JIRIMIA 51 - Kok Borok (Re-edited) Bible (BSI)

Babilon tei uáisa buj thumjakmani

¹ Subraiyung hai hwnwi sa-o; “Nai di ang Babilonno kebengwi tei Kolodia-o tongnairokno kebengwi sokomornai nokbar sip rw anw;

² hakhe ang Babilono chekainairokno rw hor anw, bórok abono chekai anw tei bórok bini hano bukcha khlai anw, tamo khe bórok tong kesepni jora-o kitingwi bono kebengwi bachanai.

³ Badukhung tẃinai badukhung thonwi ta man slap thung tei chobani kamchwlwirok chumwi ta manslap thung. Bini siklarokno ta phiyók di, bini sengkrakrokno khoroksa phano karjak ya tẃi khe sokomor bai di.

⁴ Bórok Kolodiani ha-o butharwi khiklai tonjak bainai tei laharrogo thwi buya thang buya khe klaiwi tong bainai.

⁵ Tamni hwn khe Israil bai Judarok bórokni Kaitor sengkrakrokni Subraiyung bai khibijak ya kho; tamo khe Kolodiasongni ha, Israilni kwtharni bwskango cha ya bai máng kupulung.

⁶ Norok Babilonni khár di, norok bebakno sak sakno thwinani yakni yók di! Bini sumsokni bagwi norok majra ta manjak di, tamni hwn khe omo wng kha Subraiyungni yagul sunani jora, bini tangma tẃi’-no bo bono su-ui rw anw.

⁷ Babilon wng kha Subraiyungni yakni kaisa rangchakni khuri tongmani, bebak hano phek rw kha; dopharok bini chuakno nung bai kha, aboni bagwi dopharok kobor cha kha.

⁸ Babilon achomsa klai kha tei bai klai kha; bini bagwi kap di! Bini sakhrupma o phulnani bagwi bithi na di; abo bai bo hamwi phano mano.

⁹ Chwng Babilonno ha phano ham rw kha mun, ‘Phiya ba bo ham li ya. Bono yakar si di, chwng bebakno sak sakni ha-o tháng lai si anw; tamo khe bono buj thummani abo chuknoha jora tẃi sógwi kha tei nokha jora sógwi kha.’ ”

¹⁰ Subraiyung chwngno bini sakni borok hwnwi phunuk kha; “Phai di, ‘Chwng Siyono thángwi Subraiyung chini Kaitorni samungrokno sakhlai anw.’ ”

¹¹ “Chakhlarokno hul di! yago phuirok na di! Subraiyung Mediani habugrarokno tungphla rw kha, tamni hwn khe bini uansukmani wng kha Babilonno sokomor suknani.” Tamni hwn khe, omo wng kha, Subraiyung yagul sumani tei bini noktharni bagwi yagul sumani.

¹² Norok Babilonni chokdeualno naharwi kaisa mari tisa di; khom-khom khe naimwthang ton di; huijagwi swprakna bagwi sengkrakno tiyar khlai di. Tamni hwn khe, Subraiyung Babilono tongnairokni bagwi sama hai kheno chabo chap kha tabo tang kha.

¹³ O twisa twijlang rukungo tongnai rang-rí gwnangrok norokni páithakni mol sók phai kha. Norokni langmani buduk rasujak kha.

¹⁴ Sengkrakrokni Subraiyung bo sakphang swmai tang kha; ang sói sóino nono kúkthora bodol hai khe borok bai kupulung khlai anw tei abórok nini saka-o kwplai hwnwi chirikhók lai anw.

Kaitorno lobwi rwchapmani

¹⁵ Bo sakni phan bai hano snam kha, sakni simung bai’-no swngcharno songcha kha, tei bini simung bai’-no nokhano phuar kha.

¹⁶ Bo khúk per kheno uatwi nokha-o gurumsa-o. Bo’-se nokha-o chumui tisa-o; bo uatwini bagwi phirang kogo, tei bo bini nokbarno sipsa rw-o. bo hayung páithak narni simi siyari lop rw-o, bo uatwi ua rwnani bagwi nokha philik rw-o, tei bo bini rwbamni simi nokbar sip rw-o.

