JISAIA 11 - Kok Borok (Re-edited) Bible (BSI)

Kwchang kwchang ha

¹ Jisaini tanjak yaphangni kaisa yarwng ongkhorwi phai anw, tei bini yarwngni bedek loksaui phai anw.

² Tei Subraiyungni phola bini saka-o tongnai, simung tei rwngmungni phola, kók kaham sachrunai tei phanni phola, uansukmung phola tei Subraiyungno kirinani phola bini sago tongnai.

³ Hakhe Subraiyungno kirimano bo chajagwi tongthokjaknai; bo mokol nukmasing bai buj thum glak, eba khunju-o khnamasing bai kók sachu-ui rw glak.

⁴ Phiya ba bo bigrarokno sói khe buj thumnai, tei ha sakani bebak koinenerokno sói khe kók sachu-ui rwnai; tei bini búkhúkni raidang bai hano swpraknai, tei búkhúkni hama bai bo borok hamyarokno buthar bainai.

⁵ Sói kubui bini bwchangni changduk, tei poitono bini bwchangni rí khama.

⁶ Hakhe mwsá sampari mera bwsa bai thansa khe tong lainai, tei geguma bai punsa bwsa thansa khe thu lainai, tei musuk bwsa, singho tei kuphung mal-matarok thansa kheno tong lainai, tei chwrai bwsa se bórokno mwrwknai.

⁷ Musuk bai gong kwrẃngsa khe chá lai anw; bórokni bwsarok thansa khe thu lai anw. Tei singho musuk hai khe chwkap chá anw,

⁸ abuktwi chánai chwrai bwsa chibukni hakhor saka-o thwng anw, abuktwi kak ya chwrai chibuk hakhoro yak bai khonok anw.

⁹ A borok bebak ani hathái kwtharni kwrẃngsa-o phano dukhu rw glak eba sokomor lai glak, tamni hwn khe twijlang twi bai kupulung wngma hai’-no, Subraiyungni simung bai khe o ha kupulung wngnai.

Tlangjaknairok kiphil anw

¹⁰ A salo Jisaini yarwng bebak dopharokni thani bana hai wngwi bachanai. Bebak dopharok bono naituknai tei bini tongthai chẃngsacha wngnai.

¹¹ A salo Subraiyung bini tong rwknai bororokno phiyóknani bagwi tei uáisa yak rwnai, tamo khe, Asiriyani, Ijipni, Pathrosni, Ithiopiani, Elamni, Sinarni, Hamatni tei twijlang kwcharni hatháirokni nogo kiphilwi tubu phinai.

¹² Tei bo dopharokni bagwi mari kaisa rw anw tei ha gwnangwi pisa-piring wngwi tongjak Israilni bai Judani riphujirokno kwrẃngsa khe thumsa khlainai.

¹³ Israil Judano músúma ton glak phiya Juda tei Israilni ari wngwi tong glak.

¹⁴ Tamo khe bórok salthángbai-o philistiarokni bangora-o achomsa swpragwinai tei thansa khe salkabaini bororokno tanthar-súthar khlai bainai. Bórok Idom tei Moabni saka-o yak rwnai tei Ammonsarok bórokni kók khnaui tongnai.

¹⁵ Subraiyung Ijipni twijlangni bwslaino sokomornai; twima saka tẃi bo nokbar kwran sibcha rwui yak narhornai tei bono swpragwi lama kaisni khlainai tei bororokno lama kwran tẃi khe lái rwnai.

¹⁶ Tei Ijip hani Israilrok ongkhorwi phaima jora-o bórokni bagwi lama wngma hai’-no, bini karwi klangjaknai bororokni bagwi Asiriyani simi twngsa lama kotor wngnai.