JISAIA 23 - Kok Borok (Re-edited) Bible (BSI)

Phoinikiano tẃiwi kók samani

¹ Turni Kókno Samani. O Tarsisni rung kotor choknairok norok khá khamwi kap lai di, tamni hwn ba norokni ha Tur swbaijak kha; borok kwrwi kha, rung kotorrokni bathak thaibo tei nokrokbo kwrwi kha! O kók Saipras hani phaiwi sók phai kha.

² Twi rukungo tongnairok, o Sidonni pai-phal khlainairok; norokni tẃitunrok twijlang láiwi tháng kha,

³ twijlang ayang naro ha Ijibo wngma manwirokno pai-phalni bagwi tei bebak dopharok bai pai thani phal thani kwrwngna bagwi nai-o. Nil twima rukungo wngma bwthái bumukrok kiphilwi tubu phiro.

⁴ O ha Sidon, lachi si di, twijlang hai hwnwi sa-o, twijlangni thongla kwrak nono hai hwnwi sa-o, “Ang okbo ma sa ya, mabo ma bá ya, ang sajlasongroknobo uáisabo ma tor rw ya sajwksongroknobo sikla ma sók rw ya.”

⁵ Ha Turno sokomorjak kha hwnwi kók sók phai khe, Ijipsarok bwkha ma nangnai.

⁶ Tarsisno láiwi tháng si di; o twijlang rukungo tongnairok khá kham lai di!

⁷ Omo da sal kwdwkma swkangni simi’-no tongma a kuchugo kasajak kamiyung wng kha? Omo da, hakchalo tubu-ui kami kha rwnai?

⁸ Kamiyungrokni bere motok Turno kebengwi omo hai khe chapnai sabo aro pai-phal wngnairok tẃiphangrok máng se tei bepar thwngnairok ha saka-o bórom khlaijaknairok máng wng ya da?

⁹ Sengkrakrokni Subraiyung omono chong kha, chẃngsachani bagwi kung chukmarokno dera rwnai tei ha sakani bebak bórom khlaijagwi tongnairokno lachimasingcha khlainai.

¹⁰ Norokni ha Nil twima kochok tẃi khe kochok kha; o Tarsisni sajwkrok norok kochok kha, aro tei kwcha rwui mannai kwrwi kha.

¹¹ Bo twijlangni saka-o yak pholok kha. Bo haroknobo jangri bai kha; Kananni sokomorna bagwi dagiui rwjak.

¹² Hakhe bo hai hwnwi sa kha, “Nwng tei tongthogwi man glak, nwng Sidonni sajwk siklano sátok kha; norok Saipraso khárwi tháng phano, kwchang kwchang khe tongwi man glak.”

¹³ Kolodiarokni hano naisik di! Omorokno o bororok; abo Asiriyarok ya. Bórok Turno bolongni mal-matarokni bagwi khlai-o. Bórok se naichomma garing kuchukno segwi na-o, chokdeualrokno swbai pái-o tei kamiyungno swbai sokomorwi rw-o.

¹⁴ O Tarsisni twijlango rungtor choknairok, norok khá beramani tongkhor kwrak kamiyung báiwi bukcha khe klaijak.

¹⁵ A salo Tur le nokha bisi snichi jora pogwi tongjaknai, habugra kusungsani umor swk kolok. Nokha bisi sni chini ulo khe Tur kami abo baliknai hai hwnwi rwchapma hai wngnai:

¹⁶ “O muitu khujak ya baliknaijwk, chongpreng naui kamiyung phaising tháng di, nwng muitu wngjakna tẃi khe, khorang kwtẃi bai khe kwbángma rwchap mung rwchap di.”

¹⁷ Nokha bisi snichini ulo khe Subraiyung Turo phaisanai, Tur khe ha gwnangwi thángwi uaijaui bepar thwngwi tongnai,

¹⁸ bini pai-phal khlainairok tei bini solok nanairok bebakno Subraini thani sakno yapharnai, abo khatiuibo tonjak glak tei haino rúngwi bo tonjak glak tamo khe Subraini thani tongnairokno se a rangrok bai bórokni nangmani chámungrok tei kanmungrok paiwi rwjaknai.