JONA 3 - Kok Borok (Re-edited) Bible (BSI)

Jona Subraiyungni kók khnamani

¹ Subraiyung haino hai Jonano hai hwnwi sa phi kha,

² “Bacha di kamiyung kotor Ninobi o thángwi ang nono samani kókno sakhlai di.”

³ Hakhe Jona aroni bachaui Subraiyung sama tẃi Ninobi-o tháng kha. Kamiyung Ninobi khe belai kotor, abono himwi láinani saltham nango.

⁴ Jona sapung kamiyung kwchar tẃi himwi tháng kha. Tei bo chirikhógwi hai hwnwi sa kha, “Nokha salbrwi chini ulo Ninobi sokomorjaknai!”

⁵ Hakhe Ninobini bororok Kaitorni kókno poito chá bai kha; bórok aphuru khe jotono chá yaui ok bukcha ma tong lai kha tei okra-chwrai bebakno rí sitra kosom kan kha.

⁶ Ninobini habugra a kók khna khe bo bini achukthayungni bachaui bini kanmung-chummung khuk kha tei, rí kichik kanwi thapla phul kha.

⁷ Hakhe bo Ninobini borokrokni thani omo hai khe kók sakhlai kha, “Omo habugra tei bini tẃiphangrokni sa khlaimung: Khoroksa swk borok phano eba mal-matarok phano búkhúgo mungsa ma rw glak, bórok tabo ta chá thung tabo ta nung thung,

⁸ tamo khe bororok tei mal-matarok bo rí kichik ma kan báinai, bórok Kaitorni thani muktwi ma khiklainai. Jotono sak sakni samung hamya tangmarok tei tongmung cha yarok ma khibi bainai.

⁹ Sabo si? Kaitor bini bwkha sláina phano tongo; bo bini jolima khibiui phano mano, hakhe chwng sokomorjak glak.”

¹⁰ Kaitor bórok khlaimano tei lama hamyani kiphilma nuk khe bo bórokno sokomorna bwkha chapmano slái kha; tei bo abo hai khlai li ya.