JISAIA 7 - Kok Borok (Re-edited) Bible (BSI)

Habugra Ahasno samani

¹ Judiani habugra Ujiani busuk Jothamni bwsla Ahasni jora-o Siriyani bugra Rejin bai Israilni habugra Remaliani bwsla Peka Jerusalemno kebengwi choba nangnani tháng kha, phiya ba bórok a choba-o mechenwi man li ya.

² Aphuru Daudni bosongno hai hwnwi sajak kha, “Siriya Ephraim bai kwthaui lai kha. Aboni bagwi bórokni bwkha bai bini bororokni bwkha kwlwibra kha, abo bolongni buphangrok nokbar bai jangrijakma hai wng kha.”

³ Hakhe Subraiyung Jisaiano sa kha, tabuk nwng tei nwsla Sear Jasub khoroknw-nwi’-no Ahas bai malainani bagwi sa kha, sakani pukhirini a twisani páithago rí súnaini hapharni lama kotoro tháng di,

⁴ tei bono sa di, Rejinni bai Siriyani tei Remaliani bwslani jolimani abórok hoku kasajak hosundarok hai se, abórok bai hus wng di tei kwchang kwchang khe tong di; ta kiri di tei bwkhabo ta bái di.

⁵ Tamni hwn khe Siriya bai Ephraim tei Remaliani bwsla nono kebengwi hamya kók chabwi hai hwnwi sa kha,

⁶ “Phai di chwng Judano kebengwi tháng lai anw tei bono kiri-kóró khlai lai anw tei chwng bono mechenwi abono segwi na lai anw, hakhe Tabilni bwslano aroni bugra chá rwui rw lai anw.”

⁷ Subraiyung Kaitor hai hwnwi sa-o, “Abo wng glak tei ulo bo wng glak.

⁸ Tamni hwn khe Siriyani bokhorok wng kha Damaskos tei Damaskosni bokhorok khe Rejin. Tei nokha bisi dokchi ba bisini bisingo Ephraim báikhrupnai tei dopha hwnwi tong glak.

⁹ Ephraimni bokhorok wng kha Samaria tei Samariani bokhorok wng kha Remaliani bwsla. Tumungno nwng kwrak khe poito khlai ya hwn khe, nwng songchajak glak.”

Imanuelni mari

¹⁰ Subraiyung Ahasno hai hwnwi sa phi khua;

¹¹ “Nwng Subraiyung nini Kaitorni thani mari kaisa san di; abo morke swk kuthuk eba nokha hai kuchuk phano wng thung.”

¹² Phiya ba Ahas hai hwnwi sa kha, “Ang san ya tei Subraiyungno bo ang amjok ya.”

¹³ Phiya bo hai hwnwi sa kha, “Hakhe o Daudni bosongrok! Norok bororokno lengpra rwui wngjak ya gwja kho da? Tamo ani Kaitorno suda de lengpra rwnai?

¹⁴ Aboni bagwi Subraiyung sakphang’-no norokno mari kaisa rw anw. Nai di, bwrwi sikla khoroksa sakderiya wngnai tei bwsa chwla khoroksa bá anw tei bini bumung ‘Imanuel’ hwnwi pharjaknai.

¹⁵ Bo hamyano khibiui kahamno saiwi naui manna bagwi dut bothona bai piya bwtwino chá anw.

¹⁶ O chwrai hamyano khibina rwngnani tei kahamno saiwi nanani swkang’-no norok khibimani a ha tei habugra khoroknwino yakarjaknai.

¹⁷ Juda bai Ephraimni kagwi thángmani salo tei bugra Asiriyani jora-obo omo hai wng ya kho, omo hai Subraiyung nini saka-o, nini bororokni saka-o tei nini nwphani bosongni bororokni saka-o abo tẃi hai kaisa jora tubu anw.”

¹⁸ A salo Subraiyung Ijipni twima rukungrokni bebak thampui tei Asiriya hani piyarokno phainani bagwi muisup anw.

¹⁹ Hakhe abórok bebakno phaiwi halap kuchukrogo, hachukrogo, holong besero, busu bwlwngo tei bebak hapharni jabrarogo tong phai bainai.

²⁰ A salo Subraiyung Uphratis twima ayang narni solok tubujakma sengsa bai khe Asiriyani bugra norokni bokhorok tei yakungni buikhumu silwi rwjaknai; tei abo bai’-no khochaibo siljaknai.

²¹ A salo borok khoroksa musuk masa tei mera bwrwi maknwi narwk anw,

²² tei dut bángmani bagwi bórok dut bothona chá anw; tei aro karwi klangjak bororok dut bothona bai piya bwtwi chá anw.

²³ A salo bebago rukphai sasai bai angur sasai man thani-o, abo bebakno atakereng bai busulwngrok máng wngnai;

²⁴ bororok chakhla, badukhungrok tẃiwi aro tháng lai anw, tamni hwn khe aro bebak hano atakereng bai busu bolong wng bainai;

²⁵ tei bebak hachukrok gudal bai khurjakmani; nwng atakereng tei busurokno kiriui aro tháng glak; abo musukrok phiyókma tei merarokni kádulthai wngnai.