JOHON 3 - Kok Borok (Re-edited) Bible (BSI)

Jisu bai Nikodim kók sa laimani

¹ Pharisairokni bere Nikodim hwnwi Judairokni bokhorok khoroksa tongmani.

² Horsa bo Jisuni thani phaiwi hai hwnwi sa phai kha, “Rabi, nono chwng Kaitor rohormani phrwngnai hwnwi saui mano. Nwng soidomni samung khlaima hai khoroksa phano khlai man ya, Kaitor bo bai tong khe simi se khlaiwi mano.”

³ Jisu bono hai hwnwi sa kha, “Ang nono sói’-no kubui kók sa-o, achai phi ya khe kebo Kaitorni ha nugwi man ya.”

⁴ Nikodim hai hwnwi sẃng kha, “Borok chakra bahai khe achai phirwi mannai ba? Bumani bohok bisingo hap phirwi tei uáisa achaiwi man ya!”

⁵ Jisu hai hwnwi sa kha, “Ang nono sói’-no kubui kók sa-o, twi bai Phola bai achai ya khe kebo phano Kaitorni ha-o habwi man ya.

⁶ Bahan bwthẃini achainai borok bo bahan bwthẃini, Pholani achainai borok bo Kaitorni borok.

⁷ ‘Norok achai phina nangnai,’ hwnwi ang nono sama bai ta uanajak di.

⁸ Nokbar bini muchung tẃi si bo; norok bini sari simi khna-o, phiya biyangni phai biyang tháng abo norok saui man ya. Pholani achainairok bo ahai’-no.”

⁹ “Omo bahai khe wngwi man?” hwnwi Nikodim sẃng kha.

¹⁰ Jisu hai hwnwi sa kha, “Nwng Israilni hodakra wngwi suda omono si ya diba?

¹¹ Ang nono sói’-no kubui kók sa-o, chwng saui mano, chwng nukmano chwng sa-o; norok hai phano chwng samano khunju kan ya.

¹² Ang o swngcharni kókno sama se norok poito khlai ya; hakhe chuknohani kókno sa khe norok bahai khe poito khlainai?

¹³ Chuknohani phainai Borokni Sajlano karwi kebo phano chuknoha-o kasa ya kho.”

¹⁴ Musi hasing panthoro a chibukno kuchugo tisama hai Borokni Sajlabo abo hai kheno ma tisajakna nangnai;

¹⁵ bono poito khlainai borok bo komor yaui mwthangjak phlai-o.

¹⁶ Tamni hwn ba Kaitor swngcharno aswk hamjakmani bagwi bini songdari Sajlano rohor kha, bini a Sajlano poito khlainai borok bo komor yaui mwthangjak phlaiwi manna tẃi khe Kaitor bono rohor kha.

¹⁷ Kaitor bini Sajlano swngcharno majra berna hwnwi swngcharo rohor ya, tamo khe swngchar ba bo bai mwthangjak si thung hwnwi se rohoro.

¹⁸ Sajlano poito khlainai borok bo marja berjak li ya; poito khlai ya hwn khe a borok majra berjagwi tong kha, tamni hwn khe bo Kaitorni songdari Sajlano poito khlai li ya.

¹⁹ A majra berma khe ahai: Swngcharo pohor phaima se, tamo khe bororok samung hamya khlaima bai pohorno hamjak yaui mwnakmano se hamjak kuk si-o.

²⁰ Samung hamya khlainai borok bo pohorno naisigwi man ya, phiya bini samung hamyarok da nukjak langno hwnwi bo pohoro phai rak ya.

²¹ Samung kaham khlainai borok bo bini samungrokno Kaitor bai khlai rwjak hwnwi phunukna bagwi pohoro phai-o.

Jisu bai baptisma rwnai Johon

²² Aboni ulo Jisu bini sagrirok bai Judia amchoi-o tháng kha. Bo aro bórok bai tongwi baptisma rwui tong kha.

²³ Ainono twi kwbángma tongma bai Johonbo aro baptisma rwui tongo, abo Salim bai chal tha ya. Bórok bini thani tháng tháng máng tong kha, hakhe bo’-bo bórokno baptisma rw máng tong kha.

²⁴ (Johon aphuru phano alongo chopjak ya kho.)

²⁵ Johonni sagri khoroknwi khorokthamrok Judai khoroksa bai súchana kókno tẃi tokra rw laiwi tong lai kha.

²⁶ Aboni bagwino Johonni thani thángwi bórok hai hwnwi sa kha, “Hodakra, nai di, Jordan ayang naro nwng bai tongnai, nwng samani a borok, bo tabuk baptisma rwui tongo. Jotono bini thani thangwibo tongo!”

²⁷ Johon hai hwnwi sa kha, “Kaitor rw ya khe kebo mungsa phano man ya.

²⁸ ‘Ang Masia ya, tamo khe ang bini slái swkang rohorjaknai se,’ ang samani o kókno norok sak baithang khna kha.

²⁹ Káijaknaisa’-no káijaknaijwkno mannai; áya gana tongwi khnaui tongo, bo káijaknaisani khorang khnaui belai tongthokjago. Omo hai kheno ani tongthokma tabuk asi yók kha.

³⁰ Bo kotor wng rwrwkna ma nangnai, ang khe kotoi wng rwrwkna ma nangnai.”

Chuknohani phainai

³¹ Sakani phainai borok bo se jotoni slái kotor. Swngcharni phainai khe bo swngcharni’-no, samabo swngcharni kókno sa-o. Chuknohani phainai borok bo se jotoni slái kuchuk.

³² Bo nukma bai khnamano se sa-o, phiya ba khoroksa phano bini kókno poito khlainai kwrwi.

³³ Bini kókno poito khlainai borok bo Kaitorno kubui hwnwi gosi-o.

³⁴ Kaitor bai rohorjaknai borok bo Kaitorni kókno sa-o, tamni hwn khe Kaitor bono bini Phola kupulung khe rw-o.

³⁵ Pha Sajlano hamjago, hakhe bini yago bebak’-no rw bai kha.

³⁶ Sajlano poito khlainai borok bo mwthangjak phlai kha; phiya Sajlani kók khna ya wngnai borok bo mwthangjak glak, Kaitor bono jolijak phlaiwi tongnai.