JIRIMIA 49 - Kok Borok (Re-edited) Bible (BSI)

Ammonsarokno Subraiyung buj thummani

¹ Ammonsarokno Subraiyung hai hwnwi sa-o: “Israilni bwsajla song kwrwi da? Bini ba manthai yachaknai kwrwi da? Hakhe tamo wngwi Milkom Gadni hano segwi nahar tei bini bororok a kamiyungrokni bisingo tongwi tong?”

² Aboni bagwi Subraiyung hai hwnwi sa-o; nai di, omo hai jora phaiwi tongo, aphuru ang Ammonsongni Rabba kamiyungo chobani sokromma khorang khna rw anw, aphuru abo hapung bukcha wng anw tei bini kamirok hór bai sókjaknai, aphuru Israil bono rwkhlainairokno bo rwkhlainai hwnwi Subraiyung sa-o.

³ O Hesbon swlwgwi kap di, tamni hwn khe Ai bukcha khe tonjak kha, o Rabbani sajwksong kap lai di! Norok rí soroi chum di, kapsimangni kapmung kap di, bebak chokdeualrogo tháng lai di! Milkom buini ha-o khaui tlangjak anw tei bo bai baksa bini ochairok tei tang okrarokbo tlangjak bainai.

⁴ Nini phanno tẃi nwng tamoni kung ma chuk? O kók narwk ya sajwk, nini phan kwrwi wngwi phaisa kha. Nwng nini rangkhókno bwkha beraui, “Sabo ano kebengwi bachanai?” hwnwi satiro.

⁵ Sengkrakrokni Kaitor Subraiyung hai hwnwi sa-o; nai di, ang bebak nono kitingwi tongnairokni aroni kirimano nini saka-o tubu-ui phainai tei norok bebakno rwkhlaijak bainai, bebakno bini bwskangni rwkhlaijak bainai, khárwi thángnai bororokno thumnani khoroksa phano tong glak.

⁶ Phiya ba aboni ulo ang Ammonsongni mwkhangno kiphil rw anw hwnwi Subraiyung sa-o.

Idomno Subraiyung buj thummani

⁷ Idomni kók khe omo hai Sengkrakrokni Subraiyung hai hwnwi sa-o: Temano tei simung kwrwi kha da? Sinairokni bere kókbiti rwnairok komorwi da tháng kha? Bórokni simungrok ba kwmaui da tháng kha?

⁸ O Dedano tongnairok! Norok khár di, uphil di hakhor kuthugo thángwi tongwi di, tamni hwn khe, ang Esauni saka-o rwma digi-sigino bini saka-o majra rwmani jora-o tubu-ui majra rwnai.

⁹ Tumungno angur thumnairok nini thani phai khe, bórok bwthái kisicha swk phano narwk glak diba? Horo sikhok hap khe bórokni nangma bára manwi tlangna bagwi bebak swbai bai glak diba?

¹⁰ Tamo khe ang Esauno sak bukcha khlai kha, bini huijakthairokno nukjak rwui rw kha, bo huijagwi man li ya. Bini bwsarok sokomorjak bai kha tei takhuksong tei nok arini bororok sokomorjak kha; bo tei kwrwi kha.

¹¹ Nwng bupha kwrwi chwrairokno yakarwi klang di, ang bórokno kwthang narwknai; tei norokni randijwkrok ano poito khlai bai thung.

¹² Tamni hwn khe Subraiyung hai hwnwi sa-o: “Tumungno a khurino nungnani nang ya phano bo majra ma chá yaui da tongno ba? Nwng majra rwjakna yók glak, tamo khe nwng ma se ma nungnai.

¹³ Tamni hwn khe Subraiyung hai hwnwi sa-o, ang sakphang’-no swmai tang kha, Bosra khe komornai, mwnwimung, khibijak tei bati nangjak wngnai. Bini bebak kamiyungrok mol brúm brúmni bagwi khibijak anw.”

¹⁴ Ang Subraiyungni aroni sakhlaimung kaisa khna kha, dopharokni thani tẃitun khoroksano hai hwnwi rohorjak kha: “Norok thumsa wng lai di, bórokno kebengwi bacha di tei chobani bagwi tiyar khe bacha di!”

¹⁵ Tamni hwn khe nai di, ang nono dopharokni bere kotoi snamnai tei bororok bai sak nangjak ya khlainai.

¹⁶ O holongdap saka-o tongnai, hachuk kuchukrokno baithangni khlai tongnai nwng sakno kirimasingcha hwnwi khatungwi tongma tei nini kung chukma abono’-no phemlok kha. Nwng toling hai khe kuchugo tongthai snam phano ang nono aroni hachero tikhlainai, hwnwi Subraiyung sa-o.

¹⁷ Idom komor anw; bini gana tẃi laisunairok bebakno kirijak bai anw tei bini digi-sigini bagwi mwnwi lai anw.

¹⁸ Sodom bai Gomora tei bini samni kamiyungrok sokomorjak phuru khe khoroksa phano aro tongnai tong glak tei phatar hani bororokbo bini aro bathak phai glak hwnwi Subraiyung sa-o.

¹⁹ Nai di, Jordanni bolongni singho ongkhorwi mera bodol mwrwkthai kwrak bwkhak phaima hai khe ang achomsa bono aroni khár rwui rohor anw; tei bini saka-o ani chongjak khoroksano achuk rwnai. Sabo ang hai tong ba? Sabo ano daginai ba? Ani bwskango bacha phai raknai abo tẃi mera mwrwknai sabo tong?