¹⁷ Bebak borok’-no butua wng bai kha, tei rwngmung kwrwi gwja; bebak rangchakni manwi taknairok bórokni takjak mwtai bai lachimung man kha; tamni hwn ba bini takjak mwtairok tatal máng, tei abórokni langma kwrwi.

¹⁸ Abórok bebak chúk ya, mwlang cha rwna samung simi se; bórokni majra manna jora-o bórok komor bainai.

¹⁹ Jakobni bosongni banta-o klainairok, bórok abo hai ya, tamni hwn ba bo wng kha bebakno snamnaisa, tei Israil wng kha bini bagwi khatijak bosong; bini bumung wng kha sengkrakrokni Subraiyung.

Subraiyungni mutari

²⁰ “Nwng ani mukur tei chobani da-seng: Ang dopharokno nini bising tẃi swbaiwi phindrik phandrak khlainai; nono tẃiwi se ang harokno swbainai;

²¹ Nono tẃiwi se ang korai tei korai kasanairokno phindrik phandrak khe sukhrupnai; nini bising tẃi khe korai malkhungrokno tei malkhungo kanairokno swbai bainai.

²² nono tẃiwi se ang chwlano tei bwrwino swbainai; nini tẃi khe ang chakrarokno tei siklarokno swbainai; nini tẃi khe chwla siklarokno tei bwrwi siklarokno swbainai.

²³ Nono tẃiwi se ang mera mwrwknai bai mera bodolrokno phindrik phandrak khe swbai bainai; nono tẃiwi se ang haba khlainairokno tei bini bodolrokno phindrik phandrak khe swbainai; tei nono tẃiwi se ang tangdagiphangrokno tei tei samungni tẃiphang bokhorokrokno phindrik phandrak khe swbai bainai.

Babilonno sátokjakmani

²⁴ “Borok Siyono hamya khlaimani bagwi ang Babilon tei Kolodiani bororokno yagul sumano norok mokol baithang nuk anw,” hwnwi Subraiyung sa-o,

²⁵ Nai di, ang nono kebengjak, o sokomornai hathái, hwnwi Subraiyung sa-o, abo bebak hayungno sokomornai; ang nono kebengwi nini saka-o yak pholoknai tei nono holong haruak tẃi khe goirok rwui rohornai tei nono hachuk kwkham snamnai.

²⁶ Nini aroni holong tháisa phano noksuni bagwi tei thonglani bagwi bo najak glak, phiya ba nwng khe khibijak bukcha wngnai hwnwi ang Subraiyung sa-o.

²⁷ “Ha saka-o marini bagwi thong kaisa songcha di, dopharokni thani Totro tam di; dopharokno bo bai choba nang laina bagwi tiyar khlai di. Bono kebengwi choba khlaina bagwi Araratni harok, Minni tei Askenasno dagi di; bono swprakna bagwi sengkrak bokhorok khoroksano chong di, kukrok hai doui mannai korairokno tubu di.

²⁸ Bono kebengwi bo bai choba khlaina bagwi dopharokno, Medeni habugrarokno, bórokni bokhorokrokno tei samungni barja berjakrokno tei bebak bini yago tongma harokno chobani bagwi tiyar khlai di.

²⁹ Ha kwlwibrajak tei bwkha nangjagwi tongo, tamni hwn khe Babilon hano sokomorna bagwi tei aro borok tongnai kwrwi khlainani bagwi Subraiyung uansuk tẃi’-no khlai tongo.

³⁰ Babilonni choba nang lainai Sengkrakrok choba mwthak kha, bórok bórokni nok kwrago’-no tong lai kha; bórokni phan bai kha, bórok bwrwirok bai baksa wng bai kha; bórokni tongthairok bebak sókjak máng tei duglam berepmarok bo swbaijak kha.

³¹ Khoroksa tei khoroksani thani malaina bagwi khabrumo tei khoroksa tẃitun tei khoroksa tẃitun bai malaina bagwi, Babilonni habugrano bini kamiyung kitingwi’-no bebak bui bai naharjak kha hwnwi sanani bagwi khabrum laijak;

³² sengkrakrokni tongkhor sekjak kha. Kasuma berarokno hór bai sókjak kha tei chobani sengkrakrok bebakno kirima cha laijak.

