JONA 2 - Kok Borok (Re-edited) Bible (BSI)

Jona surimani

¹ Hakhe Jona á kotorni bohok bisingo tong tw tẃi bini Subraiyung Kaitorni thani hai hwnwi suri kha,

² “Ang tekto manẃi tong phuru Subraiyungno ring kha, hakhe bo ang ringmano khna kha; hórkang kuthukma bohokni ang ring kha, aphuru ani ringmano nwng khna kha.

³ Nwng ano kuthukma-o khiklai kha, twijlangni bokhri-o, ano twirok chorsa khe khop kha; nini twi aphalrok saka tẃi lái lai kha.

⁴ Hakhe ang sa kha, ‘Ang nini bwskangni norjak laha; nini noktharno ang naisik phinai da?’

⁵ Twirok phaiwi ano ból phai kha, twijlang ano kholop súk kha; hachuk yaphango sógwi khe ani khorok jabra bai bóljak kha.

⁶ Ang thángmani hani duglam khe mol brúmni bagwi kholobwi rwjak kha. phiya ba nwng ani langmano hakhor kuthukni tisaui mwthang kha. O Subraiyung ani Kaitor.

⁷ Ani langma pái tw tẃi wngwi tong phuru ang Subraino muitu man kha; ang nono suri kha nwng ani ringmano nini noktharo khna kha.

⁸ Takjak mwtairokno surinairok nono monnano khibi-o.

⁹ Tamo khe ang le nono hambai rw twtwi se nini thani ratharwi yapharnai; tamo khe ang nono hambaini khorang bai ratharmung yapharnai!”

¹⁰ Hakhe Subraiyung á kotorno sa khe, abo twi rukungni ha kwrano thángwi Jonano ongkhlaiwi rwi kha.