaising klai-o.

⁹ Bórokni amchoi Aroer jora pholokjak (Arnonni harung páithak jora) tei harung kwcharni kamiyung, Medebani simi Dibon jora khopjago.

¹⁰ Abo Ammonsarokni ha ari jora tei abo Amorsarokni habugra Sihonni yapha-o bo Hesbono tongwi habugra cháui tongo. Kamiyungrok abo Ammonrokni ha ari jora pholokjak kha.

¹¹ Abo Giliad, Gesurni amchoi bai Makani ha, bebak Harmon hachuk tei bebak Basanni simi Saleka jora duljago.

¹² Astarot bai Edrei-o habugra chánai ha Basanni Ogni harok, (bo simi’-no Rephaimni bisingo yógwi tong rwknai); Bórokno Musi mechenwi rwkhlai rohor bai kha.

¹³ Hai phano Israilni bororok Gesursarok bai Makatrokno rwkhlai li ya, tamo khe Gesursarok bai Makatrok khe Israilrok bai’-no tini jora tong bai kho.

¹⁴ Musi Lebini bosongno simi ha banta rw li ya; bo bórokno sama hai’-no Israilni Subraiyung Kaitorni thani sógwi yapharmarok khe bórokni banta wngnai.

Rubenno bakjakmani amchoi

¹⁵ Musi núkhung thwgwi’-no Ruben bosongno ha banta bagwi rw kha.

¹⁶ Bórokni amchoi wng kha Aroerni simi abo Arnon twima rukung tei harung kwcharni kamiyung tei bebak haphar Medeba.

¹⁷ Abo Hesbon tei bebak hapharni kamiyungrok, Dibon, Bemot Bal tei Bet Balmeon,

¹⁸ Jahas, Kedemot tei Mephat,

¹⁹ Kiriathaim, Sibma, Seret-Sahar tei harung sakani.

²⁰ Betpeor, hachuk Pisgani ha tei Bet-Jesimot.

²¹ Abo bebak hapharni kamiyungrok khopjago tei Hesbono habugra chánai, Amorni habugra Sihonni bebak habo klai-o. Musi abo hai Midianni tẃiphangrokno mechen kha; abo wng kha a ha-o tong bainai Ibi, Rekem, Jur, Hur tei Reba.

²² Israilni bororok butharmani bisingo Beorni bwsla Balam buino kók mwtai sanaibo duljago.

²³ Jordan twima wng kha Rubenrokni bagwi ha páithak ari bojak. Omono Rubenni bosongni núkhung thwgwi kamiyungrok bai kami kotor rwjakmani.

Gadno ha banta rwjakmani amchoi

²⁴ Musi Gadni bosongnobo núkhung thwgwi’-no ha banta rw kha.

²⁵ Bórokni amchoirok wng kha, Jajer, Giliadni bebak kamiyungrok, Aroer jora Ammonsarokni khaksa ha, abo Rabbani salka phaisingo klai-o.

²⁶ Bórokni ha Hesbonni simi Rama Mijpa tei Betonim abo Debir amchoi jora

²⁷ Bet Haram harung, Bet-Nimra, Sukot, Saphon tei Hesbonni habugra Sihon bebak ha tongmarok, Jordan tei aboni rukungrok, hakchal ha kháma Chineret twijlang jora tei salkabai Jordan láijak.

²⁸ Omorokno Gadni bosongno núkhung thwgwi kamiyungrok tei kami kotorrok banta rwjakmani.

Salka Manaseno rwjakmani amchoi

²⁹ Musi Manaseni khaksa bosongno bórokni núkhung thwgwino ha banta rw kha.

³⁰ Bórokni ha Mahanaim tei bebak Basan Og habugrani ha jora tei Basan bisingo tongnai Jairni bebak dokchi kamiyungrok jora pholokjak kha.

³¹ Tei khaksa Giliad, Astarot, Edrei, Basan bisingni Og kamiyung, omorok bebak Manaseni bwsa Makirni bosongo núkhung thwgwi rwjak kha.

³² Abo hai kheno Musibo Moabo tong phuru Jordan ayang nar Jerikoni salka phaising banta khlai rw kha.

³³ Phiya ba Musi Lebini bosongno mungsa hano rw li ya, bo bórokno sa kha, Subraiyung, Israilni Kaitorni thani yapharjakmani se bórokni banta.