JOHON 5 - Kok Borok (Re-edited) Bible (BSI)

Pukhiri-o yakung yak man yano Jisu ham rwmani

¹ Aboni ulo Judairokni ter kaisa tongo; Jisu aphuru Jerusalemo tháng kha.

² Jerusalemo Mera Duglam gana nuka kaiba gwnang pukhiri khungsa tongo. Hibru kók bai abono Betsata hwno.

³ A nuka-o phula bai, khora bai, yakung yak man ya bai hamyarok kwbángma klai laijak. [Bórok twi pupaknano naisingwi tongo,

⁴ tamni hwn khe Subraini suari khoroksa achom-achom a pukhiri-o ongkhorwi phaiwi twi pupak rw-o; aphuru a pukhiri-o puila ongkhornai borok bo bini jesa hamya phano hamnai.]

⁵ Aro borok khoroksa nokha bisi kwthamchichar hamya klaijak tongo.

⁶ Jisu a borokno aro klaijak nuk kha, bumasíngni simi’-no bo hamya klaijak hwnwi saui manẃi Jisu bono hai hwnwi sẃng kha, “Nwng hamna da nai?”

⁷ A hamya hai hwnwi sa kha, “Takhuk, twi pupak phuru ano pukhiri-o ongkhor rwnai khoroksa phano se kwrwi. Ang tháng te-tháng te’-no ani slái swkang tei khoroksa ongkhor slabo.”

⁸ Jisu bono hai hwnwi sa kha, “Bacha di, nini ríyanrok khochaui him di.”

⁹ Hakhe a borok doropsa hamwi ríyanrok khochaui him kha. A sal wng kha Sabat sal,

¹⁰ aboni bagwino Judai hodarok a ham rwjaknaino hai hwnwi sa kha, “Tini Sabat sal, nwng ríyanrok tẃimani abo chini Kerong swbaima klai-o.”

¹¹ Bo hai hwnwi sa kha, “Ano ham rwnai se ‘Nini ríyanrok khochaui him di,’ hwnwi ano hwn bla.”

¹² Bórok bono hai hwnwi sẃng kha, “Ríyanrok khochaui him di, hwnnai a borok sabo?”

¹³ Phiya a ham rwjaknai le bo sabo si se sini ya. Borok kwbángma tongma bagwi Jisu aro tong bu li ya.

¹⁴ Aboni ulo Jisu bono noktharo nugwi hai hwnwi sa kha, “Khna di, nwng tabuk ham kha. Sumsok ta khlai si di, wng ya khe teibo hamya wngna phano tongo.”

¹⁵ Jisu se bono ham rw-o hwnwi a borok Judai hodarokni thani saui kha.

¹⁶ Aboni bagwino Sabat salo omo hai khe ham rw-o hwnwi Judai hodarok Jisuno sátok lai kha.

¹⁷ Hakhe Jisu bórokno hai hwnwi sa kha, “Apha samung khlai máng tongo, angbo ma khlai tongo.”

¹⁸ Jisu o kók sama bai’-no Judai hodarok bono teibo butharna muchungjak kha; bo Sabat sal rákhok ya, abo simi ya, Kaitornobo Apha hwnwi bo sakno Kaitor bai baksa khlai kha.

Sajlani phan

¹⁹ Aboni bagwino Jisu bórokno hai hwnwi sa kha, “Ang norokno sóino kubui kók sa-o, Sajla bini bai bo mungsa phano khlai ya, Buphano khlaima nukmano simi se bo khlai-o. Bupha khlaimani abono’-no Sajlabo khlai-o.

²⁰ Tamni hwn khe Bupha Sajlano hamjago, hakhe bo khlaimarokno bebak bono phunugo; bo bono omorokni slái phano samung kotorrok phunuk anw, hakhe norok uanajak bai anw.

²¹ Bupha kwthwirokno mwthangwi tisama hai Sajlabo ahai’-no bo khá kama borokno mwthango.

²² Phiya Bupha sakphang keboni buj thum ya. Bo Sajlani yago buj thumnani phan yapharwi rw bai kha,

²³ hakhe Buphano bóri tẃi Sajlanobo bebak’-no bórinai. Sajlano bóri ya khe bo bono rohornai Buphanobo bóri ya.

