JISAIA 52 - Kok Borok (Re-edited) Bible (BSI)

Kaitor Jerusalemno mwthangnai

¹ Sicha si di, sicha si di, o Siyon; nini phan socha si di; nini rí naithokrokno kan si di, o kwthar kamiyung Jerusalem; tamni hwn khe tabukni simi norokni bisingo sakur rajak ya tei borok kwthar yarok hap phai glak.

² Bwsakni hadlwi bupra si di, o khaui tonjak Jerusalem bacha si di; o Siyonni sajwk nini totrani khajakno kheng si di.

³ Tamo khe Subraiyung hai hwnwi sa-o, “Norok hai’-no se phaljakmani ba rang nang yaui’-no phiyókjak anw.”

⁴ Tamni hwn khe Subraiyung Kaitor hai hwnwi sa-o, “Ani bororok swkango Ijip ha-o tongwina tháng baimani, abo se Asiriyasong ahai’-no bórokno sátok kha.

⁵ Tabuk Subraiyung sa-o, oro-o ani tei tamo tong si, ani bororok ahaino tlangwi thángjak bai kha. Subraiyung sa-o, bórokni bokhorokrok kap lai kha tei ani bumung sal brúmno thak phlai yaui hamya sajagwi tongo.

⁶ Aboni bagwino ani bororok ani bumungno saui man anw, aboni bagwi bórok a salo saui man anw, ang’-no o kókno saui tongo; ang orono.”

⁷ Kothoma kaham tubunairokni yakungrok, hachuk saka-o bwswk naithogwi tong; tong kwchangni kók sakhlainairok, kahamni kothoma tubunairok, mwthangma kókno sakhlainairok. Siyonno hai hwnwi sa-o, “Nini Kaitor nono naikolwi tongo.”

⁸ Norokni mwrwknairokni khorang sochanai, bórok chirikhógwi khorang khlai lai kha. Bórok baksa khe tongthogwi rwchap lai kha! Tamni hwn ba Subraiyung Siyono kiphilwi phai phuru! Bórok mokol baithang nuk lainai.

⁹ O Jerusalemni tongthai khibijakrok baksa khe tongthogwi rwchap di; tamni hwn khe Subraiyung bini bororokno khakchang rw kha, bo Jerusalemno phiyók kha.

¹⁰ Subraiyung bebak dopharokni bwskango, bini phan yak kwtharno phunuk kha. Tei bebak hani páithak jora tẃi chini Kaitorni mwthangmano nuk anw.

¹¹ Kutul di, kutul di, oroni ongkhorwi tháng di, kwthar ya manwi mungsa swkno phano ta tang di, Subraiyungni mairang-lota tẃinairok norok sakno kwthar khlai di.

¹² Tamni hwn khe norok dora-dukhu khe ongkhorna nang glak, tei norok khárma hai khe thángna nang glak, tamni hwn khe Subraiyung se nini bwskang bwskang tháng anw, tei Israilni Kaitor se norokni uklogo tongwi mwrwgwi tong anw.

Dukhu nangjak seleng

¹³ Nai di, ani seleng chasanai. Bo lobjaknai, kuchugo tisajaknai, belaino kuchuk wngnai.

¹⁴ Kwbángmano bono mwlang cha lainai bini sakduk bui bai sol ya tei bororokno sol ya, bini sakduk borokni sajlarokno kosol wng ya.

¹⁵ Aboni bagwi bo kwbángma dopharokno uanama cha rwnai; bini bwskango habugrarok khúk ma muthup anw, tamni hwn ba bórokni thani sajak yarokno, bórok nuk anw, bórok khna ya kho, abóroknobo bórok saui man anw.