JISAIA 5 - Kok Borok (Re-edited) Bible (BSI)

Angur bwlwngni rwchapmung

¹ Ani khásuksani bagwi ang rwchapnai, bini angur bwlwngno tẃiwi rwchap anw: tos gwnang hachukni samo ani khásukni angur bwlwng kaisa tongmani.

² Bo abono kitingwi hakhor khur kha, tei aroni holongsikirok saiwi khibi kha, bo aro kaham kuk angur buphang kái kha. Bo aro mwrwkna bagwi nok kuchuk kaisa tang kha, tei angur sepnani bagwi hakhor khorsa khur kha. Hakhe bo angur bwthái kaham manna bagwi naisingwi tong kha. Phiya ba abo bwthái hamya se thái si-o.

³ Hakhe o Jerusalemo tongnairok bai Judani bororok, ang bai ani angur barino bahai tamo nai di.

⁴ Ani angur barini bagwi tei tamo bára khlaina tongmani khlaijak ya ba wng kha? Ang angur bwthái kaham se man anw hwnwi tongmani tamni bolongni angur ba thái lang?

⁵ Hakhe tabuk ang ani angur bwlwngno tamo khlainai nono saui man rwnai. Ang aroni ubi dúmjak tongmano norwi páinai tei abórokno sókchaui khibinai. Ang aroni deual swbaiwi páinai tei káduljaknai.

⁶ Ang abono bukcha khe khiklaiwi tonnai; abo tabo tangjak glak tei habo khurjak glak, aro atakereng tei busurok simi achainai. Ang chumui budulno bo uatwi ta ua thung hwnwi dagiui rwnai.

⁷ Tamni hwn khe, Israil dopha wng kha sengkrakrokni Subraiyungni angur bwlwng; Tei Juda hani bororok wng kha, bo káimani angur buphangrok. Bo bórokno bujsói tẃi thung hwnwi naimani, hai wng yaui bórok borok se buthar si-o. Bo bórokno samung sói khlai thung hwnwi naimani, phiya ba bórok bai sátokjaknairok bujsóini bagwi se ma chirik lai si-o.

Bororok hamya khlaimani

⁸ Norok teibo nok báng rwnairok tei haphar báng rwnairokni saka-o bati yagwnwi nang thung. Aro daktino buini bagwi tongnani tongthai tong glak tei nwng saichung khe aro ma tong anw.

⁹ Sengkrakrokni Subraiyung ani khunju-o sereksa khe sa kha, kwbángma nokrok kubui’-no bukcha, nok kotor kotorrok, naithok naithok nokrogo borok tongnai tong glak.

¹⁰ Tamo khe kaichi ekor angur bwlwngo galon kaiba bwtwi se man anw. Topong kaichi bwchlwi sar khe bebagwi topong kaisa se bwchlwi man anw.

¹¹ Arak nungnani bagwi phung aidrop bachanairok bórok bati nang thung; arak bai bórok jurang uaija ya sak hor thuk yasakno nung lai-o.

¹² Bórokni panda-o sarinda, totro, kham lapsa, sumui tei arak tongo; phiya ba, bórok Subraiyungni samungo sakthar li ya tei bini yakni samungrokno uansugwi nai li ya gwja.

¹³ Ani bororok khá siyani bagwi buini ha-o romwi tlangjak bai kha; bórokni bórom gwnangrok ok khuiwi ma thwinai tei borok bánglarok kangwi ma thwi bainai.

¹⁴ Aboni bagwi hakhor bini bohokno ok khuima bai phuar kha, hakhe bo mansakno búkhúk kotor khe khua kha. Bórokni borok kahamrok, borok bánglarok bai baksa khe kwlwgwi tháng kha, bórokni bisingo tongthogwi chirikhóknairok bebakno aro ongkhorwi tháng bai kha.

¹⁵ Lukurok mwkhang bom kha, bebak bororok hachero tikhlaijak kha tei kung chuknairokno lachimung man rwjak kha.

¹⁶ Phiya ba sengkrakrokni Subraiyung buj thum thani lobsajaknai tei kwthar kuk Kaitor bini sói kubui bai khe sakno kwthar hwnwi phunuknai.

¹⁷ Hakhe mera bwsarok sakni sula-o mwrwgwi chá rwjakna nangma tẃi’-no chá rwjaknai, bupham gwnang tei mera bwsarok gwnangrokni khibijak sula-o mwrwgwi chá rwjak anw.

¹⁸ Phemlokma dwkhwi bai hamyano sotonwi tubunairok tei musuk malkhungni dwkhwi bai sumsokno tubunairok bórok bati nang thung.

¹⁹ Bórok hai hwnwi sa-o, “Chwng nukna tẃi khe bo samung do rw thung, bini samung daktino khlai thung; chwng abono saui manna bagwi, Israilrokni kwtharsa bo bini khlaina chapmano doui’-no khlai si thung!”

²⁰ Hamyano kaham tei kahamno khe hamya hwnwi sanairok, pohorno mwnak tei mwnakno pohor hwnwi sanairok, kwtẃino kwkha tei kwkhano khe kwtẃi hwnwi hwnnairok bórok bati nang thung!

²¹ Sak sak siyan gwnang hwnwi uansuknairok tei sak sakno kwrwng hwnwi nuknairok, bórok bati nang thung.

²² Chuak nung thani kwplai kuk tei chuakrok dalnani kwrwngrok, bórok bati nang thung,

²³ rang naui norok majra gwnangno phiyógwi rohoro tei borok kahamrok bujsói man ya;

²⁴ aboni bagwino hór bai chwkap kham twi tei hórjlai-o gundak kwran khamma hai, abo hai khe bórokni yaphang bo sogwi thángnai tei hadlwi hai kheno bórokni bubarbo kobonwi thángnai; tamni hwn khe bórok sengkrakrokni Subraiyungni kerongno khibi kha tei Israilni kwtharsani kóktháino sak nang li ya gwja.

²⁵ Aboni bagwi Subraiyung bini bororokno jolijak kha, tei bórokni saka-o kosonwi yak pholok kha phiya bórokno swprak kha; hachukrok kwlwi bai kha tei bórokni mang kwthwirok lama kwcharo klaiwi tong bai kha. Aswk bai bo bini thamchi holi li ya, phiya bini yak tabuksak jora tẃi pholokjakno tong kho.

²⁶ Bo hakchalo tong twtwi bororokni bagwi kaisa phunukmari tisanai tei bororokni bagwi ha páithakni simi muisupnai; hakhe bórok dodro-dodro khe doui phai lainai.

²⁷ Bórokni bere khoroksa phano leng glak, usta khu glak, eba muktrwi thángwi tong glak eba thu glak, bórokni yakungni yaklap buduk choui tháng glak.

²⁸ Bórokni chakhlarok belai kubuk, bórokni bebak badukhungrok thonjak, bórokni korairokni yásku holong kwchẃng hai kwrak tei bórokni korai malkhungrokni gorgorirok kitingmani bangkundri hai.

²⁹ Bórokni sokromma khorang singho khorang hai, bórok singho bwsa hai’-no sokromo; bórok sokromwi thángwi muino choprogwi romo tei kirima kwrwi khe bangkhárwi tlangwi thángo, hakhe khoroksa phano abono phiyók glak.

³⁰ Bórok a salo twijlangni twi kutukma hai khe bórokno kutuk anw; tei aphuru khoroksa swk phano ha phaising nahar khe mwnakma bai digi-sigino nuknai tei pohorbo chumui bai kobolwi mwnak rwui tonjaknai.