JIRIMIA 8 - Kok Borok (Re-edited) Bible (BSI)

¹ A jora-o Subraiyung hai hwnwi sa-o, Judani bubagrarokni bekreng, bini tẃiphangrokni bekreng, ochairokni bekreng, diyarirokni bekreng tei Jerusalemni lukurokni bekreng bórokni mangkhorni norjak bainai;

² bórok bórokni hamjakmani tei monmani tei rwkthar laimani bórok kaham hamya sẃng laimani tei khulum laimani a nokhani sal-tal tei bebak athukirirokni bwskango pháng-pháng khe phehelwi tonjaknai. Abórok thubo thumjak glak tei phobo phobjak glak, manwi hamya rúng tẃi khe ha-o burung wngwi tongnai.

³ Ang o tong rwknai dopha hamyarokno pisa-piring khe rohor thani bórok kwthang tongnani slái thwinano se ma hamjak kuknai, hwnwi sengkrakrokni Subraiyung sa-o.

Sumsok tei dosa manmani

⁴ Nwng bórokno sa di: Subraiyung hai hwnwi sa-o, bórok klai khe tei uáisa bacha phi glak da? Phiya khoroksa lama koróui tháng khe tei uáisa kiphil phiya diba?

⁵ Tamni bagwi Jerusalemni o bororok ba kiphil súk li ya khe uslu-ui tháng lai lang? Bórok tatalno kwrak khe romwi tong lai-o, kiphilna soi lai li ya.

⁶ Bórok sói kókno sa ya gwja, ang abono khunju kaiwi’-no khna kha, samung hamya khlaimani bwkha kiphilwi khoroksa phano “Ang tamo khlaijak lang de?” hwnwi sanai kwrwi. Korairok choba-o khachigwi tháng tẃi bebakno sak-sakni lama tẃi se him lai tong si-o.

⁷ Nokhani bogarokbo bini jorano si-o; tei tokthu tei toksa chilangi tei boga kotorrokbo bórokni phainani jorano si-o; phiya ani o bororok khe Subraiyungni dagimungrokno si ya gwja.

⁸ Norok bahai khe, “Chwng sinairok máng tei Subraiyungni Kerong chini thani tongo,” hwnwi sa lai? Nai di, swinairokni tatal swikong omono tatal khlaiwi swi kha.

⁹ Sinairok lachi rwjaknai, bórok kwmanai tei tlangjaknai; tamni hwn khe bórok Subraiyungni kókno khibi kha, tamo elem bórokni thani tong sinai?

¹⁰ Aboni bagwi ang bórokni bihiksongno buino rwnai tei bórokni hapharno segwi nanairokno rwnai, tamni hwn khe kotoini simi borok kotor jora bebakno cha ya lama tẃi ajina nai lai-o; diyarirokni simi ochairok bebakno tatal bai máng tang lai-o.

¹¹ Bórok ani bororokni kwsano sak nang ya khe nai-o; tei se hai hwnwi sa-o, “Khakchang di, khakchang di” aile aro khakchangma se kwrwi.

¹² Bórok lachimasingcha khe samung tang kha; bórok selengmasingcha samung tang kha; hai phano se bórok lachi ya. Bórok mwkhang bomna rwng ya, aboni bagwino bórok klainairok bai baksa khe klainai, ang bórokno majra rw phuru khe khitarwi rohornai hwnwi Subraiyung sa-o.

¹³ Ang kubui’-no bórokno monogwi páinai hwnwi Subraiyung sa-o. Angur buphango tháisabo bwthái tong glak, khwichang buphangobo bwthái tong glak, bwláirok mwran bainai; ang bórokno rwmani manwirok bórokni aroni thángwi pái bainai.

¹⁴ Tamo wngwi chwng oro haino achugwi tong lai? Thansa khe thumjak di! Phai di chwng babek’-no a kamiyung kwrago thángwi thwiwi pái lai anw! Subraiyung chini Kaitor chwngno thwi bai thung hwnwi hwn kha tei chwngno bis nung thung hwnwi rw kha. Tamni hwn ba chwng bini thani sumsok khlai kha.

¹⁵ Chwng tong kwchang se namani, phiya kaham mungsa bo wng li ya; ham rwnani jora-o ham rwmano karwi kirimasingcha se sók phai si-o.

¹⁶ Danni simi bórokni korairokni hamani khorang khna horo; bórokni morok laimani khorang bai ha gwnangwi kwlwi kha. Bórok chini hano tei aro tongmani bebakno tei kamiyungo tongnai bebak nono monokna bagwi phai lai kha.

¹⁷ “Nai di, ang norokni thani chibukrokno phiyógwi rohoro, o chibukrokno kók khna rwui man glak omorok norokno suknai,” hwnwi, Subraiyung sa-o.

Bini borokni bagwi Jirimia bwkha khamjakmani

¹⁸ Ani tongthokma kwrwi kha. Ani bwkha khamjak se.

¹⁹ Ani bororok kap laimano khna bai di, hakchal ha-o tongnairok: “Subraiyung ba tamo Siyono ya diba? Siyonni bubagraba tamo aro kwrwi kha da?” Hakhe Subraiyung bórokni bugra hai hwnwi sa kha, “Takjak mwtairok bai tei buini chúk ya mwtairok bai tamo wngwi ano joli rw lai?”

²⁰ “Mai-khul ramani mol bo pái laha, sachlangni jora pái kha, hai phano chwng mw se mwthangjak li ya.”

²¹ Ani basra bororok dukhu manmani bagwi ani khá-o nang kha, ang khá khamo tei uanaui katswi bwkha bái kha.

²² Giliado ba tamo bithi kwrwi da? Aro ba sak nainai kwrwi kha da? Hakhe tamni bagwi ani bororokni sak ham phi li ya wng lang?