JISAIA 31 - Kok Borok (Re-edited) Bible (BSI)

Kaitor Jerusalemno kati rwnai

¹ Chubachu manna hwnwi Ijibo thángnairok bórok le hamya gwja’-no, bórok ba korairok, kwbángma korai malkhungrok tei korai kasanairokni phan kwrago se bwkha bera lai-o, tamo khe bórok Israilni Kwtharsani phaising mwkhang rw ya eba Subraiyungni thani-o le chubamung se san ya gwja.

² Hai phano bo simung gwnang tei hamya tubu-ui phainai, bini kók samarokno kiphilwi na phi glak; bo samung hamya tangnai núkhungrokno kebengwi tei sumsok khlainairokno chubanairokno kebengwi bachanai.

³ Ijipsasong ba haino borok gwja se, Kaitor ya; tei bórokni korairok bahan-bwthẃini se phola ya. Subraiyung bini yak pholok phuru khe bono chubanairok thutainai tei chubajaknairok khe klainai tei bórok bebakno baksa khe komor bainai.

⁴ Tamo khe Subraiyung ano hai hwnwi o kók sa kha, singho eba chasloksa singho mui choprok phuru sokromma hai tei aphuru bono kebengwi mera mwrwknairokno kwbángma ringwi chiri-mokorok khlai phano kiri ya eba bórokni khorang bai kirima chá ya; abo hai kheno sengkrakrokni Subraiyung choba nang lainani bagwi Siyon hathái-o tei bini hachukrogo ongkhorwi phainai.

⁵ Tokrok bothop saka-o birwi tongma hai, abo hai kheno sengkrakrokni Subraiyung Jerusalemno kati rwui tongnai; bo omono kati rwnai tei phiyóknai tei narwgwi tonnai.

⁶ O Israilsarok, norok belai kheno kebengwi chalwi thángmani, bini thani tei uáisa kiphilwi phai di.

⁷ Tamo khe a salo norok bebakno sak sakni rukphaini takjak mwtairokno tei rangchakni takjak mwtairokno khibinai, norokni yak baithang bai sumsokni samung tang kha.

⁸ Tei Asiriya seng bai klai anw, phiya ba borokni seng bai ya; seng bono monok anw, phiya ba bórokni sengo ya; tei bo sengni bwskangni khár anw tei bini siklarokno romwi seleng khati rwjaknai.

⁹ Kirima chaui bini holong láiwi thángnai, bini sengkrak okrarok sundruma chaui yakarwi khárnai hwnwi Subraiyung sa-o, Siyono bini hór tei Jerusalemo khe bini thapa mwchẃngjak.