JISAIA 8 - Kok Borok (Re-edited) Bible (BSI)

Jisaiani bwsla bororokni thani kaisa mari hai

¹ Hakhe Subraiyung ano hai hwnwi sa kha, “Nwng lapsa holong kotor na di tei haino bororok swima swikong bai khe aro-o swi di; Maher-salal-hasbasni kókrokno swi di.”

² Tei abono swiwi narwkna bagwi ang ani poitoni borok, ochai Uriano tei Jeberekiani bwsla Sakariano na kha.

³ Aboni ulo ang diyarijwkni thani tháng kha, bo sakderiya wng kha tei chwla bwsa khoroksa bá kha. Hakhe Subraiyung ano hai hwnwi sa khua, “Bini bumung Maher-salal-hasbas hwnwi phar di.

⁴ Tamni hwn ba, o chwrai ama-apha, hwnwi kók sana srwng ya sini’-no Damaskosni rang-rí tei Samariani sekprojakma manwirok Asiriyani habugrani bwskango rwkaui tubujaknai.”

Asiriyani habugra phaiwi tongo

⁵ Subraiyung ano tei uáisa sa phi kha.

⁶ Bo hai hwnwi sa kha, “Tamni hwn khe o bororok Siloani kwchang kwchang khe yornai twino khibiui Rejin tei Remaliani bwslano tẃiwi tongthok lái si-o,

⁷ aboni bagwi nai di, Subraiyung twima phan gwnangno tei twi kotorno tei Asiriyani bugrano bini bebak kung chukma bai khe bórokni saka-o tubunai; abo bai bini bebak twisarok lom bainai tei bebak twi rukungrok lom bainai.

⁸ Abo Judani ha saka tẃi twi kochogwi thángnai; twi torwi saka tẃi láinai tei lomwi totra jora wngnai; tei o Imanuel, nini hani kebeng bini bwkrang kangnwi phehelma bai kholopjaknai. Subraiyung chwng bai tongo! Bini bwkrang saharjak bai hayungno mwthangnai.”

⁹ O dopharok, thansa wng lai di, norok sukhrupjaknai; o hakchal hani bebak bororok khunju kaichom di; sakno káthon di, norok sukhrupjaknai, norok káthon di, wng ya khe sukhrupjaknai.

¹⁰ Thansa khe kók chap lái di, phiya abo mungsa chúk glak, kók sa di, phiya abo nang glak tamni hwn ba, Kaitor chwng bai tongo.

Subraiyung diyarino ragdama khlaimani

¹¹ Tamni hwn khe Subraiyung ano yak kwrak bai khe hai hwnwi sa kha tei ano phrwngwi sa kha, ang o bororok samani lama tẃi himthai kwrwi,

¹² “O bororok hamya chap lai-o hwnwi bororok hamya chap laimano hamya chap lai-o ta hwn di tei bórok kirimano norok ta kiri di; abórokno kirijaknai hwnwibo ta uansuk di.

¹³ Phiya ba sengkrakrokni Subraiyungno simi se norok kwthar hwnwi na di; bono simi se norok kirithai, bono simi se norok kirina nango,

¹⁴ tei bo kwthar háyá wngnai; phiya Israil núkhung kwnw-nwirokni bagwi’-no bo thutai rwnai holong tei bórokno khiklai rwnai holong wngnai. Jerusalemni bororokni bagwi khe kaisa khẃi tei kaisa uarai hai wngnai.

¹⁵ Tei bórokni bere borok kwbángma’-no thutainai; bórok klaiwi báinai tei khẃi-o kwchaui romjak bainai.”

Kwthwirokni kók namungno hus khlaimani

¹⁶ Norok ani phrwngmungrokno khachobwi ton di, ani kerongno ani sagrirokni bisingo sil bu-ui ton di.

¹⁷ Ang Jakobni bosongni thani mwkhang huiwi tonnai Subraiyungno naisingwi tongnai; ang bono khatungwi tongnai.

¹⁸ Nai di, ang tei Subraiyung ano rwmani chwrairok khe Siyon hathái-o tongnaisa Israilni Subraiyungni uanamasingchani mari se.

¹⁹ Tumung bórok norokno, “Norok mwtai hamya tei kók mwtai sanai, diyari karnai, khuri toknairokni thani naitugwi di,” hwnwi sa khe, aphuru bororok ba sakni Kaitorni thani naituk glak diba? Kwthangrokni bagwi ba tamo kwthwirokni thani da naitukno?

²⁰ Kerong tei raida-o phrwngna bagwi tumungno bórok o kókno sa ya hwn khe, bórokni thani pohor kwrwi.

Dukhuni jora

²¹ Hakhe bororok ha gwnangwi’-no bwkha báiwi tei ok khuiwi berai anw. Bórok ok khuimani bai khe joliui sakni habugrano tei sakni Kaitorno swrai lai anw. Bórok nokha ma naisa lai anw.

²² Bórok ha-o naikhlai lai anw, tamo khe bórok digi-sigi simi tei mwnakma tei kengai laima simi nuk lainai; bórok mwnak kugo dagarwi khiklaiwi rohorjaknai.