³³ Phiya ba sengkrakrokni Subraiyung, Israilni Kaitor hai hwnwi sa-o: Babilonni sajwk wng kha bwthái bwchlwi nakma jorani nokhla hai; hai phano aboni kisa ulo khe tei bini bagwi ranani jora sók phainai.”

³⁴ Babilonni habugra Nebukadrejar ano monok kha, ano sukhrup kha; bo ano twk bukcha hai khlai kha, bo ano chibuk kotor monok tẃi khe monok kha; bo ani chá kothok chámung bai sakni bohok supung kha; tei bo ano sebwi khibi kha.

³⁵ Ano tei ani jaiti-masarokno sátokmarok haino, “Babilonni saka-o klai thung.” Siyono tongnairok hai hwnwi sa thung, “Kolodiani saka-o ani thẃini bati klai thung, hwnwi Jerusalem sa thung!”

Subraiyung Israilno chubamani

³⁶ Aboni bagwi Subraiyung hai hwnwi sa-o; nai di ang nini bagwi kók sachrunai tei nini wngwi yagul su anw. Ang bini twijlangno tei twimukrokno ransa rwui rwnai;

³⁷ babilon báikhrupjak burung wngnai tei pheuangrokni tongthai wngnai tei kirimasingcha mwnwimung wngnai, aro bororok tong glak.

³⁸ Bórok singho hai thansa khe sokrom lai anw; bórok singho bwsarok hai khe pung lai anw.

³⁹ Bórok ok khui khe ang bórokni bagwi chámung nungmung rw anw; bórok khá si ya wng ya sak tei mol brúm brúmni bagwi muktrwi tháng ya sak phek rw anw tei sichaui man phi glak hwnwi Subraiyung sa-o.

⁴⁰ Ang bórokno mera bwsarokno, pun tei punjuarokno ratharna bagwi tlangma hai khe ratharnairokni thani tikhlaiwi tubu anw.

Babilonni kwpal

⁴¹ Babilon bahai khe bui bai segwi naharjak kha, hayungo bebakni slái lobjak súgwi tongnai bahai khe mechenjak kha! Dopharokni thani Babilon bahai khe kirimasingcha wng kha!

⁴² Babilon twijlang bai lom kha tei twini aphal bai koboljak kha.

⁴³ Babilon kamiyungrok bebak swbaiwi kirimasingcha wng kha. Ha kwran tei hasinglwng wng kha aro khoroksa phano tongnai kwrwi kha tei khoroksa phano ayang tẃi laisunairok kwrwi kha.

⁴⁴ Ang Babilonni Bel mwtaino majra rwnai tei bo monokmarokno bini búkhúk tẃi’-no ongkhlai rwnai. Dopharok tei bini bwkhak kochok glak; Babilonni chokdeualbo báikhrubwi klai anw.

⁴⁵ O ani bororok, norok bini bisingni ongkhorwi phai di. Bebak bororok sak sakno Subraiyungni hór hai jolimani yakni yók di.

⁴⁶ Norokni bwkha ta bai di, ha-o bororokni thani kók nathong khna anw, abo bai ta kiri di, tamo khe bisi brúmno kók nathong khna anw. Hakhe ha-o ur pati-o hwnwi tei bugra khoroksa bai tei khoroksa nang lai kha hwnwi khna anw.

⁴⁷ Aboni bagwi nai di, omo tẃi salrok sók phaiwi tong kha, o jora-o ang Babilonni takjak mwtairokno majra rwnai abo bai bini bebak ha-o lachimasingcha wng anw tei bini bebak butharjakrok bini aro klaiwi tong bainai.

⁴⁸ Aphuru khe nokharok tei harok tei aro tongnairok bebakno Babilonno tẃiwi tongthokni rwchapmung rwchap lai anw. Tamni hwn khe sokomornairok bórokno kebengwi salsibaini phainai hwnwi Subraiyung sa-o.

