JISAIA 14 - Kok Borok (Re-edited) Bible (BSI)

Romwi tlangjaknairok kiphilmani

¹ Subraiyung Jakobno khairoknai tei Israilrokno tei uáisa saiwi na phinai. Tei bórokni sakni ha-o achuk rw phinai; buini bororok bórok bai kwtha phainai tei Jakobni bosong bai thansa wng lainai.

² Bororok bórokno naharwi bórokni ha-o tubu-ui phainai; tei Israil bosongrok Subraiyungni ha-o bórokno seleng tei selengjwk snamwi tonnai, bórok bórokno salsa mechenwi yago chobwi tonnairokno bórok se mechenwi yago chobwi tonnai tei bórokno sátoknairokno se tabuk tẃithernai.

Kwthwirokni ha-o Babilonni habugra

³ Subraiyung norokno aswk sajagwi tongmani tei uphla-káphlani tei samung kwrak tangnani bagwi bedokjak tongmarokni lengla rw phuru khe,

⁴ norok Babilonni habugrano thamchi kasa rwui hai hwnwi sa lai anw: “Khairokma kwrwi habugra chenwi klai kha! Bo tei khoroksano phano sátogwi man glak kha!

⁵ Subraiyung borok hamyarokni lathano swbai kha, ha naikolphangrokni raidangno swbai pái kha.

⁶ Bo thamchi bai bororokno thak yaui yamusung rw-o, bo dopharokno jolima bai khe, khá sitra bai sátogo.

⁷ Tabuk bebak ha gwnangwi’-no kwchang kwchang tei siring siring wng kha, bebakno tongthogwi rwchapmung rwchap lai kha.

⁸ Saiprasrok nono nugwi tongthok jago tei Lebanonni sidar buphangrok hai hwnwi sa lai-o, ‘Nwng khiklaijak kha ba, tabuk chwngno rana bagwi phainairok kwrwi kha.”

⁹ Nwng phaiwi sók phai khe morkeni hakhor kuthukbo nwng bai malaina bagwi káphra kha, o hani tẃiphang tongnairok lamsokna bagwi bebakno bacha lai kha; dopharokni habugra tongnairok bórok bebakno bórokni achukthayungni bacha lai kha.

¹⁰ Bórok bebakno nono ringwi hai hwnwi sa lai anw: ‘Nwngbo chwng hai’-no kebel wng kha! Nwngbo chwng haino wng kha!’

¹¹ Nini bebak kung chukmarok tei nini chongprengni khorang kwthwirokni ha-o mwthakjagwi pái kha; yóngrok nini thuyamo kupulung tei nini miyali-o yóngrok kupulung.

¹² “O Aitorma, Aichukni sajla! nwng chuknohani bahai khe klai kha! Nwng se salsa dopharokno mechenwi tongmani tei tabuk khe nwng ha-o khiklai rwjak kha.

¹³ Nwng bwkha bising bising hai hwnwi sa-o, ‘Ang chuknoha-o kasanai, ang Kaitorni athukirirokni slái kuchugo ani achukthayungno songchanai; ang hakchal salgrabai-o kuthum laima hachugo achuknai;

¹⁴ ang chumuirokni slái teibo kuchugo kasanai, ang Kwplai Kaitor bai baksa wngnai.

¹⁵ Phiya ba nwng kwthwirokni tongthai-o tikhlaijak kha, a hakhorni kuthugo tikhlaijak kha.’

¹⁶ Nono nuknairok nono mwlang chaui naisik lai anw, tei nono tẃiwi kók sa lai anw; ‘Omo a borok ya da, o hano kwlwibra rwnai tei bugrarokni harokno jangrinai?

¹⁷ Omo a borok ya da, kamiyungrokno sokomornai tei o hano hasingni haphar khlainai? Omo a borok ya da, bini alongo chopjagwi tongnairokno phiyók ya khe tonnai tei nogo rohor ya wngnai?’

¹⁸ Dopharokni bebak habugrarok bórom gwnang khe sak sakni mangkhoro rokoui tong bai kha;

¹⁹ phiya ba nwng khe chokhrai thángnai bwsa hai khe nini mangkhorni hakchalo khitarjak kha, nwng a seng bai tanwi hakhor kuthugo tei holongo khiklaijaknai kwthwirok bai kholopjak; tei nwng yakung bai káphrumjak mang kwthwi hai wng kha.

²⁰ Nwng bórok bai baksa phobjak glak; tamni hwn khe nwng nini sakni hano swbaiwi pái kha, nwng nini sakni bororokno buthar kha. “Samung sitra tangnai bosongrokni bumung tei ta khujak thung!

²¹ Bórokni chuchusong cha ya khlaima bagwi, norok bórokni bwsarokno butharna bagwi tiyar khlai di, wng ya khe bórok bachaui hano bórokni sakni khlai anw tei hano bórokni kamiyungrok bai supung anw.”

Kaitor Babilonno swbai sukhrupnai

²² “Ang bórokno kebengwi bachanai,” hwnwi sengkrakrokni Subraiyung sa-o. Tei “Babilonni aroni bumungno tei yógwi tong rwknai bwsa bwtwirokni bosongno kwma rwui páinai.

²³ Ang omono masẃndwikhor khlainai tei jalai khlainai tei ang abono uáphra bai pharwi sokomornai” hwnwi sengkrakrokni Subraiyung sa-o.

Kaitor Asiriyasongno sokomornai

²⁴ Sengkrakrokni Subraiyung swmai tangwi hai hwnwi sa kha; “Ang khá-o chapmani, abo haino wngnai; tei ang khlaina hwnwi hwnma haino tongnai,

²⁵ tamni hwn khe ani ha-o Asiriyasongno swbaiwi khibinai, ani hachugo bono yakung bai kádulnai; tei abo hai khe bórokni aroni horbak norjaknai tei bangorani bokcha yakaknai.

²⁶ Bebak hano tẃiwi omo hai khe chapjak kha; tei bebak dopharokni saka-o yak pholokjak tongo.

²⁷ Tamni hwn khe sengkrakrokni Subraiyungni chapma tongo, sabo omono sláiwi mannai? Phiya bo bini yakno pholok kha, sabo abono mwthaknai?”

Kaitor Philistiasongno sokomornai

²⁸ Habugra Ahas thwimani o bisi-o’no o kókrok sók phai-o.

²⁹ O Philistiasasong, norokno swprakmani a raidang bái kha hwnwi ta tongthok di; tamni hwn khe a chibukni yaphangni chibuk masa ongkhornai tei bini aroni khe bis gwnang birnai chibuk ongkhornai.

³⁰ Bigrani bwsa okra ma chá anw; tei biyalo tongnairok kirima kwrwi khe thu-ui tong lainai. Ang nini yarwngno asari bai khe butharnai tei yógwi tong rwknairokno tanwi butharnai.

³¹ O duglam kotor kap di; o kamiyung kap di; o Philistiani bebak bororok kap lai-kok lai wng di, norok pái súk kha; tamni hwn ba salgrabaini hoku phaiwi tongo tei bebak sengkrakrok’-no tiyar wng laijak.

³² Dophani kók tunnairokno tamo hwnwi uphilwi sanai? “Subraiyung Siyono thong kwrak songcha kha tei bini sátokjak bororok aro’-no khorok bomthai man kha.”