JISAIA 34 - Kok Borok (Re-edited) Bible (BSI)

Kaitor bini arirokno sátoknai

¹ O dopharok norok gana-o phaiwi khna phai di; o bororok norok khunju kaichom di: Swngchar tei bini aro tongnai bebakno khna thung; Swngchar tei bini aroni phainairok khna thung.

² Bebak dopharokno’-no Subraiyung belai khe jolijak kha tei bórokni sengkrakrokno belaino thamchi tung kha; bo bórokno pái súk rwui sokomornai tei bórokno tantharnairokni yago yapharwi rwnai.

³ Tei bórokni kwthwirokno khibiui rohorjaknai tei bórokni kwthwi mangrok sogwi mwnamnai tei bórokni thẃi bai hapung hatháirok lom phlainai.

⁴ Tei nokhani bebak sengkrakrok chen bainai phiya nokha yangkhung doljak tẃi khe doljaknai. Bórokni bebak sengkrakrok angur buphangni bwlái tei khwichang buphangni bwlái hoichaui kwraima hai khe kwrai bainai.

⁵ Tamni hwn khe ani seng nokha-o khá kochom kha; nai di abo buj thumnani bagwi ang swraimani a Idom hani bororokni saka-o klainai.

⁶ Subraiyungni seng thẃi bai kochom súk kha, abo pun tei mera bwsarokni pulini buphamni bagwi nukjak li ya. Tamni hwn ba Subraiyung Bosra-o ratharmungrok rathar kha tei Idom ha-o kwbángma ratharjak kha.

⁷ Abórok bai baksa bolongni musukrokbo tei musuk kotorrok bai baksa musuk bwsa kwlwirokbo ratharjaknai; bórokni ha thẃi bai kochom bainai tei buphamni bagwi habo tos gwnang wngnai.

⁸ Tamni hwn ba yagul sunani bagwi Subraiyungni sal kaisa tongo, abo Siyonni wngwi yagul sunani bisi.

⁹ Idomni twisarok alkatra wngwi páinai tei harok khe gwndwk wng bainai tei aroni ha khe khamjak alkatra hai wngnai.

¹⁰ Abo sapung hopung hór thwi glak; mol brúm brúm aroni hoku kasaui’-no tongnai. Kusung kusung bukcha klaiwi tongnai; kusung kusung bini saka tẃi khoroksa phano láisunai tong glak.

¹¹ Tamo khe, toling tei masẃndwirok se aro tong anw tei tákhuk bai tokharok se aro tong anw. Tei bini aroni budukrok kwswngwi lama koró rwnai holongrok burung rúngjak wngnai.

¹² Bórok a hano mung kwrwi hwnwi mung pharnai tei aroni bokhorokrok mungsa phano chúk glak.

¹³ Bini noyung saka-o busurok achainai tei sengkrakrokni bathamo jabrarok kobol bainai tei a ha khe chibuk kotorrokni takhukrokni tongthai wngnai.

¹⁴ Bolongni mal-matarok sẃikurrok bai malainai tei gwdal lainai tei buikhumu gwnang mwtairok bórokni palrokno ringwi tubunai; tei horo berainai phola sitrarok aro lenglathai mannai.

¹⁵ Tákhuk kotorrok aro bothop thumwi bẃtẃi tẃinai tei bẃtẃi khumpaiwi bini bwsarokno kangkhungni saklomo thumsa khlainai; tei aro tolingrokbo bórokni sak sakni mángsongrok bai thumsa wng bainai.

¹⁶ Norok Subraiyungni a bijabo naituk di tei abono pori di; aboni mungsa phano kwma glak; bórok khoroksa phano mángsong kwrwi ton glak. Tamni hwn khe Subraiyung khúk baithang omono dagi kha tei bini Phola bai khe bórokno thum bai kha.

¹⁷ Bo bórokni bagwi pat kar rw kha tei suma buduk bai su-ui bórokno aroni banta khe rw kha, bórok kusung kusung aro’-no tongnai.