²⁰ Aboni bagwi Subraiyung Idomno kebengwi tamo bwkha chong kha tei Temano tongwi tongnairokni bagwi tamo uansugwi tong kha abórokno khna di; mera bodolni bwsate kukrokbo sopreui tlangjak anw; tei bórok samung khlai tẃi’-no bórokni bodolrokbo khlai rwjak anw.

²¹ Bórokni báiwi klaima khorang khnaui harok ma kwlwi anw; bórokni a kap laimani khorang Twijlang Kwchak jora khna hor anw.

²² Nai di, khoroksa toling hai khe kuchuk tẃi doui birwi phai anw, bo Bosra bwkhak bwkrang phehel anw tei a salo Idomni choba nangnai Sengkrakrokni bwkha bwrwirok bána phuru ok saui kengaima hai wng anw.

Damaskosno Subraiyung buj thummani

²³ Damaskosni kók. “Hamat bai Arpad lachimung man kha, tamni hwn khe bórok kóktma hamya khna kha; Kirima chaui bórokni bwkha gele kha, bórokni digi-sigi twijlangni twi aphal kwchang kwchang wngwi man ya hai wng kha.

²⁴ Damaskos phan kwrwi kha, bo khárnani bagwi uphil kha, kirima bono rom kha; sak kengna phuru bwrwirok bohok sajagwi kengaima hai khe kengaima bai dukhurok bono kobol kha.

²⁵ O mung gwnang kamiyung, tongthokni kamiyung katswi khibijak kha!

²⁶ Aboni bagwi a salo bini siklarok bini lampra-o klai bainai tei bebak bini sengkrakrok sokomorjak bai anw, hwnwi sengkrakrokni Subraiyung sa-o.

²⁷ Hakhe ang Damaskosni chokdeualo hór phnangwi rw anw tei abo bai Benhadadni sengkrakni nok kwrakrok khamwi pái anw.”

Kedar bosong bai Hasor kamiyungno buj thummani

²⁸ Babilonni habugra Nebukadrejar bai mechenjak Kedar bai Hajor hani kók. Subraiyung hai hwnwi sa kha: “Bacha di, Kedarno salkabai bwkhak swkagwi di, salkabai bwkhakni bororokno sokomor di!

²⁹ Bórokni rí nokrok tei mera bodolrok tlangjak anw, bórokni rí swngma tei bórokni bebak manwirok mangingangrok bórokni yakni tlangjak bai anw tei bororok kabwi bórokno hai hwnwi sa anw, ‘Bebak phaisingo se kirimasingcha máng!’

³⁰ Subraiyung kaitor hai hwnwi sa-o, “O Hajoro tongnairok khár bai di, hakchalo tháng di, nukjak yarogo tongwi di. Tamni hwn khe Babilonni habugra Nebukadrejar norokno kebengwi cha ya chongwi tong kha tei norokno kebengwi kaisa khẃi chagwi tong kha.

³¹ ‘Phai diba, chwng a kirina kwrwi hwnwi chongwi tongnai dopharokno choprok lainai! Bórokni kamiyungni duglambo kwrwi tei eba kebengwi berepjaknaibo kwrwi, aboni katswi katimung se kwrwi.’

³² “Bórokni Mangingangrok sekjak bainai tei bórokni mal-matarokbo sekjak bainai. Sakni bwkhnai thunta khe tongnairokno ang nokbar bai baksa kobon rwui rwhornai. Phiya ang bebak bwkhakni digi-sigi bórokni saka-o tubunai hwnwi Subraiyung sa-o.

³³ Hajor khe pheuangrokni tongthai tei mol brúm brúmni bagwi khibijak wng anw; aro-o khoroksa phano tongnai tong glak tei phatar hani khoroksa phano aro bathak phai glak. Ang Subraiyung o kók sa-o.”

Elamno Subraiyung buj thummani

³⁴ Judani ha bubagra Jedekia habugra chána chengmani jora-o Diyari Jirimiani thani Elamni bagwi Subraiyungni kók sók phai kha.

³⁵ Sengkrakrokni Subraiyung hai hwnwi sa-o: “Nai di ang Elamni badukhung tei bórokni phanni thongno swbaiwi khibi anw;

³⁶ Tei nokha babaibrwini kaibrwi nokbarno ang Elamni saka-o sip rwnai tei a nokbar sip rwui bórokno babaibrwi bwkhak kobon rwui rohor anw; phiya kobon rwjaknai Elamsong thángwi sógwi ya abo tẃi dopha tei tong glak.

³⁷ Ang Elamsongno bórokni arirokni bwskango tei bórokno butharna nainairokni bwskango kiri-kóró khe tonnai; ang bórokni saka-o hamyano tei ani thamchino phnangnai, hwnwi Subraiyung sa-o. Ang bórokno sokomorbai súk yasakno bórokni uklok uklok seng rohornai;

³⁸ tei ang ani achukthayungno Elamo songchanai. Tei bórokni habugra bai samung tang ojarokno sokomor bainai hwnwi Subraiyung sa-o.”

³⁹ Tamo khe páithago ang Elamni mwkhangno kiphil rw phinai hwnwi Subraiyung sa-o.