JOSUA 10 - Kok Borok (Re-edited) Bible (BSI)

Amorrokno mechenmani

¹ Josua Ai kamiyungno mechenwi katswi sokomorwi bo abono Jeriko tei aroni habugrano khlai tẃi’-no aroni habugranobo khlaimani kókrokno Adonisedek khna kha, phiya Gibeono tongnairok Israilsarok bai kók kha laiwi bórok bai kwthaui tong laimani kókroknobo khna khe,

² Jerusalemni bororok belai khe kirijak kha, tamni hwn ba Gibeonrok wng kha belai kwbáng, kamiyung kotorma, abo Aini sláibo tor kugo tei aroni bororokbo haino phan gwnang máng se.

³ Hakhe Jerusalemni habugra Adonisedek Hebronni habugra Hohamno, Jarmutni habugra Piramno, Lakhisni habugra Japhiano tei Eglonni habugra Debirno hai hwnwi sa rw hor kha,

⁴ “Phai di Gibeon bai choba nang lainani ano chuba phai di, tamni hwn khe, aroni bororok Josua tei Israilrok bai kwtha lai kha”

⁵ Hakhe Amorni khorokba habugrarok Jerusalem, Hebron, Jarmut, Lakhis tei Eglon bebak sengkrakrok thansa wng laiwi Gibeono gerep laiwi choprok lai kha.

⁶ Gibeonni bororok Gilgalni bathamo Josuani thani hai hwnwi sa hor kha, “Chwngno ta yakar di dakti phaiwi chwngno chuba phai di, mwthang phai di, bebak Amorni habugrarok thansa wng laiwi chwngno choprok phai bai kha.”

⁷ Hakhe Josua tei bebak bini sengkrakrok bai phan gwnangrok khe Gilgalni tháng lai kha,

⁸ Hakhe Subraiyung Josuano, “Bórokno ta kiri di, nini yago bórokno yaphar kha, khoroksa phano nini bwskango bachaui man glak,” hwnwi sa kha.

⁹ Hakhe Josua Gilgalni hopung phai laiwi Amorrokno achomsa khe choprok lai kha.

¹⁰ Subraiyung bórokno Israilrokni bwskango sikiri kha. Israilrok bórokno Gibeono buthar bai kha, Bet-horon bwkhak béngkhlaiwi rohor bai kha tei Ajeka bai Makeda jora tanthar-súthar khlai bai kha.

¹¹ Bórok Israilrokni bwskangni khárwi tháng phuru Ajeka-o Subraiyung bórokni saka-o holongni uatwi klai rw kha. Israilrokni yago thwima slái, holong bai se thwi kuk si-o.

¹² Subraiyung Israilrokno Amorrokni saka-o kwplai khlaimani salo Josua Subraiyungno hai hwnwi sa kha, bo bebak Israilni bwskango khe hai hwnwi sa kha, “O Sal Gibeon saka-o bathagwi tong di; tal, Aijalon harungo bathagwi tong di.”

¹³ Aswk khe sal thir khe bathagwi tong kha tei talbo dopharok bórokni arirokno mechen bai ya sak bathagwi tong kha. Omo Jasar bijabo swijak kwrwi diba? Sal thóng-thóng khe nokhani kwcharo bathagwi tong kha tei sapung abo habwi tháng li ya.

¹⁴ Abo hai sal uáisa bo wng ya kho tei ulo bo abo hai wng glak, abo Subraiyung borokni kók khnamani se, Subraiyung Israilni bwkhak wngwi choba nang lai kha.

¹⁵ Aboni ulo Josua tei bebak bini sengkrakrok Gilgalni bathamo kiphilwi tháng lai kha.

Josua khorokba Amorsarokni habugrarokno choprokma

¹⁶ Phiya ba Amorni o habugra khorokbarok yógwi tháng baiwi Makedani holong beserni hakhoro huijagwi tong lai kha.

¹⁷ Hakhe Josuano sa phaijak kha, habugra khorokba Makedani holong besero huijakma manjak kha.

¹⁸ Hakhe Josua hai hwnwi sa kha, “Holong kotorma bai khe a hakhorni haplam kholobwi rw di tei aro mwrwknairoknobo ton di.

¹⁹ Norok khe aro ta tong di, arirokno se riphrik di, bórokno choprok di, bórokni kamiyungo ta rohor di. Subraiyung nini Kaitor bórokno nini yago yaphar kha.”

²⁰ Josua bai Israilni bororok bórokno buthar lai kha. Baksa khe kamiyungni chokdeualo yók bai kha, bórok khe butharjak bai li ya.

