JOHON 2 - Kok Borok (Re-edited) Bible (BSI)

Kana tauno kái lai panda

¹ Nokha salnwini ulo Galilini Kana tauno kái lai panda tongmani. Jisuni buma a kái lai panda-o tongo,

² Jisu bai bini sagrirokbo aro kobokjak kha

³ Angur bwtwi thwk li ya wngwi Jisuni buma bono hai hwnwi sa kha, “Káilai pandani angur bwtwi páiwi tháng kha.”

⁴ Jisu hai hwnwi sa kha, “Ama, abo nini ba tamo, ani ba tamo? Ani jora tabuk phano phai ya kho.”

⁵ Hakhe Jisuni buma selengrokno hai hwnwi sa kha, “Bo sama hai’-no norok khlai di.”

⁶ Aro holongni marua tháidok tongo, abórok wng kha Judairokni tongmung rwksaui súchana bagwi tonjakmani. Marua tháisa tháisa-o gola tháichi twi chago.

⁷ Jisu selengrokno “O maruarokno twi supung di,” hwnwi sa kha. Hakhe bórok rwtaui supung kha.

⁸ “Tabuk oroni twi kisa khógwi bandarini thani tlang di,” hwnwi Jisu sa kha. Hakhe bórok tlang kha.

⁹ Aphuru bandari a twini khamani angur bwtwino chánaiwi nai kha. A angur bwtwi biyangni sók phai kha bo saui man ya, twi khóknai selengrok le saui mano. Aboni bagwino bo káijaknaisano ringwi

¹⁰ hai hwnwi sa kha, “Jotono angur bwtwi kaham rw gra-o; kái lai panda-o phainairok abono kwbángma nung laima ulo ham thayano rw phai-o. Nwng tabuk suda se kahamno narwgwi ton kho!”

¹¹ Galilini Kana tauno Jisu omo’-no puila soidomni samung khlai gramani; aro bo bini chẃngsachano phunuk kha; hakhe bini sagrirok bono poito khlai kha.

¹² Aboni ulo buma bai bini takhukrok bai tei sagrirok bai Jisu Kapharnaumo tháng kha, aro nokha salnwi saltham se tong lang si-o.

Jisu noktharo bania thwngnairokno rwkhlaimani

¹³ Judairokni Yókma Ter samphama bagwi Jisu Jerusalemo tháng kha.

¹⁴ Bo noktharo thángwi musuk, mera, pharuk phalnairokno nugwi kha, rang sláinairoknobo songphango achuk laiwi tongmani nugwi kha.

¹⁵ Hakhe bo dwkhwini chemuksa snamwi bebakno’-no musuk-mera bai baksa noktharni rwkhlaiwi rohor bai kha, rang sláinairokni songphangnobo philsaui rangrok sar hor bai kha.

¹⁶ Pharuk phalnairokno bo hai hwnwi dagi kha, “Omorokno oroni tlangwi tháng bai di! Aphani nokno bania thwngjaknai nok ta khlai di!”

¹⁷ Elembakni o kókno bini sagrirok muitu manjak kha, “O Kaitor, nini nokni bagwi ang kwsrang wngmani abo ano kobor cha rwnai.”

¹⁸ Aboni bagwino Judai hodarok bono hai hwnwi sẃng lai kha, “Omorokno khlaimani phan tongo hwnwi saui man rwna bagwi nwng bubo tẃi soidom phunugui man ba?”

¹⁹ Jisu bórokno hai hwnwi sa kha, “O noktharno swbai di, omono ang nokha saltham bai’-no tisa phir anw.”

²⁰ “Nwng bahai khe nokha saltham bai omono tisanai?” hwnwi bórok bono sẃngwi hai hwnwi sa kha, “O noktharno tisanani nokha bisi brwichidok nang kha!”

²¹ Jisu samani nokthar le bini bwsak se.

²² Aboni bagwino bo kwthwini mwthangwi tisajak phuru bini sagrirok bo samani o kókno muitu manjak kha. Hakhe bórok Elembaknobo poito khlai kha, Jisu samanobo poito khlai kha.

Jisu borokni bwkhano saui mano

²³ Jisu Yókma Tero Jerusalemo tong phuru bo soidomni samung khlaima nugwi aswk bororok bono poito khlai kha.

²⁴ Hai phano bebak bororokno kaham khe saui manma bai Jisu bórokno poito khlaiwi man ya.

²⁵ Borokni kók bono sana nang ya, tamni hwn khe borokni bwkha bisingo tamo tong bo kaham kheno saui mano.