JISAIA 12 - Kok Borok (Re-edited) Bible (BSI)

Hambaini rwchapmung

¹ Nwng a salo hai hwnwi sa anw, “O Subraiyung ang nono hambai rwnai; tamni hwn khe nwng ano joliui tongmani, phiya ba nini jolima kwrwi kha, hakhe nwng ano khakchang rw kha.

² “Nai di, Kaitor se ani mwthangnaisa; ang bini thani khá beranai tei kiri glak; tamni hwn ba Subraiyung ani Kaitor wng kha, bo se ani phan tei ani rwchapmung tei bo ani mwthangnai wng kha.”

³ Aboni bagwi norok tongthogwi mwthangnai twikhorni twi khók anw,

⁴ tei a salo norok hai hwnwi sa lai anw, “Subraiyungno hambai rw di, bini bumungno ring di; dopharokni bisingo bini bebak samungrokno saui man rw di, bini bumungno kuchuk kuk hwnwi auai khlai di.”

⁵ “Subraiyungno lobwi rwchap di, tamni hwn ba bo chẃngsachani samung khlai kha, ha sakani bebago saui man rwjak thung.

⁶ O Siyono tongnairok! Khorang kotor khe chirik di; tei tongthogwi rwchap di; tamni hwn ba, o kotor, Israilni kwthar kuk, bo norokni bisingo tongo.”