JISAIA 1 - Kok Borok (Re-edited) Bible (BSI)

¹ Amojni bwsla Jisaiani nukmani; bo Judani habugra Ujia, Jotham, Ahas tei Hejekiani jora-o Juda tei Jerusalemno tẃiwi nukmani.

Kaitor bini borokno khoraimani

² O nokharok khna di, o ha khunju kaichom di; tamni hwn khe Subraiyung sa kha: “Ang bwsarokno tor rw kha, lok rw kha, tamo khe bórok ano kebengwi bacha lai kha.

³ Musuk sakni nokphangno sini-o tei koraichirka bini bubagra buro bórokno ada chá rw sini-o; phiya ba ani Israil bororok khe saui se man ya.”

⁴ Nwng le gaijalahado, o sumsok gwnang dopha, cha ya-chúk ya bai máng hilikjak bororok, samung hamya tangnairokni bosongrok, hamya bai kubuljakrokni bwsarok! Nwng Subraiyungno khibi kha, Israilrokni Kwtharsano norok thamchi tung rwui joli rw kha, bini aroni uklok bwkhak uslu-ui tháng bai kha.

⁵ Norok tei tamni bujagwi tong sinai? Tamni bagwi norok kebeng máng tongnai? Norokni bokhorok gwnangwi kwsa máng tei bwkharok bebak hamya máng.

⁶ Yakung yaphachwlaini simi bokhorok jora tẃi kwrẃngsa phano bahan kaham kwrwi kha, tamo khe bahan pekhakjak tei kwsa, thẃi yorjak kwsa; abo sújak ya tei rí baibo khapungjak ya tei kwsani bithibo phuljak ya.

⁷ Norokni ha ahaino bukcha khe klaijak, norokni kamiyungrok hór bai sókchajak; norokni bwskango’-no norokni hano buini hani bororok monogwi pái kha; abo phatarsarok bai sekprojagwi bukcha khlaijak kha.

⁸ Hakhe angur bwlwngni kainok, dorompai bwlwngni lenglama nok eba gerebwi tonjak kamiyung khibijakma hai khe Siyonni sajwkbo abo hai kheno khibijak kha.

⁹ Tumungno Sengkrakrokni Subraiyung chini bagwi kisicha swk narwk ya hwn khe, chwngbo Sodom tei Gomora haino wng kha mun.

¹⁰ Sodomni ha naikolnairok Subraiyungni kóktháino khna di! Gomorani bororok chini Kaitorni phrwngma raidano khunju kai di.

¹¹ “Norokni kwbángma ratharmarok ani ba tamo? hwnwi Subraiyung sa-o; sógwi yapharma mera bai kuphung muini buphamrok ano kwbángma’-no yapharjak kha; ang musuk eba mera, eba punni thẃirok bai bwkha phur li ya.

¹² Norok ani bwskango phai phuru norokni yakni omono sabo san? Ani nokhla tei ta ká phai si di.

¹³ Yapharmung tubumarokbo chúk ya’-no; norokni satrai sókmarokno ang selengo. Tal nuksonni, sabat salni tei kuthumna bagwi sumsokrok sago tẃi ringmarokno ang soiwi man ya.

¹⁴ Norokni tal nuksonni tei chongjak terrokno ang naislero; omorok ani thani poja se wng si-o, omorokno ruju-ui ang leng kha.

¹⁵ “Norok yak pholoksa khe ang norokni aroni mwkhang huiwi tonnai; norok ani thani kwbángma suri phano ang khna glak; norokni yak thẃi bai kupulung.

¹⁶ Norok sak sakno súcha di, sap sutra wng di; ani mokol bwskangni norokni samung chayarokno khibi di. Samung hamya tangma yakar di.

¹⁷ Samung kaham khlaina srwng di; bujsóino naituk di, sátokjakrokno phiyók di, ma-pha kwrwirokno kati rw di, randijwkni bagwi kók sa di.”

¹⁸ Phai di chwng tabuk thansa khe kók sa lai anw, hwnwi Subraiyung sa-o: Norokni bebak sumsokrok kwchak wng phano kothor kwsap hai kuphur wngnai; abo belai kwchak phano abo khul hai kuphur wngnai.

¹⁹ Norok khá phurwi kók khnaui tong kha hwn khe, norok hani kaham kaham bwthái ma chá anw.

²⁰ Phiya norok nor khe tei kebeng khe norok seng bai butharjak bainai hwnwi Subraiyung khúk baithang sa-o.

Sumsok gwnang kamiyung

²¹ Kwthar kamiyung bahai khe sak phalnai wng kha! bo sói buj thumnai tongmani. Bini bisingo sói-kubui tongmani, phiya ba tabuk khe borok butharnairok máng se tongo.

²² Norokni rukphai sor khi bai kha, norokni angur bwtwi twi bai daljak.

²³ Norokni ha naikolnairok kók nayarok tei sikhokrokni mángsong; bórok bebakno rang chána nai-o tei hili manna nai lai-o. Bórok ma-pha kwrwirokni bagwi kók sachru ya, phiyók ya, randijwkrokni nangmarokno sak nang ya.

²⁴ Aboni bagwi kwplaisa, Israilrokni phankrak, sengkrakrokni Subraiyung sa-o; “Ang ani arirokni saka-o ani jolimano lukhlai sinai tei ani arirokno yagul sunai.

²⁵ Ang norokno kebengwi ani yak rwnai; ang norokni simbukno swkaknai tei norokni bisingni bebak hamyarokno norwi khibinai.

²⁶ Ang norokno swkango tongma hai tei uáisa norokni buj thumnairokno tei kókbiti sanairokno rw phinai. Hakhe Jerusalem bujsóini tei kók narwknai kamiyung hwnwi ringjaknai.”

²⁷ Siyon bujsói bai phiyókjaknai, buj thumma bai tei bini bororok kubui bai bwkha kiphilwi phainai.

²⁸ Phiya kók nayarok bai sumsok khlainairok kwnwnwi’-no swbaijaknai tei Subraiyungno khibinai bororok komornai.

²⁹ Tamni hwn khe norokni tongthok sukma uk buphangno tẃiwi ma lachinai tei norok sak chongmani tháiblwngno tẃiwi lachi rwjaknai.

³⁰ Norok bwlái mwranjak uk buphang tei twi kwrwi ransajak tháiblwng hai wngnai.

³¹ Hopreng rwcharwi chwkap kham tẃi khe phan gwnangrok bórokni samung hamyarok bai sokomorjaknai, hakhe khoroksa phano a komormano mwthagwi man glak.