²¹ Hakhe bebak Josuani bororok yógwi Makedani bathamo sók phai bai kha, a hani borok khoroksa phano Israilrokno tháisabo hamya sa rak li ya.

²² Hakhe Josua, “Holong hakhor phiyogwi a khorokba habugrano ani thani tubu di,” hwnwi sa kha.

²³ Hakhe hakhor phiyogwi Jerusalemni, Hebronni, Jarmutni, Lakhisni tei Eglonni habugrarokno tikhlaiwi

²⁴ tei Josuani thani tubujak khe, Josua Israilni bebak bororokno ringwi bo bai baksa choba-o thángnai tẃiphangrokno gana-o phaiwi bórokni yakungno a habugrarokni gwdna-o bera phai di, hwnwi dagi kha, hakhe bórok abo hai’-no khlai kha.

²⁵ Josua bórokno hai hwnwi sa kha, “Tabo ta kiri di, khábo ta bái di, khá rak di, phan tisa di, abo haino Subraiyung norokno bebak kebengnairokno khlainai.”

²⁶ Aboni ulo Josua habugrarokno butharwi buphang phangba-o bórokno khachiui rw kha, abo sarik jora khachijagwi’-no tong kha.

²⁷ Phiya sal hap twtwi-o khe Josua abórokno buphangrokni kariui bórok huijagwi tongmani a holong gurungo holongdap kotorma bai kholobwi rw di hwnwi dagima hai khe khlai kha; abo tabuk jorabo tong kho.

Josua teibo Amorni amchoino gerepsaui choprokmani

²⁸ A salo Josua Makedano sek kha, aroni habugrano rom kha, bo jai kheno kamiyungni bororokno buthar bai kha, khoroksano phano kwthang narwk li ya, Jerikoni habugrano khlaima haino Makedani habugranobo khlai kha.

²⁹ Aboni ulo Josua bai bebak Israilkrok Makedano lai thángwi Libna-o tháng laiwi, bórok bai choba nang lai kha.

³⁰ Subraiyung abono bo tei aroni habugrano Israilrokni yago yaphar kha. Bo khoroksano phano kwthang narwk li ya, bebakno buthar bai kha, Jerikono khlaima haino aroni habugrarokno khlai kha.

³¹ Aboni ulo Josua bai bini sengkrakrok Libnani Lakhiso tháng lai khe, abono kitingwi choprok lai kha.

³² Subraiyung salnwini salo Lakhisno Israilrokni yago yaphar kha, bebak aro tongnairokno buthar bai kha. Libnano khlaima haino khlai kha,

³³ Gejerni habugra Horam Lakhisno chubana phai khe Josua bo bono tei bini sengkrakrokno swpragwi mechenwi bebak buthar bai kha, khoroksanobo kwthang narwk li ya.

³⁴ Ulo Josua bebak Israil tei bini sengkrakrok Lakhisni Eglono tháng laiwi abono gerepsaui choprok lai kha.

³⁵ A salo’-no abono bórok segwi na lai kha, Lakhisno khlaima hai bórok bebakno buthar lai kha.

³⁶ Aboni ulo Josua tei bini sengkrakrok Eglonni Hebrono tháng lai kha tei tei choprok lai kha.

³⁷ Bo abono segwi na kha, habugrano tei kamiyungni bebak bororokno buthar lai kha, Eglono khlaima hai khlai kha, khoroksano phano kwthang narwk li ya.

³⁸ Hakhe Josua bai bini sengkrakrok Debir bwkhak uphil kha tei choprok kha,

³⁹ aroni habugrarokno tei kami kotorrokno segwi na bai kha, khoroksano phano kwthang narwk li ya. Hebron bai Libnani habugrarokno khlaima hai Josua Debirno tei aroni habugranobo khlai kha.

⁴⁰ Hakhe Josua bebak hano mechen kha tei hathái kamirokno phiya ha Negeb, hacher harok, halap harok tei bórokni habugrarokno mechen kha; bo khoroksano phano kar li ya bebak langma gwnangrokno Subraiyung Israilni Kaitor samani hai buthar bai kha.

⁴¹ Hakhe Josua Kades Barniani simi Gaja jora bebak mechen bai kha tei bebak ha Gosen tei abo bai Gibeono mechen kha.

⁴² Josua bebak habugrarokno tei bórokni harokno uáisa bai’-no na bai kha, tamni hwn ba Subraiyung Israilni Kaitor bórokni bwkhak wngwi choba nang lai-o.

⁴³ Hakhe Josua tei bebak sengkrakrok Gilgal bórokni bathamo kiphil lai kha.