JOHON 7 - Kok Borok (Re-edited) Bible (BSI)

Bini takhuksong bai Jisu

¹ Aboni ulo Jisu Galili-o berai kha; Judai hodarok bono butharna nai tongma bai bo Judia-o beraina nai li ya.

² Aphuru Judairokni Kainok Ter samphajak.

³ Aboni bagwino Jisuni takhuksong bono hai hwnwi sa kha, “Nwng oro ta tong si di, Judia-o tháng di. Hakhe nini sagrirok nwng khlaimarokno nuk anw.

⁴ Bui bai kaham khe sinijakna muchungnai borok bo bini samungrokno huijagwi khlai ya. Nwng omo hai samungrok khlai tongmano ba swngchar gwnangwi se phunukna khlai di.”

⁵ (Bini takhuksong suda bono poito khlai ya.)

⁶ Jisu bórokno hai hwnwi sa kha, “Ani jora tabuk phano sók phai ya kho. Norokni ba tamo sal brúm brúm jora.

⁷ Swngchar norokno naisler man ya, tamo khe ano le naislerjago; tamni hwn khe o swngchar samung hamya máng tango hwnwi ang le saui tong bla.

⁸ Norokno tero tháng lai di. Ang o tero tháng glak, tamni hwn khe ani jora tabuk phano sók phai ya kho.”

⁹ Bo o kókno saui Galili tong rwk kha.

Kainok Tero Jisu

¹⁰ Bini takhuksong tero tháng bai khe Jisubo tháng kha. Hai phano bo nukjagwi tháng yaui huijagwi tháng kha.

¹¹ Judai hodarok a tero bono naituk lai kha. “Biyang sla bo?” hwnwi bórok hwn lai kha.

¹² Lukurok serek-serek khe bini kók máng sa laiwi tong lai kha. Baksa ba “Bo borok kaham se,” hwnwi sa lai kha, phiya baksa ba “I’nhi, bo lukurokno lama koró rwui ton bai kha,” hwnwi sa lai kha.

¹³ Tamo khe Judai hodarokno kirima bai khoroksa phano bini kókno dak-dak khe sa li ya.

¹⁴ Ter pái tẃi pái tẃi-o Jisu noktharo thángwi phrwngwi tongwi kha.

¹⁵ Hakhe Judai hodarok belai uanajagwi hai hwnwi sa lai kha, “O borok porima se kwrwi, bo bahai khe aswk saui man kha sla?”

¹⁶ Jisu hai hwnwi sa kha, “Ang phrwngmani abo ani ya, ano rohornai Kaitorni aroni phaima se.

¹⁷ Kaitor naima hai khlaina muchungnai borok bo saui mano ang phrwngmani abo Kaitorni aroni phaima da, eba khe ang ba ani bai ang sama da.

¹⁸ Bini bai bo sanai borok bo bini sakni mwkhang se chẃng rwna nai-o; phiya bono rohornaini mwkhang chẃng rwna nainai borok bo’-se borok sutrang, bini thani tatal kwrwi.

¹⁹ Musi norokno Kerong rw ya diba? Norokni bere khoroksa phano a Kerongno rákhoknai se kwrwi. Norok tamo wngwi ano butharna nai lai ba?”

²⁰ Lukurok hai hwnwi sa kha, “Nono mwtai hamya kolob kha! Nono sabo butharna nai tong ba?”

²¹ Hakhe Jisu hai hwnwi sa kha, “Ang samung mungsa khlaima bai se norok bebak aswk uanajak bai-o.

²² Musi sakur ra di hwnwi dagi kha. (Musi dagiui abo wngma ya, norokni chuchusongni simi’-no abo tongo.) A dagima hai’-no norok Sabat salo bwsa-bẃtẃirokni sakur ra laiwi tongo.

²³ Musini Kerong bái ya tẃi khe Sabat salo norok bwsa-bẃtẃirokni sakur raui tongo. Hakhe ang Sabat salo borok khoroksano ham rw sukma bai norok tamo swk joli lang ba?

²⁴ Saka saka nukma bai buj ta khlai di, khlai khe sóini buj khlai di.”

Bo Masia da?

²⁵ Jerusalemni baksa bororok hai hwnwi sa lai kha, “Omo bórok buthar laina naimani a borok ya diba?

²⁶ Nahar di, bo dak-dak khe kók saui tong phai kha, hakhe khoroksa phano mungsa hwnnai kwrwi. Bo Masia hwnwi bokhorokrok ba sói khe saui da man hwno?