²⁴ “Ang norokno sóino kubui kók sa-o, ani kók khnaui ano rohornaino poito khlainai borok bo mwthangjak phlai kha. Bo buj thumjak li ya, tamo khe bo thwinani lama bárwi thangnani lama-o sók phai kha.

²⁵ Ang norokno sóino kubui kók sa-o, omo tẃi sal phai rwrwgo, abo tabuk’-no sók phai se tong kha, aphuru kwthwirok Kaitorni Sajlani khorang khna anw, hakhe khnanairok thangcha anw.

²⁶ Bupha sakphang’-no mwthangnaisa wngma hai Sajlanobo ahai’-no bo mwthangnaisa snam kha.

²⁷ Phiya bo Sajlano buj thumnani phan rw kha, bo le Boroknibo Sajla bla.

²⁸ Aboni bai ta uana di; omo hai sal phai rwrwgo, aphuru mangkhorni bebak kwthwirok bini khorang khna anw.

²⁹ Hakhe bórok mangkhorni ongkhorwi phai anw, samung kaham khlainairok kwthang tongna bagwi thangwi bachanai, phiya samung hamya khlainairok khe majra berjakna bagwi thangwi bachanai.”

Jisuni bagwi sakkirok

³⁰ “Ani bai ang mungsa phano khlaiwi man ya; Kaitor ano sama hai se ang buj thumo. Hakhe ani buj thummani abo sói se. Tamni hwn khe ani muchung tẃi ang khlaina nai ya, ano rohornaini muchung tẃi simi se ang khlaina nai-o.

³¹ “Ani bagwi ang sakki rw khe a sakki sói hwnjak glak.

³² Ani bagwi tei khoroksa sakki rwnai tongo. Ang saui mano ani bagwi bo sakki rwmani abo sói se.

³³ Norok Johonni aro borok rohor kha, bo kubuini bwkhak kók sa kha.

³⁴ Ang borokni sakki ma nanani nangnai a kók ya, tamo khe norokbo mwthangjak thung hwnwi se o kókno sa-o.

³⁵ Johon wng kha chati chẃngma hai kwchẃng khe chẃngjak; a pohoro norok srapsa tongthok laina hwnwi khá kamani.

³⁶ Johon ani bagwi sakki rwmani slái phano ani teibo sakki kotor tongo. Apha ano khlai bai di hwnwi rohormarok, omorokno ang Apha bai rohorjakma se hwnwi ani bagwi sakki rwui tongo.

³⁷ Ano rohornai Aphani khorang norok khna ya kho phano, bumukhang nuk ya kho phano, bo ani bagwi sakki rwui tongo.

³⁸ Bini kók norokni bisingo kwrwi, tamni hwn khe bo rohormani borokno norok poito khlai ya.

³⁹ Elembago mwthangjak phlainai kók tongna hwnwi norok abono cherwi nai lai-o. Aile a elembak se ani bagwi sakki rwui tongo,

⁴⁰ phiya mwthangjakna bagwi norok ani oro phaina nai ya.

⁴¹ “Ang borok bai kaham hwnjakna nai ya.

⁴² Tamo khe ang norokno saui mano, Kaitorno norok hamjakma kwrwi abo ang saui mano.

⁴³ Ang Aphani mungwi phaima se norok ano yachak sok ya, phiya khoroksa swk bini mungwi bo phai khe le norok bono yachak lai-o.

⁴⁴ Norok wng kha khoroksa tei khoroksa bai kaham hwnjakna muchungjago, Kaitorsa bai le kaham se hwnjakna nai ya; hakhe norok bahai khe poito khlaiwi mannai?

⁴⁵ Aphani bwskango ang norokno majra bernai hwnwi khá ta ka di. Norokno majra bernai khoroksa tongo; a borok wng kha Musi, norok poito khlaimani borok.

⁴⁶ Norok sói’-no Musino poito khlaima te anobo khlai kha mun, tamni hwn khe bo swilangmani abo ani kók se.

⁴⁷ Bo swilangmano se norok poito khlai ya khe ani kókno bahai khe poito khlainai ba?”