JIRIMIA 9 - Kok Borok (Re-edited) Bible (BSI)

¹ Ani bokhorok twikhereng wngma te tei ani mokol twimuk wng khe! Ani bororok butharjakma bagwi hopung sapung kap kha mun.

² Hasing panthoro lama tẃi himnairokni nograirokni nok tongma hai phano nok tongma te ani bororokno klangwi aro thángwi tongwi man kha mun! Tamni hwn ba bórok bebakno uaijanai máng. Tei kók narwk ya bodolrok máng.

³ Bórok bórokni bwslai’-no badukhung hai khe thono: Abo tatal sanai badukhung. O ha saka-o bórok kubui-o kwrak wngwi man ya, tamni hwn ba bórok sumsokni saka sumsok khlai-o. Bórok ano si bo sini ya, hwnwi Subraiyung sa-o.

⁴ Norok bebakno sakni kichingrok bai hus wng di tei sakni takhukrokno poito ta tháng di: Tamni hwn khe bebak takhukrokno bandi lai-o tei hamya hwnwi sa lai-o,

⁵ kiching kichingno bandi-o, tei khoroksa phano kók kubui sa li ya, bórok bórokni bwslaino tatal sanani phrwng kha: Bórok hamya sitra khlai kha tei sak sakno lengpro rw kha.

⁶ Norok bandi laimani bisingo se tongo. Nini bororok bandimani bai kupulung, bandimani bagwi ano sinina nai li ya gwja, hwnwi Subraiyung sa-o.

⁷ Aboni bagwi sengkrakrokni Subraiyung hai hwnwi sa-o: Ang tabuk sakinai tei amjogwi nainai, ang ani bororokno tamo khlaiwi man nai grana?

⁸ Bórokni bwslai khe butharnai chakhla se, khúk tẃi bandinani kók nongkhoro. Bórok bebakno bórokni nok arirok bai kók kwtẃi sa-o, phiya ba khá bisingo le hamya khlaina bagwi chabwi tongo.

⁹ Subraiyung hai hwnwi sa-o, Omorokni bagwi ang bórokno majra rw glak diba? Omo hairokni bagwi o dopharokno ang yagul su glak diba?

¹⁰ Hachukrokni bagwi swlwgwi kap lai di, haino khlai tongjak sularokni bagwi khá kham di, khoroksa phano o lama tẃi him lai li ya tei musuk-tokrokni khorang khna li ya; toksa-toktẃirok khárwi tháng bai kha, mal-matarok nongkhorwi tháng bai kha.

¹¹ Ang Jerusalemno kwbai burung khlainai, siyalrokni tongthai khlainai, tei Judani kamiyungno aswk khe swbainai aro bororok tei tongwi man glak.

¹² Omono buchiui mannai sinai sabo tong? Subraiyungni khukni kókno khnaui sabo ba sakhlai mannai? Tamni bagwi harok báiwi báikhrubwi tháng lang? Abo hasinglwng hai wngwi tháng kha hakhe khoroksa phano omo tẃi him li ya.

¹³ Hakhe Subraiyung hai hwnwi sa kha; tamni hwn ba bórok ang bórokni bagwi rwmani ani kerongno khibi kha tei ani kókbo khna li ya, phiya abo bai khe hibo him li ya,

¹⁴ tamo khe buj tháisa khe sakni muchung tẃi tongwi Bal mwtaino mon lai kha, abo bórokni chuchusong phrwngmani tẃi khlai lai kha.

¹⁵ Aboni bagwi Sengkrakrokni Subraiyung Israilni Kaitor hai hwnwi sa-o: Nai di Ang o bororokno chámung kwkha chá rwnai tei bis dalokjak twi khan rwnai.

¹⁶ Ang bórokno juda-juda dopharokni bisingo pisa-piring khe rohornai, bórok eba bórokni chuchusong phano sini yarokni thani rohornai bórok komor súgwi tháng ya sak bórokni thani tantharnai sengno rohornai.

Jerusalemni bororok chubachu sanmani

¹⁷ sengkrakrokni Subraiyung hai hwnwi sa-o; “Tamo wngwi tong kha abono uansuk di! Khá nangwi kapnai bwrwirokno phaina bagwi ring di, kwrwng bwrwirokno phaina bagwi ringhor di,”

¹⁸ Bórok dakti phaiwi chini bagwi kapsimang kapmung cheng thung hakhe chini mokolni muktwi thop-thop khe klainai, tei chini muktwi kupulung khe yornai.

¹⁹ Siyono hai hwnwi swlwgwi kapmani khorang khna-o; “Bahai khe chwng pái bai lang! chwng kubui’-no lachi súk kha, tamni hwn ba chwng hano yakar kha, tamni hwn ba bórok chini tongtharrokno swbai rw bai kha.”

²⁰ O bwrwimasong Subraiyung samani kók tei bini búkhúkni kók nini khunju bai khe khna di; nini sajwksongno kapsimang kapna phrwng di, tei nok arini bwrwirokno bahai khe kapnai phrwng di.

²¹ “Chwrairokno lama-o butharnani tei chwla siklarokno lamprarogo butharna bagwi butharnai chini tailam jora phai sók phai kha, abo chini noyungrogo hap phai kha.”

²² “Subraiyung omono sa di hwnwi sa-o: ‘Bórokni mang kwthwi klai tongnai hapharo musuk bikhi klai tongma hai, mai ranaisani uklogo mai anja tongmani hai tei kebo bórokno khochanai tong glak.’ ”

²³ Subraiyung hai hwnwi sa-o; “Sinai bororok bórokni simano tẃiwi kung ta chuk thung, phan gwnang borok phan ta phunuk thung, rang gwnang bini rangni bagwi kung ta chuk thung,

²⁴ phiya ba kung chuknai borok bórok ang’-no Subraiyung hwnwi sini thung tei saui man thung; ang sói khe hamjago, tei swngcharo bujsói tei kubui bai khe hamjago, tamni hwn ba ang abórokno hamjago, Subraiyung omono sa-o.”

²⁵ “Nai di, Subraiyung hai hwnwi sa-o: a salrok kubui’-no phaiwi tongo, aphuru sakur rajak yarok—

²⁶ Ijip, Juda, Idom, Ammonni bwsarok, Moabno tei hasing hapharo tongnairok bokhorokni babainwini khwnaino ranairokno sátoknai; tamni hwn ba a dopharok sakur rajak ya, phiya Israilrok khe bwkhani sakur rajak ya gwja.”