JOHON 19 - Kok Borok (Re-edited) Bible (BSI)

¹ Hakhe Pilat Jisuno tlangwi swprak rw kha.

² Sengkrakrok busuni motok rabwi bini bokhorogo thubui rw kha, bono rí kochual kan rw kha,

³ hakhe bini thani phaiwi “Judairokni bugra, jinabad!” hwnwi sa kha. Hakhe bórok bono thapra rw lai kha.

⁴ Pilat tei uáisa phataro ongkhorwi lukurokno hai hwnwi sa kha, “Nahar di, bono majra bernani mungsa phano nuk ya hwnwi norokno phunukna bagwi ang bono phataro tubu kha.”

⁵ Hakhe Jisu motok thupjak khe rí kochual kanjak khe phataro ongkhorwi tháng kha. Pilat bórokno hai hwnwi sa kha, “Iko, nahar di a borokno!”

⁶ Ochai okrarok bai sebukrok bono nuk kheno hai hwnwi chirikhók lai kha, “Kruso kanta bu di! Kruso kanta bu di!” Pilat bórokno hai hwnwi sa kha, “Hakhe norok’-no bono tlangwi kruso kanta bu-ui di. Bono majra bernani mungsa phano ang nuk ya.”

⁷ Judairok hai hwnwi sa khua, “Chini Kerongo tongma hai’-no bo ma butharjak thai klai-o, tamni hwn khe bo sak baithang’-no Kaitorni Sajla hwnwi hwno.”

⁸ Bórok o kók samano khna kheno Pilat teibo kirijak kha.

⁹ Bo noyungo habwi tháng phirwi Jisuno hai hwnwi sẃng kha, “Nwng buroni?” Hai phano Jisu tháisa phano sa li ya.

¹⁰ Pilat bono hai hwnwi sa kha, “Nwng ang bai kók sa ya da? Ang nono phiyógwibo mano, kruso kanta bu-uibo mano, abo nwng saui man ya da?”

¹¹ Jisu hai hwnwi sa kha, “Kaitor khlaina rw ya khe nwng ano mungsa phano khlaiwi man glak kha mun. Aboni bagwino nini yago ano yapharwi rwnai borok bo teibo sumsok khlaima klai-o.”

¹² O kókno khnaui Pilat bono teibo phiyógwi rwna bagwi lama naituk kha. Yang Judairok hai hwnwi chirikhók lai kha, “Bono phiyógwi rw khe nwng bugra kotorni bwkhak ya. Khoroksa swk phano sakno bugra hwn khe bo bugra kotorni kena ari!”

¹³ O kókno khna kheno Pilat Jisuno phataro tubu-ui “Holong Khopjak,” hwnmani aroni buj thumjaknai achukthai-o achuk phai kha. (Hibru kók bai abono “Gabatha” hwno.)

¹⁴ Aphuru Yókma Terni salsa swkangni dibor ká twtwi-o. Pilat Judairokno hai hwnwi sa kha, “Iko, norokni bugra!”

¹⁵ Bórok hai hwnwi chirikhók kha, “Pái khibi di! Pái khibi di! Bono kruso kanta bu di!” Pilat bórokno hai hwnwi sẃng kha, “Norokni bugrano kruso kanta bu di da hwn?” Ochai okrarok hai hwnwi sa kha, “Bugra kotor simi se chini bugra!”

¹⁶ Hakhe Pilat Jisuno kruso kanta bu thung hwnwi bórokni yago yapharwi rohor kha. Hakhe bórok Jisuno tlang kha.

Jisu kruso kanta bujakmani

¹⁷ Bo krus balwi phataro ongkhorwi “Bokhorok chárá” hwnwi kwrẃngsa-o phai kha. (Hibru kók bai abono “Golgotha” hwno.)

¹⁸ Aro bórok Jisuno kruso kanta bu lai kha. Bórok bono kwcharo narwgwi yang gana khoroksa, ayang gana khoroksa khe tei khoroknwinobo kruso kanta bu lai kha.

¹⁹ Pilat swijak kangsano kruso thepaui rw kha, aro “Nasaretni Jisu, Judairokni bugra,” hwnwi swijak tongo.

²⁰ Jisuno kruso kanta bumani abo taun bai chal tha ya, hakhe Judairok kwbángma abono pori kha, abo Hibru, Latin tei Grik kók bai swijak.

²¹ Judai ochai okrarok Pilatno hai hwnwi sa kha, “ ‘Judairokni bugra,’ hwnwi ta swi di. Aboni slái hai hwnwi swi di, ‘Ang Judairokni bugra hwnwi o borok sa-o.’ ”

²² Pilat hai hwnwi sa kha, “Ang swimani abo swi kha’-no swi kha.”

