JOEL 1 - Kok Borok (Re-edited) Bible (BSI)

¹ Subraiyung, Pethuelni bwsla Joelni khúk tẃi sakhlaimani kók:

Mai-khulrok hamya wngwi bwkha khamwi bororok kap laima

² Omono khna di, o chakrarok, ha-o tongnairok bebakno khna bái di! Norokni jora-o, eba nwphasongni jora-o omo hai uáisabo w de wng kha?

³ Omoni kókno’-no nwsarokno sa di; hakhe bórokbo bórokni bwsarokno sa thung, tei bórokni bwsarok bórokni ulni bosongrokno sa thung.

⁴ Uáphiknai kúkthora bodolrok yakarwi klangmano bodol khe tongnai kuk bodolrok abono chá kha. Bodol khe tongnai kukrok karwi klangmano khe, bársanai kuk bodolrok chá kha, barsanai kukrok karwi klangmano khe sokomornai kukrok chá kha.

⁵ O phekplairok sicha di, sichaui kap di; o chuak nungnairok angur bwtwi kwkwrwkni kwtẃini bagwi kap di, tamni hwn ba abo nini búkhúkni sekjak kha.

⁶ Dopha kaisa ani hano swprak phai kha, bo phan gwnang tei bini sengkrakrokbo kwbángma; bórokni buarok singho bua hai tei bórokni uásikjaknai bua khe singho bwrwini hai.

⁷ Bórok ani angur bwlwng dera rw kha, tei khwichang buphangrokno swbai kha; abórokni bukur khugwi khibi kha; hakhe aboni bedekrok ransaui tháng kha.

⁸ Bwrwi sikla káijakna hwnwi tongma chwla thwijagwi, rí kichik kanwi kap tẃi khe kap di.

⁹ Subraini noktharo barokna bagwi bwchlwirok tei angur bwtwirok barokmung tongmano mwthakjak kha. Subraiyungno monnai ochairok bwkha nangwi kap lai kha.

¹⁰ Hapharrok sokomorwi bukcha khlaijak kha hakung kap kha; tamni hwn ba mai-khulrok sokomor rwjak kha, angur bwtwi ransa kha tei thok pái kha.

¹¹ O mai-khul kainairok, norok bwkha mok si di, angur bwlwng mwrwknairok swlwgwi kap lai si di; gom tei barlirokni bagwi; barini bwthái-bumukrokni bagwi kap di.

¹² Angur bwlwngrok mwran kha, khwichang buphangrok thẃi bái kha. Barini dalim, khajuri tei apel buphangrok ranpra bái kha; borokni bwkhani tongthokma kwma laha’-no.

¹³ Háyá-o monnai ochairok rí soroi kanwi kap lai si di. Ani Kaitorno monnairok! Norok phaiwi horo rí soroi kanwi tong si di, tamni hwn ba Kaitorni noktharo bwthái bwchlwi tei angur bwtwi yapharmung mwthakjak kha.

¹⁴ Ok bukcha tongwi surina sakhlai rw si di, lukurokno ringwi kuthum si di. Chakra ojamarokno tei hani bororokno Subraiyungni nogo ringwi tubu-ui Subraiyungni thani kap lai si di.

¹⁵ A sal bwswk se kirimasingcha! Tamni hwn ba Subraiyungni sal samphaui phai kha, tei phankraksani aroni a sokomorma sal phaiwi tongo.

¹⁶ Chini mokol bwskango’-no Kaitorni nokni chámung-nungmung, tongthokmung tei bwkha srangmung, pái tháng ya diba?

¹⁷ Ha bisingni bwchlwirok sok kha, khatima nokrok kwrwi kha; mairok kwrwini bagwi mayam nokrok swbaijak kha.

¹⁸ Musuk-misiprok kengai-o! Musuk bodolrok ayang-uyang himgurungo tamni hwn ba bórokni bagwi cháthai kwrwi kha; mera bodolrokbo tekto man kha.

¹⁹ O Subraiyung, ang nini thani kabo. Hapharni jabrarok tei buphangrok hór bai khampra tẃi khe khampra bái kha.

²⁰ Twisarok ransaui thángma bagwi tei haphar kwkhrang komorma bagwi nini thani bolongni mal-matarok suda kap lai kha.