JOEL 2 - Kok Borok (Re-edited) Bible (BSI)

Kúkthorarok wng kha Subraiyungni salni bagwi hus khe rwma

¹ Siyono totro tam di; hathái kwtharo hus wng di hwnwi khorang khlai di! Ha-o tongnai bebakno kwlwibra thung, tamni hwn ba Subraiyungni sal sampha kha, a sal dakti’-no phaiwi tongo,

² a sal wng kha mwnak tei mokjak kosom! Hathái-o mwnakma chumui kobol tẃi khe phan gwnang sengkrakrok phai-o: abórok hai swkango kwrwi kho tei phai tongma molobo abo hai bo wng phi glak.

³ Bórokni bwskang bwskang khe hórjlai, tei uklogo khe hór khamchajak. Bórokni bwskangni ha khe Eden tháiblwng hai, hai phano bórokni uklogo a sokomornai hasinglwngni yakni mungsano phano phiyók ya.

⁴ Bórokni mang khe korairokno kosol, tei chobani korai hai khe doui khachik lai-o.

⁵ Bórok korai malkhungrok pung tẃi khe pungwi hathái bochlongo kasa lai-o, abo chwkap khamwi pung tẃi tei chobani bagwi sengkrakrok bwtang khe tiyar wngma hai khlai bwtang wng laijak.

⁶ Bórokno bebakno kirijago, bebakno ma borsa-o.

⁷ Phan gwnang sengkrak hai khe bórok swprago, sengkrakrok hai khe bórok chokdeualo kasa-o. Khoroksa khoroksa bórokni thángthai tẃi thángo, bórok bórokni lamani phérwi tháng ya.

⁸ Bórok kaisa tei kaisani lama tẃi thángwi ubrum jabrum wng ya, jotono janija thángthai tẃi thángo; bórok da-seng bai khe kasujakma tẃi’-no thángo, kwcha rwui man ya.

⁹ Bórok kamiyungo choprok sa-o, tei chokdeualrok tẃi khachigo, bórok tailam tẃi sikhok hai khe habo.

¹⁰ Bórokni bwskango ha kwlwi sa-o, nokharok jangrijago. Sal-tal mwnago tei athukirirok pasa ya ma wngo.

¹¹ Subraiyung bini sengkrakrokni swkang swkang thángwi khorang kotor khe khna rw-o; bini chobani sengkrakrok bwswk se báng! Bini dagimano khnaui tongnairokno lekhaui pái man ya. A Subraiyungni sal le kotorno; kibo kirimasingcha, aphuru sabo yógwi mannai?

Bwkha kiphilna bagwi sama

¹² Tamo khe tabuk phano Subraiyung le sa-o, nini bebak bwkha rw súgwi, ok bukcha tongwi, bwkha nangwi kapma bai khe ani thani kiphil di;

¹³ nini ríno ya bwkha se chir di. Nini Subraiyung Kaitorni thani kiphil di, tamni hwn ba bo wng kha khairoknai tei mayabo gwnang, doui joli ya, hamjakmabo pái phlai ya tei bwkha ham phirwi sátok ya khe tongnaisa.

¹⁴ Subraiyung Kaitor bwkha ham phirwi norokno bwthái-bwchlwirok tei angur bwtwirok yapharwi manna bagwi hamari rw phirwi man glak diba?

¹⁵ Siyono totro tam di; ok bukcha tongwi surina bagwi tiyar khlai di; kaisa kuthumma panda ring di;

¹⁶ lukurokno kwrẃngsa khe thum di. kuthumjak lukurokno kwthar khlai di; chakrarokno kwrẃngsa-o kuthum rw di; chwrai-khonairokno tei abuktwi kakjak ya absarokno suda kuthum rw di. Káijaknai chwla tei káijaknai bwrwi bórokni tongma khotol yakarwi phai thung.

¹⁷ Subraiyungno monnai ochairok noktharni nuka bai háyá tongma kwcharo khe kap thung. Bórok hai hwnwi sa thung, “Subraiyung, nini bororokno khairok ja di, o Subraiyung, nini bororokno buini dopha bai thesra karijaknai ta khlai ja di. Bororok tamni bagwi ‘Buko sla bórokni Kaitor?’ hwnwi hwn thai wngnai?”

Kaitor hano kaham khlai phima

¹⁸ Hakhe Subraiyung, bini hano khá sukmano phunuk kha; bo bini bororokno khairok kha.

¹⁹ Bini bororokno Subraiyung sa kha: Ang nono mai, angur bwtwi tei thok rohorwi tongo nwng ok kochom anw; ang nono dopharokni thani mwnwijaknai khlai glak kha.

²⁰ “Ang salsibaini sengkrakrokno nini aroni nor anw, bórokno khibijak ha-o búkhlai rohornai, bórokni bwskango khe salkabaini twijlang tei uklogo khe salsibaini twijlang wngnai; bórokni mang kosok mwnam báhai hek-hek khe phainai. Kubui’-no bo samung kotor khlai kha!

²¹ “O ha, ta kiri di; tongthok di tamni hwn ba Subraiyung samung kotor khlai kha!

²² O hapharni yabrwirok ta kiri di, tamni hwn ba haphar bukcha khwrangsa kha; buphango bwthái thái kha angur buphang tei khwichang buphang bwthái kwbáng khe thái kha.

²³ “O Siyonni bororok, norokni Kaitor Subraiyungni thani tongthok di; tamni hwn ba bo bini hamarini mari uatwi rohor kha. uatwi molni swkangni uatwi tei uatwi mol páimani ulni uatwi ua rw kha.

²⁴ “Mai nakthani mairok kupulung wngnai, angur tei thok pherethanibo angur bwtwi tei thok kupulung wngnai.

²⁵ Ang nono kúkthorarok, uákhrainai kukrok, bársanai kukrok, sokomornai kukrok tei ani phankrak sengkrakrok bai kebengwi dera rwmani a bisirokni abono nono kiphilwi rw phinai.

²⁶ “Nwng chámung kwbángma chánai tei ok kochomnai tei nini kaham khlainai nini Subraiyung Kaitorni mungno lobnai. Phiya ani bororok tei lachimasingcha khlaijak glak.

²⁷ Ang Israilrok bai tongmano tei ang simi se Subraiyung, nini Kaitor hwnwi nwng saui mannai. Phiya ani bororok tei lachimasingcha khlaijak glak.

Subraiyungni sal

²⁸ “Páithago khe ang bebak bororokni thani ani pholano lukhlai rwnai; norokni sajwk sajlasong kók diyari sanai, norokni chakrarok imangrok nuknai, siklarokbo imang-mukthangrok nuknai.

²⁹ Bwrwi tei chwla selengrokno suda ang a salo ani pholano lukhlai rwnai.

³⁰ “Nokharogo tei ha saka-o ang uanamasingcha samungrok phunuknai, thẃi bai hór bai hoku duphung saui kasanai.

³¹ Subraiyungni a kirimasingcha sal phaina swkang sal mwnaknai, tal thẃi hai chaksanai.

³² Aphuru Subraiyungni mungwi ringnairok khe yóknai; tamni hwn ba yóknairok Siyon hatháini tei Jerusalemni wngnai, Subraiyung sama hai yóknairok Subraiyungni mungwi ringnairok se wngnai.