²³ Sengkrakrok Jisuno kruso kanta bu baiwi bini rírokno banta kaibrwi khe na lai kha. Bórok bini kamchlwi lolangnobo na lai kha; abo supjak ya, yaphang buchuk rapmani se.

²⁴ Bórok hai hwnwi sa lai kha, “Omono ta sichik di. Omono sabo manthai klai, phai di pat karwi nai lai anw.” Elembakni o kók nang phaina hwnwi se omo wngo, “Ani rírokno bórok banta khe na lai kha, ani kamchlwi lolangno tẃi bórok pat karwi na lai kha.” Aboni bagwino sengkrakrok ahai’-no khlai kha.

²⁵ Jisuni buma, bumani bukhuk, Klopani bihik Mariam tei Magdalani Mariam Jisuni krus gana bacha laijak.

²⁶ Jisu buma bai bo hamjakmani a sagrino aro bacha laiwi tongma nugwi bumano hai hwnwi sa kha, “Ama, ubo se nwsla.”

²⁷ Hakhe bo a sagrinobo hai hwnwi sa kha, “Iko, abo se nwma.” Aphuruni simi a sagri Mariamno bini nogo tonwi kha.

Jisu thwimani

²⁸ Aboni ulo tabuk le bebak’-no pái súk kha hwnwi Jisu saui man kha, hakhe Elembakni kók nang phaina bagwi bo hai hwnwi sa kha, “Ang twi kang kha.”

²⁹ Aro twk tháisa kupulung angur bwtwi siringjak tongo. Bórok a angur bwtwi-o wsponj chomsaui abono hisop bedego thepaui Jisuni bwkhwchwi-o phnangwi rw kha.

³⁰ Jisu a angur bwtwi nung baiwi hai hwnwi sa kha, “Pái súk kha!” Hakhe bo bokhorok bomwi phola yapharwi rw kha.

Jisuni oglep yórmani

³¹ Hakhe kanta bujak bororokni yakung swbaiwi krusni tikhlaina bagwi Judairok Pilatno sẃng lai kha. A sal wng kha Judairokni Tiyar Sal, aboni bagwi se bórok omo hai sẃng lai-o; phainai Sabat abo kotor wng kukma bai bórok kwthwino Sabat salo bórok kruso khachiui tonna nai ya.

³² Hakhe sengkrakrok Jisu bai baksa kanta bujaknairokni aro thángwi khoroksano yakung swbaiwi tei khoroksanobo swbai kha.

³³ Phiya bórok Jisuni aro phaiwi bono thwijak nuk phai kha. Aboni bagwino bórok bono yakung swbai li ya.

³⁴ Hai phano sengkrak khoroksa Jisuni oglebo koslu yór kha, logi logi’-no thẃi bai twi yorkhlaiwi phai kha.

³⁵ (Norokbo poito khlai thung hwnwi o wngmano nuknai o borokno o kókno sa-o. Bo samani abo kubui se, bo saui mano bo kók kubuino sa-o.)

³⁶ “Bini bekreng kongsa phano swbaijak glak,” hwnwi elembakni o kók nang phaina bagwi se omo wngo.

³⁷ Elembago o kókbo tongo, “Bórok yórmani a borokno lukurok ma naisik anw.”

Jisuno phobmani

³⁸ Aboni ulo Arimathia taunni Josep “Jisuni mangno tlangwi da manno?” hwnwi Pilatno sanwi kha. (Josep wng kha Jisuni sagri khoroksa, tamo khe Judai hodarokno kirijagwi khogwi tongo.) Pilat bono tlang di hwn kha. Hakhe Josep thángwi a mangno tlang kha.

³⁹ Jisuno agi horo naina hwnwi thángnai Nikodimbo mur bai Aloi dalokjak kos motom kilogram bachi tubu-ui Josep bai tháng kha.

⁴⁰ A khoroknwirok Jisuni mangno tikhlaiwi kos motom bai khe lilonni rí bai dul kha. Kwthwi phobmani swkang Judairok ahai’-no khlai lai-o.

⁴¹ Jisuno kruso kanta bu thani bari khungsa tongo. Khoroksano phano phobjak ya kho abo tẃi mangkhor kwtal aro khorsa tongo.

⁴² A sal Judairokni Sabat salni salsa swkang klaima bagwi, phiya a mangkhorbo gana’-no tongma bai bórok Jisuno aro’-no ton kha.