JISAIA 26 - Kok Borok (Re-edited) Bible (BSI)

Kaitor bini bororokno kwplai wng rwnai

¹ A Salo ha Juda-o o rwchapmung rwchapjaknai: “Chini kamiyung kwrak tongo; bo sak baithangno bini chokdeualrokno kati rwui tono tei mwthangnai chongnai.

² Poito kwrak khe tẃinai tei bujsói khe tẃinai dopharok bisingo hapnani bagwi duglamrok phiyogwi rw di,

³ nini thani bwkha beranairok, nono kwrak khe poito khlaima bagwi nwng bórokno kwchang kwchang khe tono.

⁴ Mol brúmni bagwi Subraiyungno khá bera di, tamni hwn khe bo wng kha SubraiyungKaitor wng kha tong phlainai holong.

⁵ Kuchugo tongnairokno bo hache-o tikhlai kha, kung chuknai kamiyungrokno hache-o tikhlai te tikhlai te, hadlwi-o se khiklai rw-o.

⁶ Yakung bai khe káduljaknai, bigrarok kádulnai tei biyalo tongnairokni yapri beranai.”

⁷ Borok sóini lama khe milik; nwng borok sóirokni lamano khe srai-srai khlai-o.

⁸ O Subraiyung, chwng nini bujsóino tei nini muitu khlaijaknai nini mungno muitu khlaijaknai mungno muitu khlaina chini bwkhani muchungma.

⁹ Horo khe ang nono khátango ani bwkha-o kuthuk khe nono naitugo. Ha-o buj thum phuru khe bórok bujsói tamono hwn srwngo.

¹⁰ Nwng borok hamyarokno nai khe, bujsóino srwng ya klai-o; borok kahamrokni ha-o bo bórok cha ya khe buj khlai-o. Bórok Subraiyungni phanno sak bokna nai ya.

¹¹ O Subraiyung, nini yak kuchugo tisajak, hai phano bórok abono nuk ya, nwng nini bororok hamjakmano nugwi ma lachi thung, nono kebengnairokno hór bai khe sokomorwi pái thung.

¹² O Subraiyung nwng chwngno tong kwchang rwnai, chini tangma samungrokno nwng yachak kha.

¹³ O Subraiyung chini Kaitor, nwng bai baksa kubun mwtairokbo chwngno tẃithero, hai phano nini mungno simi se chwng yachago.

¹⁴ Bórok kwthwi, bórok haino hai kwthang wng glak; bórok kholopjak wng kha, bórok bacha phi glak kha, tamni hwn khe nwng bórokno majra rwui sokomor kha. Bórokni bebak mukumurokno kwma rwui pái kha.

¹⁵ phiya ba o Subraiyung, nwng dophano er rw kha, dopharokno báng rw kha, nwng chẃngsa rwjak kha; nwng hani arino kuar khlai kha.

¹⁶ O Subraiyung digi-sigi-o bórok nono naituk lai kha, bororokno swprak phuru-o, bórok nini thani suri lai kha.

¹⁷ Bwrwi sak kengnani bagwi ok saui kap tẃi khe Subraiyungni thani chwng abo hai khe ma kap kha.

¹⁸ Chwng ogo bwsa tẃijak, mwranjak, abuktwi phaidrop buma hai. Hai phano hani bagwi kaham mungsa phano rwui man li ya. ha saka-o tongnairokbo klai tháng li ya.

¹⁹ Norokni kwthwirok tháng phinai, bórokni mang bo bacha phinai. O hadlwi-o tongnairok, sicha di, tongthogwi rwchap di. Nini pantwi chati hai, abo hai kheno kwthwirokni ha-o nini chatino klai rw di.

Buj thumma tei songcha phima

²⁰ O ani bororok phai bai di norokni noksingo habwi dugar soui tongwi lai di; jolima hamya sak kisa huijagwi tong lai gra di.

²¹ Tamni hwn ba nai di, ha saka-o tongnairokni samung hamyani majra rwna bagwi Subraiyung bini tongthaini nongkhorwi phainai. Tei ha bini aro thẃi khiklaimano phunugui rwnai tei butharnairokno hui ton glak kha.