JISAIA 42 - Kok Borok (Re-edited) Bible (BSI)

Subraiyungni seleng

¹ Iko nahar di ani seleng ang bono chuba-o, bo ang saiwi namani, bono tẃiwi ani khápang tongthok súgo; ang bini saka-o ani pholano lukhlai rw kha, bo dopharokno sói khe buj thumnai.

² Bo chiri-mokorok wng glak eba khorang kotor khe kók sa glak, eba laharrogo bini khorangno khna rw glak.

³ Bo báikhrupjak bokongphangrokno swbai glak, tei thwimurumuru khe dosi chẃngjak chatinobo buthar glak; bo khá bai khúk bai bujsóino tubu-ui phainai,

⁴ O ha saka-o bujsóino songcha ya sak bo man ya wng glak, eba bwkhabo bái glak; tei twijlang rukungni harok bini raidarokno naisigwi tongnai.

⁵ Chuknohano snamnai tei abono phuarnaisa hano tei ha saka-o tongnairokno achai rwnai bororokno langma rwnai, tei aboni saka-o himnairokno phola rwnai, a Kaitor, Subraiyung o kókno sa-o.

⁶ Ang Subraiyung, ang nono kubui bai khe ringo, ang nono yak bai romwi na kha, nono kati rwui tonnai, tei nono ang bororokni thani swmai hai khe, tei dopharokni pohor hai khe rw kha.

⁷ Nwng phularokno mokol nuk rwna bagwi, alongni hakhoro chopjakrokno phiyókna bagwi, tei khajagwi mwnakma-o achugwi ma tongnairokno phiyókna bagwi chong kha.

⁸ Ang’-no Subraiyung, abo’-no ani mung; ang ani chẃngsacha buino, eba ani lobmungno takjak mwtairokno rw ya.

⁹ Nai di swkango tongmarok lái tháng bai kha, tei ang tabuk kwtalrokno sakhlai-o. Abórok wngmani swkang’-no ang norokno sakhlai-o.

Lobwi rwchapmani

¹⁰ Subraiyungni thani rwchapmung kwtal rwchap di, ha páithak jorani simi bono lob di! twijlang tei bono supungnairok, twi rukungrok tei aro tongnairok bono lob di.

¹¹ Hasing haphar tei aroni bebak kamiyungrok khorang socha di, Kedarni kami-o tongnai bororok; Sela-o tongnairok bo tongthokma bai rwchap lai thung; hachuk bochlongni simi khorang kotor khe chirikhók thung.

¹² Bórok Subraiyungni chẃngsachano bórom khlai thung, twijlang rukungni harok bini lobjaknano sakhlai thung.

¹³ Subraiyung phan gwnang hai khe swkangwi thángo, khoroksa chobani borok hai tung phlasa-o; bo khorang kotor khlai-o; bo sotonwi chirikhógo. Bo bini arirokno bini phan kwrakno phunugo.

Kaitor bini bororokno chubana hwnwi kók rwmani

¹⁴ Kwbángma sal ang kwchang kwchang khe tong kha, tabuk jora tẃi siring siring khe tong kha; ang sakno soiwi narwk kha; phiya ba tabuk khe bwrwirok bwsa bána phuru kengaima hai khe bachanai; ang hama kolok naui phan thonnai.

¹⁵ Ang hachuk tei hachuk bwsaterokno swbai sukhrup bainai; aroni bebak buphang uáphangrokno ranpra rwnai; twimarokno kothorni ha khlai bainai; twima tei pukhirirokno ransa rwnai.

¹⁶ Ang phularokno bórok sini ya a lahar tẃi tlangnai; bórok saui man ya abo hai lahar tẃi bórokno tẃinai, ang bórokni bwskangni mwnakno pohor khlainai; ha milik yarokno milik khlai bainai. omorokno bebakno ang khlainai, ang bórokno khibi glak.

¹⁷ Takjak mwtairokno bwkha beranairok; takjak mwtairokno “Norokno chini mwtairok” hwnwi; hwnnairokno phikung uphilwi rohorjaknai, tei bórok belai khe lachimung man rwjaknai.

Israilrokno phrwngwibo rwng ya

¹⁸ O nathongrok khna di, o pholarok norok bebak nuknani bagwi mokol phiyok di.

¹⁹ Ani selengno karwi tei sabo phula tong? Ang tẃitun rohormano karwi tei sabo nathong tong? Ani sak yapharjakni slái tei phula sabo tong? Eba Subraiyungni seleng hai phula sabo tong?

²⁰ Bo kwbángma manwirok nugo; phiya ba nwng abórokno kaham khe nai ya; bini khunju phiyokjakno tongo; hai phano khw se khna ya.

²¹ Subraiyung bini kaham khe tongmano hamjago; tei raidano chẃng rwnani tei mung tor rwnano hamjago.

²² Phiya ba o bororok wng kha khokjaknai tei tantharjak, bórok bebakno hakhoro klai khẃi-o kwchajak; tei alongo huiwi tonjak bai kha; bórokni bebakno romjak bai kha; bórokno phiyóknai khoroksa phano kwrwi. kiphilwi rw di hwnwi sachrunaibo khoroksa phano kwrwi.

²³ Norokni bere sabo omono khnanai tong, sabo kaham khe uansugwi phainai jorani bagwi khna chomnai tong?

²⁴ Sabo Jakobno hamya khlainairokni yago, tei Israilrokno tantharnairokni yago yaphar kha? A Subraiyung ya diba, bono kebengwi chwng sumsok khlaimani bagwi bini lama tẃi bororok himnani sói ya wngmani, bini raidano khna ya wngmani?

²⁵ Aboni bagwi bo bórokni saka-o bini thamchi tungmano tei chobani phanno lukhlaiwi rw kha; aboni bagwi bono kitingwi hór phnangwi rw kha, hai phano bo khá si li ya; hórjlai bono khampro rw kha, hai phano bo bini bwkha-o yachak li ya.