JIRIMIA 7 - Kok Borok (Re-edited) Bible (BSI)

Jirimia noktharo kók pírmani

¹ Subraiyungni kók Jirimiani thani hai hwnwi sók phai kha:

² “Subraiyungni nokthar duglamo bachaui di tei aro o kókno hai hwnwi sakhlai di, Judani bebak bororok Subraiyungno surina hwnwi o duglamrok tẃi khe hap phainairok, ‘Subraiyung samani kókno khna di.

³ Sengkrakrokni Subraiyung, Israilrokni Kaitor hai hwnwi sa-o: Norokni lamarokno tei norokni samung tangmarokno slái bai di, hakhe ang norok bai tong anw.

⁴ ‘Omo wng kha Subraiyungni nokthar, Subraiyungni nokthar, Subraiyungni nokthar,’ hwnwi bandina bagwi kók tatal samarokno poito ta khlai di.

⁵ “Tumungno norok kubui khe norokni lamarokno tei norokni tangmarokno slái khe tei norok khoroksa tei khoroksano sói khe buj tẃi lai khe,

⁶ tumungno norok phatarni phainai bororokno sátok ya khe ma-pha kwrwi tei randijwk eba oro borok basrarokni thẃi klai rw ya khe tei norok sakni hamya wng ya tẃi buini mwtairokni uklogo ta tháng di.

⁷ Hakhe ang swkangni norokni chuchusongno kusung kusungni bagwi rwmani o ha-o norok bai baksa tongnai.

⁸ Nai di norok oro mungsa chúk ya bandinai kókrokno poito khlai tongo.

⁹ Norok khok lai-o, borok buthar lai-o, chwla-bwrwi uaija lai-o, tatal khe swmai tang lai-o, Bal mwtaini thani ratharwi barok lai-o tei norok sini ya nuk ya mwtairokno khulum lai-o,

¹⁰ phiya ani mung bai ringjago nok bwskango phai bacha laiwi hai hwnwi sa lai tiro, “Chwng kaham’-no!” Norok omo hai hamya máng khlai tháng khe ang norokno mwthang anw hwnwi da uansuk?

¹¹ O ani mung bai kwrwngjak nok ba tamo sikhokrokni bothop da wng sinai? Phiya ba ang naichomwi’-no tongo! hwnwi Subraiyung sakhlai-o.

¹² Tabuk thángwi nai di ang swkang tongnani bagwi chongmani a Silo-o tei ani Israil bororokni samung hamya khlaimani bagwi ang tamo khlai kha naisik di.

¹³ Norok omo hairok khlai tongo hwnwi Subraiyung sakhlai kha, ang norokno khúk thak yaui sa kha, hai phano norok khna lai li ya; ang norokno ring kha hai phano norok khunju kai li ya gwja.

¹⁴ Aboni bagwino ang tabuk ani mung bai ringjaknai núkhungno norok bwkha bera laiwi tongmano ang norokno tei norokni chuchusongno rwma hano Silono khlaima hai’-no khlainai.

¹⁵ Ang norokni jaiti-masarokno tei Ephraimni bwsarokno rwkhlai rohorma hai kheno norokno ani mokol bwskangni rwkhlai rohornai.

Lukurok kók khna ya wngmani

¹⁶ Nwng o bororokni bagwi ta suri di, bórokni wngwi ta kap di, ta sachru di, tei ani thani ta koi di, tamni hwn khe nini samano khna glak.

¹⁷ Judani kamiyungrogo tei Jerusalemni lamarogo bórok tamo khlai tong lai nwng nuk ya da?

¹⁸ Chwrairok bol thum lai-o, buphasong hór phnango tei bwrwirok khe nokhani mwtaini auan takna bagwi moida sabul lai-o; tei ano joli rwna bagwi kubun mwtairokni thani nungjaknai lukhlai lai-o.

