JISAIA 10 - Kok Borok (Re-edited) Bible (BSI)

¹ Kerong cha yano sakhlainairok tei a cha yano bororokno lengpra rwna bagwi swinairok bati nang thung.

² Abo hai kheno nwng biyalo klaijakrokno bujsói man ya khlai-o tei bórokni manthai seple-o. Abo hai kheno nwng randijwkrokni manwi-khwnwi sego tei ma-pha kwrwirokni manwi khwnwi monogo!

³ Hakhe cha yani yagul suma salo tei sokomorma salo nwng tamo khlainai? Abo hakchalni phai-o. Nwng saboni thani chubamungni bagwi khárwi thángnai? Norokni rang-rírokno buro klangnai?

⁴ Mungsa phano tong rwk glak, phiya ba bórok alongo chopjakrokni bisingo báiwi klai anw eba butharjakrokni bisingo klai anw. Tamni hwn khe bini thamchi holi ya, phiya ba bini yak tabuk bo pholokjak tong kho.

Asiriyani habugra wng kha Kaitorni kol hai

⁵ O Asiriya! ani thamchini raidang, ani yago tẃima thamchini raidang.

⁶ Ang bono Kaitorno tẃi ya dopharokno kebengwi rohornai tei ang jolimani bororokno kebengwi bono daginai, klaijak manwirokno khochanani tei manwi-khwnwirok segwi nana bagwi tei lamani harpek hai khe bórokno kádulna bagwi rohoro.

⁷ Phiya ba bini muchungmani le abo hai ya, eba bini bwkha-o bo abo tẃirok uansuk ya; tamo khe bini khá-o sokomor suknani tei dopha kwbángmano’-no khaknani muchungma tongo.

⁸ Tamni hwn khe bo hai hwnwi sa-o, “Ani samung tholnairok ba bebakno habugra máng ya diba?

⁹ Kalno ba Karkamis hai ya diba? Hamat ba Arpad hai ya diba? Samaria ba Damaskos hai ya diba?

¹⁰ Jerusalem tei Samariani slái kwbáng kuk a takjak mwtairokni harogo ani yak sógwi kha;

¹¹ Samaria tei bini takjak mwtairokno khlaima hai khe ang Jerusalemno tei bini takjak mwtairokno abo hai khlai glak diba?”

¹² Subraiyung Siyon hathái-o tei Jerusalemo bini bebak samungrok pái súk khe ulo bo Asiriyani habugrani kung chugui kók kotor samani tei bini bwkha-o khámaimarokni bagwi majra rwnai.

¹³ Tamni hwn khe bo hai hwnwi sa kha, “Ani yakni phan tei ani simung bai ang o samung khlai kha, tamni hwn khe ang simung gwnang borok; ang bororokni bebak arirokno nor bai kha tei bórokni khatijak rang rírok sekpro bai kha; tei phan gwnang hai khe ang bugra cháui tongnairokno mechen bai kha.

¹⁴ Hakhe dopharokni rang-rírok ani yapha-o tok bothoprok hai wng kha; bororok khibijak toktẃirokno thumma hai khe ang bebak harokno thumsa khlai kha; tei kaisabo bwkrang ninang rw li ya, eba búkhúk khua li ya, eba pungnai kwrwi kha.”

¹⁵ Rua ba philnaini saka-o da sakno har ba, Korat ba buphang ranaini bwskango sakno kotor hwnwi da gosi? Raidang tisanairokno da raidang ba harno ba eba raidang le buphangni ya abo tẃi manwino ha da har ba!

¹⁶ Aboni bagwi Subrai, sengkrakrokni Subraiyung bini bwkha kotor choba nangnairokni saka-o kaisa bahan sok rwnai hamya rohornai; tei bini chẃngsachani khamma-o hórjlai hai khe hór sunu-ui rwjaknai.

¹⁷ Kaitor, Israilni pohor hór wngnai. Israilni kwthar Kaitor hórjlai wngnai hakhe abo salsani bisingo’-no atakereng tei busulwngrokno kham rwui páinai.

¹⁸ Bini bolongni tei tos gwnang hani chẃngsachano Subraiyung sokomornai, bini mang bai phola kwnwino’-no sokomornai tei abo khoroksa borok hamya klai khe bel tẃi khe wngnai.

¹⁹ Hakhe bini bolongni tong rwkma buphangrok aswk kisa wngnai khoroksa chwrai phano se abono lekhaui mannai.

Kisicha kiphil phir anw

²⁰ A salo Israilrokni karjagwi tong rwknairok tei Jakob bosongni kwthang tong rwknairok bórokno butharnairokno tei bwkha bera lai glak, phiya ba Israilrokni kwthar Subraiyungni thani se kubui khe khá bera suknai.

²¹ Karjagwi tong rwknairok kiphilwi phai anw, Jakobni yógwi tong rwknairok phankrak Kaitorni thani kiphilwi phainai.

²² Phiya nini Israil bororok twijlang rukungni hasingsa bai baksa báng phano bórok karjagwi tong rwknairok simi se kiphilwi phainai. Sokomorna bagwi dagijak, abo sói kubui bai kupulung wngnai

²³ tamo khe Subrai, sengkrakrokni Subraiyung, bebak hano tei sokomornai ha saka-o tongma bebakno pái rwsuknani hwnwi dagijak.

Subraiyung Asiriyano majra rwnai

²⁴ Aboni bagwi Subrai, sengkrakrokni Subraiyung hai hwnwi sa-o, “O Siyono ani tongnai ani bororok, Ijipsarok norokno kebengwi raidang tisama hai khe Asiriyarok norokno swprakna bagwi raidang tisa phano ta kiri di.

²⁵ Tamo khe tei srapsa lái tháng khe ani thamchi páiwi thángnai tei ani a thamchi bórokno sokomorna bagwi se bedogwi rwjaknai.

²⁶ Hakhe sengkrakrokni Subraiyung Orebni holongo Midiansongno butharmani hai khe bórokno raidang tisaui swpraknai tei Ijipni twijlang saka tẃi lama khlai phuru khlaima hai kheno ani phanno phunuknai.

²⁷ A salo nini bangora sakani bórokni horbak thángwi páinai, nini bangorani bórokni horbak swbaijak páinai. Bo Rimmonni kasaui tháng kha.”

Seknairok achomsa choprokmani

²⁸ Bo Ai-o phaiwi sók phai kha, Migron tẃi láiwi tháng kha, bórok Mikmaso bórokni buthrirok ton lai kha;

²⁹ bórok harung lama láiwi phai kha, Geba-o horsa tongbu kha. Ramani bororok kirijak lai kha, Solni kamiyung Gibea-o tongnairok bebakno khár bai kha.

³⁰ O Galimni sajwksong! nwng sotonwi chiri khók di! O Laisa khna di! bono sa di, o bwkha báijak Anathot!

³¹ Madmenani bororok tháng bai kha, Gebimo tongnairok yókna bagwi khár bai kha.

³² Bo tini Nobo bathak anw, bo Siyonni sajwkni hachuk Jerusalemni hachugo bini yakung jangrinai.

³³ Nai di, Subrai sengkrakrokni Subraiyung kirimasingcha khe bedekrokno swbai bainai; abo bai belai kuchuk kuchukrok hache rwjaknai, kuchuk theng thengrok bo hache khlaijak bainai.

³⁴ Bo bolongni kubung buphangrokno rua bai tanwi khibinai tei Lebanonni bebak buphang kuchuk kuchukrok khiklaijak bainai.