JISAIA 19 - Kok Borok (Re-edited) Bible (BSI)

Kaitor ha Ijipno sátoknai

¹ Ha Ijipno tẃiwi kók sajakmani; nai di Subraiyung doui kobonjak chumui-o kasaui Ijibo phainai; hakhe Ijipni takjak mwtairok bini bwskango ma kwlwinai tei Ijipni bororokni bwkha twi chaui thángnai.

² Phiya ang Ijipsarok bai Ijipsarokno nang lai rwnai. Khoroksa tei khoroksa takhuk bai nang lai rwnai, nok ari bai nok ari nang lainai, kamiyung bai kamiyung nang lainai, ha bai ha nang lainai.

³ Ijipsarokni bwkhani phan páiwi bukcha wngwi thángnai tei bórok chap laimarokno ang cha ya khlai rwnai. Bórok takjak mwtairokni thani, danda-baji kwrwngrokni thani tei phola hamyarokni thani tei swkalrokni thani thángwi kókbiti sẃngwi lainai.

⁴ Ang Ijipsarokno bwkha kwrak bugrani yago yapharnai; thamchi kutung habugrarok se bórokno naikini khlainai, hwnwi Subrai, sengkrakrokni Subraiyung sa-o.

⁵ Hakhe Nil twimani twi ranwi thángnai. Twima ransajak wngnai.

⁶ Bini twisarok harpek máng wngnai tei Ijip hani Nil twimani twisarok kwmanai tei ranwi thángnai. Jabrarok, budukrok sogwi páinai.

⁷ Nil twima rukungni yang yang bukcha wng suknai tei twi rukungo mungsabo mui-thái wng glak ransaui tháng bainai. Nil twima rukungo káima bebakno kobon rwui tlangjaknai tei tong glak.

⁸ Á romnairok bebakno kap lainai tei Nil twima-o bosoi karnairok bórok kengai lai anw tei aro chei sarnairok khá kham lai anw.

⁹ Lilonni rí taknairok khá mithikjaknai tei khul kuphurni rí taknai bo bwkha mithiknai.

¹⁰ Bini bebak sungchanairok báiwi klainai; tei bebak mula tangnairok khá báijaknai.

¹¹ Joanni tẃiphangrok belaino butua gwja; Ijipni simung gwnangrok kókbiti rwmani abo butua kók máng se. Norok bahai khe Pharaono, “Ang le simung gwnangni bwsa se, ang le kwcham habugrani bwsa khorok sa hwnwi saui man?” hwnwi sa lai.

¹² Hakhe buko norokni a siyan gwnang bororok? Hakhe bórok norokno sa thung tei Subraiyung ha Ijipni bagwi tamo chongwi tong kha, saui man rw thung.

¹³ Joanni tẃiphangrok butua wng bai kha tei Mophni tẃiphangrok bandijak kha tei tẃiphangrok bebago’-no dopharokno kókbiti cha ya rw kha.

¹⁴ Subraiyung bórokno lama koró rwnai pholano rw kha tei bórok Ijipni bororokno dera rw kha, chuak kephek kwbama hai khe kwba kwba rw kha.

¹⁵ Ijipni bagwi mungsa phano tong glak. Bini bokhorok, khitung mungsa tong glak, khoroksabo chubaui man glak.

Ijip Subraino khulumnai

¹⁶ A salo sengkrakrokni Subraiyung bini yak phologwi bórokno majra rwna nai phuru khe Ijipni bororok bwrwirok hai wngnai tei kirimani bai kwlwibranai.

¹⁷ Bórok ha Judano belaino kirijaknai, bórokni bumung bai se kirijaknai. Tamni hwn khe sengkrakrokni Subraiyung Ijiprokno omo hai khlainai hwnwi chapjak.

¹⁸ Omo hai sal sók phaiwi tongo, Ijiprokni kamiyung khungba Hibrurokni kók bai kók sa lainai. Bororok sengkrakrokni Subraiyungni mung bai khe swmai tang lainai. Kamiyungrokni bere khungsa, “Salni kamiyung” hwnwi mung pharjaknai.

¹⁹ A salo ha Ijipni kwcharo Subraiyungni háyá kaisa songchajaknai tei bini hani ari-o khe Subraiyungni bagwi holongni thongla káijaknai.

²⁰ Omono Ijipsarokno muitu khlai rwuinai sengkrakrokni Subraiyung bórok bai tongo. Hakhe bórok tong kesebo tong khe tei chubachuni bagwi koi khe bo khoroksa swkno rohorwi bórokni arini yakni kati rwnai tei phiyóknai.

²¹ Subraiyung baithang Ijipsarokni thani sakno sini rwnai; hakhe Ijipsarok Subraiyungno sininai tei ratharmung ratharnai tei sógwi yapharnai phiya Subraiyungni thani swmai tang laiwi samung khlai lainai.

²² Ijipno Subraiyung butharnai, bubo butharnai habo ham rwnai tei bórok Subraiyungni thani kiphilwi phainai tei bo bórokni koimano khnanai tei ham rwnai.

²³ A salo Ijipni simi Asiriya jora lahar kotor kaisa wngnai hakhe Asiriyasong Ijibo phainai tei Ijipsongbo Asiriya-o phainai hakhe Ijiprok bai Asiriyasong pal khe khulum lainai.

²⁴ Aphuru khe Israil, Ijip tei Asiriya bai thansa wng lainai tei bórok bebak hani bagwi hamari wngnai.

²⁵ Kwplaisa Subraiyung bórokno hai hwnwi sa-o, “Ani Ijipni bororok tei Asiriya ani yak bai snamjak tei Israil ani chongjak borok.”