JISAIA 13 - Kok Borok (Re-edited) Bible (BSI)

Kaitor Babilonno sátok-pitok khlainai

¹ Babilonno tẃiwi Amojni bwsla Jisaia nukmani kókrok.

² Norok hathái bukcha saka-o bana tisa di, bórokno khorang kotor khe chirikhókhor di; yak jangrihor di, bórokno borok kahamrokni duglam tẃi habwi manna bagwi bórokno yak narwi phunuk hór di.

³ Ang ani borok kwtharrokno dagi kha tei ang jolimano khlaiwi pái rwnani bagwi ani phan gwnangrokno tei tongthogwi chirikhógwi tongnairokno ringjak kha.

⁴ Khna di, hachuk saka-o kwbángma bororokni hohom-dodom khorang hai! Bebak hani bororok tei dopharok thansa wng laiwi kutuk laima khorang khna di. Sengkrakrokni Subraiyung chobani bagwi sengkrakrokno phrwngwi tongo.

⁵ Bórok hakchal hani phaiwi tongo, bórok nokharokni páithakni phaiwi tongo. Subraiyung tei bini thamchini sengrok bebak hano sokomornani bagwi phai tongo.

⁶ Norok chirikhógwi kap lai di, tamni hwn ba, Subraiyungni sal sampha kha; tamni hwn khe kwplaisani aroni sokomorma sók phainai.

⁷ Aboni bagwi bebakni yakrok kebel wng bainai tei bebak bororokni bwkha twi chanai.

⁸ Bórok belai khe kirijak bainai bórok sátokjakma bai ma kengai lainai; bórok bwrwirok bána phuru ok sajakma hai kengai lainai; bórok chabwi man yani bagwi khoroksa tei khoroksani mwkhang bwkhak naisik laiwi tong lainai; tei bórokni mwkhang hórjlai hai wngnai.

⁹ Nai di, Subraiyungni sal phaiwi tongo; khairokma kwrwi khe, belai jolima gwnang tei hór hai thamchi tungwi sók phainai; ha sakani sumsok gwnangrokno sokomorna bagwi phainai.

¹⁰ Tamni hwn khe aphuru nokhani athukirirok tei athukiri buthuprok chẃng glak, sal kasa phuru’-obo mwnakmano tongnai tei talbo pir glak.

¹¹ Ang hano bini hamyani bagwi majra rwnai, borok hamyarokni samung sitrani bagwi bórokno majra rwnai. Ang gwdna kwrak kung chuknairokni kung chukmano pái súk rwnai tei bumuk cha yarokni thamchi tẃinairokno ha-o khiklai rwnai.

¹² Aphuru ang bororokno rangchak kahamni slái phano manthok ya khlainai tei Ophirni rangchakni slái phano manthok ya khlainai.

¹³ Aboni bagwi sengkrakrokni Subraiyungni jolimani salo ang nokhano kwlwi rwnai, ha jangrijak bainai.

¹⁴ Aboni bagwi riphrikjaknai mwswi hai tei mwrwknai kwrwi merarok hai bebak bororok sak sakni borokni thani kiphil lai anw tei sak sakni ha phaising khár bai anw.

¹⁵ Naitugwi manjaknai borok bo koslu bai suplajaknai tei romjaknairokno khe seng bai tanwi butharjaknai.

¹⁶ Bórokni mokol bwskango’-no bórokni kwlwi bwsarokno búpháiwi butharjaknai, bórokni nokrok swbaijak bainai tei bórokni bihiksongrok romphrejak bainai.

¹⁷ Nai di ang bórokno kebengwi Medesongno joli rwnai, bórok rukphainobo sak nangjak ya tei rangchakbo hamjak ya.

¹⁸ Bórokni badukhung romnairok siklarokno buthar bainai; tei bórok ogo tẃima bwtháirokno khairok glak, eba bórok chwrairokno nugwi khá sa glak.

¹⁹ Tei Babilon hani bebak chẃngsacharok, Kolodiarokni aswk naithokma tei kung chukmarok Kaitor bórokno sokomor phuru khe Sodom tei Gomora wngma hai wngnai.

²⁰ Bini aro tei tongnairok tong glak, eba kusung-kusungni bagwi aro bororok tong glak; Arabsasongbo aro ríni nok tang phai glak, khoroksa mera mwrwknairokbo aro bórokni mera bodolno lengla rw phai glak.

²¹ Phiya ba aro bolongni mal-matarok thu phai anw tei sokromwi pungnai mal-matarok bai kupulung wngnai, aro takhukrok bothop thumnai tei bolongni punrok aro kherbai rw lai anw.

²² Bórokni a nukuchugo gegumarok pung lai anw tei nok khibijago chibuk kotorrok tong lainai; bini a salrokno tei pholokjak glak kha.