JISAIA 41 - Kok Borok (Re-edited) Bible (BSI)

Kaitor Israilrokno kók rwmani

¹ O twi rukungo tongnairok ani thani siring siring khe khna di; bororok kwtal khe phan socha thung; bórok gana-o phaiwi ulo kók sa phai thung; phai di chwng baksa khe bujni bwskango tháng lai anw.

² Sabo salkabaini bebago’-no kwplai wngnai khoroksano phainani bagwi muchungma rw lang? Bo dopharokno bini yago yapharwi rw-o; hakhe bo bugrarokno yakung bai kádulo; bo bini seng bai bórokno hadlwi chá rw-o, tei badukhung bai khe chwkap hai khe kobon rwjaknai.

³ Bo bórokno riphrigwi tháng kha tei kaham kheno lái kha, lama tẃi uáisa phano bini yapri klai li ya.

⁴ Sabo o samungrokno khlai kha, tei sabo omono tang kha yaphangni simi bosongrokno kusung kusung sabo ring kha? Ang Subraiyung se yaphang, tei páithagobo ang’-no.

⁵ Twi rukungo tongnairok nuk bai kha tei kirijak lai kha, hani páithak jora tẃi kwlwi lai bai kha, bórok gana-o khe phai lai kha.

⁶ Bórok bebakno nok arini bororokno chuba lai kha, tei sakni takhukno hai hwnwi sa lai kha, “Bwkha kwrak wng di!”

⁷ Tang kwrwngrok rangchakni manwi taknairokno bwkha bacha rw kha, tei mutari bai togwi milik khlainai bo manjunairokno hai hwnwi sa kha, “Omo kahamno wng kha;” tei bórok ninang ya tẃi khe sor khili togwi daui rw lai kha.

⁸ Phiya ba o ani seleng Israil, ani chongjak Jakob, ani kiching Abrahamni bosong;

⁹ ang nono ha páithakni romwi tubumani, hakchal hani páithakni simi nono ringwi hai hwnwi sa hor kha, “Nwng ani seleng, nono ang chong kha tei nono ang khibi glak.”

¹⁰ Ta kiri di, ang nwng bai tongo, bwkha ta bai di, tamni hwn ba ang nini Kaitor, Ang nono phan rwnai, ang nono chubanai, ang nono ani kwplai yagra yak bai khe romwi tongnai.

¹¹ Nai di, nono joli rwnairok bebakno lachi rwjaknai tei udru mudru wng rwjaknai; nono kebengwi bachanairokni mungsa tong glak tei bórok bebakno komor bainai.

¹² Nono kebengwi bachanai bororokno nwng naitugwi nai anw, phiya ba nwng bórokno man glak; nono kebengwi choba bachanairok mungsa mari phano tong rwk glak.

¹³ Tamni hwn khe ang Subraiyung nini Kaitor, nini yagra yago romwi tongo, ang se nono hai hwnwi sa-o, “Ta kiri di, ang nono chubanai.”

¹⁴ O yóngsa hai Jakob tei Israilni bororok ta kiri di! Ang norokno chubanai hwnwi Subraiyung sa-o; Israilni Subraiyung nini phiyóknai.

¹⁵ Nai di ang nono kwtal kubuk bua gwnang pherejaknai hai khe snamnai, nwng hachukrokno swbai sukhrup bai anw, nwng hachukrokno khe gundak hai khlai anw.

¹⁶ Nwng bórokno chok anw, nokbar bórokno kobonwi thwng anw tei boyar bórokno piring-poroi khlai bainai, tei nwng khe Subraiyungno tẃiwi tongthok anw; Israilni a kwthar kukni bising tẃi nwng chẃngsa rwnai.

¹⁷ Bigra-khangra twi nangjagwi naituk laiwi man ya wng phuru, bórokni bwslai twi kangma bai ransanai, ang Subraiyung bórokno uphilwi sanai, ang Israilni Kaitor bórokno khibi glak.

¹⁸ Ang hachuk bukchani sakarogo twima boui rwnai, tei harung kwcharo khe twimuk pasa rwnai; ang haphar bukcha-o pukhiri khlainai, tei ha kwrano twimuk chersa rwnai.

¹⁹ Ang haphar bukcha-o sidar, akaia, martel tei tháistwi buphang káinai; ang hasing hapharo saipras, swndwk tanjaknai buphang bai pain buphang thansa khe káinai,

²⁰ bororok omono nugwi saui manẃi kaham khe uansuk laiwi man thung, Subraiyungni yak bai se omono khlai-o, tei Israilni kwtharsa se abono snamo.

Subraiyung ereng mwtairokno panjimani

²¹ Subraiyung hai hwnwi sa kha, norokni sajaknai kókrokno tubu di; Jakobni habugra sa kha, norokni kubuino phunugui bwskango tubu di.

²² Bórok abórokno bebakno tubu-ui gana-o phai thung, tamo tamo wngno, chwngno saui khna rw thung. Swkango wngmarokno chwngno sa di. Abo hai hwn khe chwng uansugwi páithago tamo wngno saui man anw; eba bwskango tamo wngno bebak chini khunju-o saui khna rw thung.

²³ Omoni ulo tamo tamo wngno norok saui khna rw di, abo tẃi hwn khe norokno mwtai hwnwi chwng saui man anw; au, norok kaham phano khlai di eba hamya phano khlai di, abo bai chwng bórinai, tei ma kirinai.

²⁴ Nai di norok mungsa chúk súk ya, tei norokni samungrokbo mungsa-o chúk ya, norokno chongnai bo’-bo selengmasingcha.

²⁵ Ang salgrabaini khoroksano tungphla rw kha, tei salkabai-o tongnai borok phaiwi sók phai kha. Sukhrupjaknai bai sukhrup tẃi khe bo kádulnai, tei twk taknaisa hano kádul tẃi khe bo ha naikolnairokno kádulnai.

²⁶ Sabo cheng phuruni simi a kókno sakhlai phai kha ba, chwng swkang’-no saui man thung hwnwi sabo swkang sa kha ba, chwng bono kubui, sói hwnwi saui mannani? Sakhlainai khoroksa phano kwrwi, auai khlainai khoroksa phano kwrwi, norokni kóktháirokno khnanairokbo, khoroksa phano se kwrwi.

²⁷ Ang swkango omono Siyono sakhlai kha, tei Jerusalemno kothoma kaham pírna bagwi rw kha.

²⁸ Phiya ba ang naharwi naiba, aro khoroksa phano kwrwi, bórokni kókbiti, rwnai abo tẃi khoroksa phano se kwrwi; ang kók sẃng phuru hai hwnwi se sajago.

²⁹ Nai di abórok bebakno chúk ya máng; tei bórokni samungrok bo bebakno mungsa buya, tei chubo chúk ya; bórokni takjak mwtairok bebakno nokbar hai bukcha tei mungsa buya.