¹⁹ Bórok omo ano da joli rw ba? hwnwi Subraiyung sa-o, omo bórok kiching bórok tei bórok sak sakno dukhu rwma ya diba?

²⁰ Aboni bagwi Subraiyung Kaitor hai hwnwi sa-o: Ani thamchi tei ani jolima oro lukhlaijaknai, bororokni saka-o, yabrwirokni saka-o, hapharni buphang tei ha sakani bwtháirogo klai sinai: Omo khamnai tei thwi phlai glak.

²¹ Sengkrakrokni Subraiyung Israilni Kaitor hai hwnwi sa-o, nini ratharwi yapharma bai teibo sógwi yapharmano dal di tei bahanno chá di.

²² Ang norokni chuchusongno Ijip hani tikhlai tubu phuru a salo ang bórokno sógwi yapharma bai ratharwi yapharma kókno sabo sa ya dabo dagi ya.

²³ Ang o bórokno hai hwnwi dagi kha, “Ang sama kókno khna di tei ang nini Kaitor wngnai tei norok ani borok wngnai: Ang dagimani lama tẃi simi him di, abo bai norokni kaham wngnai.”

²⁴ Hai phano se bórok ani kók khna li ya tei khunjubo kan li ya gwja, phiya bórokni hamya muchungma bai bórok bórokni sak uansuk tẃi him lai kha tei bórok bwskang nahar yaui uklok se nahar lai kuk si-o.

²⁵ Norokni chuchusong ha Ijipni nongkhorwi phaima a salni simi ang cho yaui ani bebak seleng diyarirokno cho yaui bórokni thani rohor kha,

²⁶ hai phano se bórok ani kók khna li ya, eba khá rw li ya, phiya bórok teibo se bórok gwdna kwrak khlai si-o. Bórok bórokni chuchusongni slái teibo hamya khlai si-o.

²⁷ Nwng bórokno o kókrokno bórokno sa anw, hai phano bórok nini kókno khna glak. Nwng bórokno ringnai hai phano bórok nono uphilwi mungsa sa glak.

²⁸ Aboni bagwi nwng bórokno sa di: O dopharokno Subraiyung bórokni Kaitorni kókno khna yarok tei khoraimano yachak yarok: Kubui kwmaui pái kha: Bórokni khukchwi-o kubui kwrwi kha.

Hinom harungo sumsok kupulung samung

²⁹ Bwkhnai rasu di tei abono khibiui rw di: Hathái bukcha-o thángwi khá khamwi di, Subraiyung norokno khibi kha tei tabukni pirini bosongno Subraiyung joliui khibiui rw kha.

³⁰ Tamni hwn khe Judani bororok ani mokol bwskango samung hamya tang kha, hwnwi Subraiyung sa-o; bórok bórokni selengmasingchano ani nogo ton kha tei kwtharno dera rw kha.

³¹ Bórok Tophet harungo háyá snam lai kha, abo wng kha Hinomni bwsajlani harung, bórokni sajwk tei sajlasongno hóro sóknani bagwi ang dabo dagi ya tei abo ani khá-o bo ka ya.

³² Aboni bagwi hus wng di omo hai sal phai tongo hwnwi, Subraiyung sa-o: Aphuru khoroksa phano omono Tophet hwn glak, eba Hinomni sajlani harungbo hwn glak, ratharmani harung se hwnjaknai tei, tamni hwn ba bórok Topheto abo kupulung wng ya sakno kwthwi se phob lainai.

³³ O borokrokni mang kwthwirok nokhani toksa-toktẃirokni tei ha sakani yabrwirokni chámung wngnai tei khoroksa phano abórokno rwknai tong glak.

³⁴ Hakhe ang tongthok-cháthokni khorangno mwthaknai, hamjwk kwtalni khorang tei chamari kwtalni khorangrok o Judani kamiyungo tei Jerusalemni lamarokni mwthaknai, tamni hwn khe o ha bukcha wngnai.