JISAIA 6 - Kok Borok (Re-edited) Bible (BSI)

Kaitor Jisaiano diyari wngna bagwi ringmani

¹ Ujia habugra thwimani bisi-o, ang Subraiyungno achukthayungo achukjak nuk kha, abo wng kha kuchuk; tei bini chummani ríni buchukrok bai nokthar kupulung wngjak.

² Bini saka-o khe Seraphimrok bacha laijak, bórokni bebakni’-no bwkrang kangdok kangdok khe tongo, bebakno bwkrang kangnwi bai khe bórokni mwkhang kholobo tei kangnwi bai yakung kholobo tei kangnwi bai khe bórok biro.

³ Bórok khoroksa tei khoroksano ringwi hai hwnwi sa lai kha: “Kwthar, kwthar, kwthar! Sengkrakrokni Subraiyung; bebak ha bini chẃngsacha bai kupulung.”

⁴ Aphuru bórokni khorang bai noktharni duglamni thonglarok tei noktharni yaphang kwlwi kha tei noktharni bisingo hoku bai kupulung wng kha.

⁵ Ang hai hwnwi sa kha, “Ang komorlaha do! tamni hwn ba ang le kwmajak se; ani búkhúk le sumsok gwnang se, ang sumsok gwnang búkhúk bororok bai se tongo; ani mokol bai bubagra, sengkrakrokni Subraiyungno nuk kha.

⁶ Hakhe a seraphimrokni bere khoroksa ani thani birwi phai kha, bini yago hokhi bothrai chẃngjak phonsa, bo abono háyá sakani yakhep bai naharmani.

⁷ Bo abono ani búkhúgo phnangwi hai hwnwi sa kha, “Nai di, omo nini búkhúgo thepajak kha; nini majrarok naui páijak bai kha tei nini sumsokrok súchajak bai kha.”

⁸ Hakhe ang Subraiyungni khorang bai hai hwnwi sama khna kha, “Ang sabono rohornai tei chini bagwi sabo thángnai?” Hakhe ang hai hwnwi sa kha, “Iko ang oro se! ano rohor di.”

⁹ Hakhe bo hai hwnwi sa kha, “Tháng di, o bororokno saui di: ‘Norok khna khna phano romwi se man ya; nuk nugwi tong phano saui man ya.’

¹⁰ O bororokni bwkhano butua khlai di, bórokni khunjuno nathong khlai di tei mokolno nuk ya khe rw di; wng ya khe mokol nugwi tei khunju bai khnaui bwkha-o saui man anw, hakhe bwkha kiphilwi ham rwjaknai se.”

¹¹ Hakhe ang hai hwnwi sa kha, “O Subraiyung tei bwswk jorani bagwi?” Hakhe bo uphilwi hai hwnwi sa kha, “Kamiyungrok báiwi borok kwrwi wngwi khibijak bai ya sak tei nokrok borok kwrwi bukcha wng ya sak tei haphar báiwi pái bukcha wng ya sak;

¹² tei hano kirimasingcha khe bukcha khlai ya sak Subraiyung bebak bororokno hakchalo rohornai.

¹³ Bini chi-o kaisa ha-o tong rwk phano abono tei uáisa bukcha khe tonjaknai, phiya ba terebint eba uk buphangrok tanpháijak phano bini yaphang tong rwgo.” Bwchlwi kaham khe bini yaphang se.