²⁷ Masia phai phuru khe bo buroni phai abo khoroksa phano saui man glak, o borok le buroni phai abo chwng saui mano.”

²⁸ Noktharo phrwng twtwi Jisu sotonwi hai hwnwi sa kha, “Norok ano kaham khe da sini ba? Ang buroni phai norok saui da man ba? Ang ani bai phaimani ya. Ano rohornai le bo kubui se. Norok bono sini ya,

²⁹ ang le bono sini-o, ang le bo bai rohorjagwi bini aroni phaima bla.”

³⁰ Aboni bagwino bórok bono rom laina nai kha, Hai phano bini jora sók phai ya kho ba khoroksa phano bono yak tisa li ya.

³¹ Lukurokni bisingo borok kwbángma bono poito khlai hai hwnwi sa lai kha, “Masia phai phuru khe bo o borok khlaimani slái da teibo soidomni samung khlai phai no?”

Jisuno romna hwnwi sebukrokno rohormani

³² Jisuno tẃi lukurok serek-serek khe sa laimani Pharisairok khna kha. Hakhe bórok bai ochai okrarok Jisuno romna hwnwi sebukrokno rohor kha.

³³ Jisu hai hwnwi sa kha, “Ang tei srapsa se norok bai tong anw, hakhe ano rohornaini thani tháng anw.

³⁴ Norok ano naituk anw, hai phano nuk glak. Ang tongwi thani norok thángwi man ya.”

³⁵ Judai hodarok bórok kiching bórok hai hwnwi sa lai kha, “Bo buro thángna naiwi chwng bono nuk glak hwnwi sa sla? Bo ba piring-poroi wngwi tongnai Judairokni aro thángwi Grikrokno da phrwngwina hwn?

³⁶ ‘Norok ano naituk anw, hai phano nuk glak,’ phiya ‘Ang tongwi thani norok thángwi man ya,’ bo omo tamo hwnwi sama sla?”

Twi kwthangni twisa

³⁷ Ter páithakni sal, abo se jobor kotor. A salo Jisu bachaui hai hwnwi sotonwi sa kha, “Twi kangnai borok bo ani thani phaiwi nung phai thung.

³⁸ Elembago hai hwnwi sajakma hai, ‘Ano poito khlainai borok bini bisingni twi kwthangni twisa boui phainai.’ ”

³⁹ Jisu omo Pholani kók sama se; bono poito khlainairok se abono man anw. Aphuru phano Phola rwjak ya kho, tamni hwn khe Jisu chẃngsacha wng ya kho.

Luku chapjagwi man ya wngmani

⁴⁰ Lukuni bisingo borok kwbángma bini kók khnaui hai hwnwi sa lai kha, “O borok sói se a Diyari’-no!”

⁴¹ Baksa ba hai hwnwi sa kha, “Bo Masia se!” Baksa khe hai hwnwi sa kha, “Masia khe Galilini wng glak

⁴² Elembago sajak kha Masia Daudni bosongo, Daudni kamichang Betlehemo se achainai.”

⁴³ Hakhe bono tẃi luku chapjak laiwi man ya wng lai kha.

⁴⁴ Baksa ba bono rom laina nai kha, hai phano khoroksa phano bono yak tisa li ya.

Poito khlai ya Judai hodarok

⁴⁵ Sebukrok ochai okra bai Pharisairokni aro kiphilwi phai kha. Bórok hai hwnwi sẃng kha, “Tamo wngwi norok bono logi tubu ya wng?”

⁴⁶ Sebukrok hai hwnwi sa kha, “O borok kók sama hai khoroksa phano sa ya kho!”

⁴⁷ Pharisairok hai hwnwi bórokno sa kha, “Bo norokno buda lama koró rw lang?

⁴⁸ Judai hodarok eba khe Pharisairokni bere khoroksa swk da bono poito khlai lang?

⁴⁹ O bororok Musini Kerong saui man ya, bórok hamya sitrajak!”

⁵⁰ Nikodim bórokni bisingo klai-o, swkango bono Jisu bai malainai. Bo hai hwnwi sa kha,

⁵¹ “Khoroksa tamo khlai khlai ya abono saui manna bagwi bini kók khna ya sini chini Kerong rwksaui tháng khe chwng bono majra ber rwui da man?”

⁵² Bórok hai hwnwi sa kha, “Nwng buda Galilini borok? Nwng elembago cherwi nai di, diyari khoroksa phano Galilini bacha ya kho.”

⁵³ [Hakhe bórok jotono sak sakni nogo kiphilwi tháng lai kha.]