⁴⁹ Israilno butharnairokni bagwi Babilon ma se ma khlainai, bebak hano Babilon butharma bagwi bo ma se ma khlaithai.

Babilono Israilrokni thani Kaitor sakhlaimani

⁵⁰ Norok sengni yakni yóknairok, “Norok tháng di, ta bathak di, hakchal ha-o tong twtwi Subraiyungno muitu khlai di tei Jerusalemno norokni bwkha-o ton di.

⁵¹ Chwng belai lachimasingcha khe lachi rwjak kha; chwng mwkhang man liya, tamni hwn ba phatarsarok chini Subraiyungni noktharo phai kha.

⁵² Aboni bagwi nai di omo hai sal phaiwi tongo hwnwi Subraiyung sa-o, ‘Aphuru ang bini takjak mwtairokno majra rwnai tei bini ha gwnangwi’-no kwsa gwnangrok kengai lai anw.’

⁵³ Babilon nokha jora kuchugo kasa phano tei bini sengkrakni nok kwrak, kwrak kuchugo tisa kha hwn phano, ani aroni sokomornairok bini thani tháng anw, hwnwi Subraiyung sa-o.”

Babilon tei uáisa báikhrupmani

⁵⁴ “Khna di! Babilonni kap laima khorang! Kolodia hani báikhrupma khorang khna-o!

⁵⁵ Tamni hwn ba Subraiyung Babilonno bukcha khlai kha, bini bokhorang kotorno siring siring khlai kha. Bórokni kwlwima khorang bebak twi aphal khorang hai sokromjak, tei bórokni bokhorang teibo torsa kha.

⁵⁶ Tamo khe bini saka-o, Babilonni saka-o, sokomornai phaiwi sók phai kha; bini chobani sengkrakrok tlangjak bai kha, bini badukhungrok bo dwrwk-darak khe swbaijak bái kha; tamo khe Subraiyung wng kha yagul su phirnai Kaitor. Bo sóino bebakni yagul sunai.

⁵⁷ Ang bórokni tangphangrokno tei sinai nuknairokno, bini samung tang okra bai choba nang lainairokno phek rw anw. Abo bai bórok mol brúm brúmni bagwi muktrwi tháng anw, tei sicha glak hwnwi habugra sa-o, bini bumung wng kha sengkrakrokni Subraiyung.

⁵⁸ ‘Sengkrakrokni Subraiyung hai hwnwi sa-o; Babilonni kotor chokdeual ha bai baksa khe swbaijak anw, tei bini kuchuk duglam bebak hór bai sókjak bai anw. Bororok ereng se samung tang lai anw tei dopharokni samung hór bai sókjak anw,’ bórok haino lengjak bai anw.”

Jirimiani kók Babilono sa horjakmani

⁵⁹ Judani habugra Jedekiani bugra cháma nokha bisik brwi-o Maseiani busuk Neriani bwsajla Seraia habugra bai Babilono tháng phuru Jirimia diyari Seraiano dagimani kókrok, aphuru Seraiani sengkrakrok tongma nokni khoroksa samung naikolnai.

⁶⁰ Babilonni saka-o tamo hamyarok sók phainai a kókrok tei Babilonni bebak kókrokno Jirimia Bijap kangsa-o khe swiwi narwk kha.

⁶¹ Hakhe Jirimia Seraiano hai hwnwi sa kha, “Nwng Babilono phai phuru nwng o kóktháirokno poriui nai di,

⁶² hakhe hai hwnwi sa di, ‘O Subraiyung nwng sakphang se o hano borok eba mal-matarok tongwi man ya tẃi khe mol brúm bagwi sokomorwi páinai hwnwi sikirimani.’

⁶³ Nwng o bijap pori bai khe abono holongthai bai khe khaui Uphratis twima kwcharo khitarwi rohor di.

⁶⁴ Tei hai hwnwi sa di, ‘Omo hai kheno Babilon kwlwk anw tei bachaui man glak, bórokni hamyani bagwi se ang bini saka-o digi-sigino tubu anw.’ ” Aswk tẃi’-no Jirimiani kóktháirok.