JISAIA 21 - Kok Borok (Re-edited) Bible (BSI)

Babilon báinano phunukjakmani

¹ Omo wng kha twijlangni haphar bukchano tẃi kók sajakmani, hasing haphar kirimasingcha hani Negebo nokbar kotor sibwi tongo.

² Ang belai kirimasingcha mungsa wngmano phunukjak kha; abo wng kha tanthar-súthar khlainairok tanthar-súthar khlai tongo tei sokomornairok khe sokomorwi tongo. O Elam nwng kasaui tháng di, o Media gerebwi ton di; bórokni a sátokmano tong khochor rwmano Kaitor mwthaknai.

³ Aboni bagwi ani bwkha kirimani bai kupulung wng kha; ani sak samani bwrwirok sak kengna phuru bohok sama hai khe sa kha; ang khna ya wngna bagwi bomwi tong kha. Nuk ya wngnani bagwi ang mogwi tong kha.

⁴ Ani bwkha-o uansugo, kirimani bai ang ma mogo; sal phainanino ang naisingwi tongmani abo ani bagwi kirimung se wng si-o.

⁵ Bórok chámung khalai tiyar khlai kha tei bórok bojaknai rírokno bo lai kha, bórok chá lai kha nung lai kha. Achomsa bórok hai hwnwi dagijak kha, “Bacha bai di, o tẃiphangrok norokni phuirokno thok phul bai di.”

⁶ Tamni hwn khe Subraiyung ano hai hwnwi sa kha: “Tháng di khoroksa mwrwknaino tonwi di, hakhe bo nukmarokno sakhlai di hwnwi sa di.

⁷ Bo bojro khe korai kasajakrokno, koraichirka kasajakrokno tei mangingang kasajakrokno nuk khe bwkha rwui khna thung, khir khir khe khna thung.”

⁸ Hakhe a nuknai chirigwi hai hwnwi sa kha, “O Subraiyung, ang naichomjaknai garing kuchugo sapung’-no bachaui tongo tei ang tonjakma-o hor hopungno tongo.

⁹ Nai di korai kasanai bororok phai kha, bojro khe korai kasanairok!” Hakhe bo hai hwnwi sa phi kha, “Babilon bái kha, Babilon bái kha; bini takjak mwtai tatalrokno bebakno bo ha-o báiwi klai kha.”

¹⁰ O ani borok Israilrok, norok gom pherejak tẃi khe pherejak kha, tamo khe tabuk ang sengkrakrokni Subraiyung, Israilni Kaitorni thani khnamano norokno sakhlai-o.

Idomno tẃiwi kók samani

¹¹ Omo ha Dumani bagwi sajakmani kók. Borok khoroksa ano Seirni ringhorwi hai hwnwi sa-o, “Horo mwrwknaisa, hor ba tei bwswk tongna kho? Hor ba tei bwswk tong kho?”

¹² Mwrwknaisa hai hwnwi sa kha, “Aina nai kha, hai phano hor bo phai phinai. Nwng sẃngna hwn khe sẃngwi nai di; kiphilwi phai sẃng phai phi di.”

Arobno tẃiwi kók samani

¹³ Omo ha Arabiani bagwi sajakmani kók: O ha Arabiani bolong kuthuk Dedansa bodol khe himgurung tongnairok nini aro nok tangnai.

¹⁴ O Tema ha-o tongnairok bini thani phaiwi twi kangjakrokno khan phai di tei norok ok khuiwi phainai riphujirokno chámung rw di.

¹⁵ Tamni hwn khe bórok sengni khár kha tei tanna hwnwi tikhlaijak sengni yakni khár kha tei kokna bagwi thonjak badukhungni khár kha, kirimasingcha chobani yakni khár kha.

¹⁶ Aboni bagwi Subraiyung ano hai hwnwi sa kha, “Nokha bisani bisingo’-no Kedarni bebak chẃngsacha páiwi thángnai.

¹⁷ Badukhung koknairok, phan gwnang Kedarni bwsarok báng ya wngwi thángnai hwnwi Subraiyung Israilni Kaitor sa-o.”