JIRIMIA 48 - Kok Borok (Re-edited) Bible (BSI)

Moab báiwi klaimani

¹ Moabno tẃiwi sajakmani kók. Sengkrakrokni Subraiyung Israilni Kaitor hai hwnwi sa-o; “O swraimung nangjak Nebo! omo bukcha klaijak! Kiriathaim lachima man kha, abo tlangwi thángjak kha; chokdeual lachimung man kha tei báiwi klaijak;

² Moabni mung kaham pái súk kha. Bórok Hesbono bini bagwi hamya chap lai kha. ‘Phai di, chwng bono swbaiwi dopha wngnani mwthak lainai!’ O Madmen, nwng bo siring siring wng rwjak anw; Seng nono rwkthar anw.

³ Horonaimni kapmani khorang khna di, ‘Bukcha tei belai khe sokomorjak!’

⁴ “Moab swbai sukhrupjak kha; Hakchal Joar jora kap laimani khorangno khna kha.

⁵ Luhit kasamani lama-o bórok kap laiwi toksaui tháng lai-o; phiya Horonaimni tokhlaima lama-o, bórok ur nangmani khorangno khna kha.

⁶ ‘Do di thangna bagwi khár di!’ ‘Hasing hapharni bolongni koraichirka hai khe khár di!’

⁷ “Tamni hwn khe, nwng nini nok kwrakrokno tei rangkhókno se bwkha beraui tongo, aboni bagwi tabuk nwngbo buini yapha-o tlangjaknai; tei Kemos bini ochairok tei samung tang ojamarok bai baksa khe khaui tlangjaknai.

⁸ Bebak kamiyungrogo a sokomornai phaiwi sók phai anw, khungsa kamiyung phano yók glak; Subraiyung sama tẃi kheno harung swbaijaknai tei hapharbo sokomorjaknai,

⁹ Moabno bwkrang subwi rw di, tamni hwn khe bo birwi khárwi thángnai: bini kamiyungrok bebak khibijak bainai, aro khoroksa phano tongnai tong glak.”

¹⁰ Khá rw súgwi Subraiyungni samung khlai ya borok bo swraimung nangjak; thẃi khiklai yaui seng beraui tonnai borok, bo swraimung nangjak.

Moabni kamiyungrok swbaijak bai kha

¹¹ “Moab chwrai phangsinini simi’-no uanama kwrwi tei sakni tongthai-o jwngjal kwrwi khlaiwi tongwi phai kha bo uáisa phano kwrẃngsa manwini tei kwrẃngsa-o khe sejak ya kho. Bo buini ha-o khaui tlangjak ya kho; aboni bo ahaino tong kho tei bini báhai bo juda wng ya kho.

¹² “Aboni bagwi Subraiyung hai hwnwi sa-o, nai di, omo hai salrok sók phai anw, a salo ang bórokni thani sakhlainairokno rohor anw tei bórok bono sakhlaiwi bini bebak manwi bukcha khlai anw tei abórokno phindrik phandrak khe swbai anw.

¹³ Israilrok Bethelno tẃiwi lachimasingcha wngma hai abo tẃi khe Moabo Kemosno tẃiwi ma lachi anw.

¹⁴ “Bahai khe norok, ‘Chwng phan gwnang tei chobani bagwi phan gwnang bororok’ hwnwi saui man?

¹⁵ Moab tei bini kamiyungrokno sokomornairok bacha kha tei bini sajwk siklarok ratharna bagwi ongkhorwi tháng kha, hwnwi bugra, sengkrakrokni Subraiyung o kókno sa-o.

¹⁶ Moabni digi-sigi gana-o sederwi tong kha, tei bini bagwi hamya sók phainani dojak.

¹⁷ Norok bebak bono kitingwi tongnairok, bini bagwi bwkha nangwi kap di, tei norok bebak bini bumung saui mannairok hai hwnwi kap di, ‘Bahai khe a raidang kwrak bái lang, a chẃngsacha raidang!’

¹⁸ “O Dibono tongnairok, norokni chẃngsacha tongthaini ongkhorwi khamprajak ha-o achuk di! Tamni hwn khe Moabni sokomornairok nono kebengwi bachaui phai lai kha; bo nini bebak sengkrakni nok kwrakrokno swbai bai kha.

¹⁹ O Aroero tongnairok, lama gana-o bachaui naharwi nai di! khárnai chwlarok tei yógwi thángnai bwrwirokno, ‘Tamo wng kha?’ hwnwi sẃng di.

²⁰ Moab lachimasingcha wng kha, tamni hwn khe bo báiwi klai kha; norok chiri-mokorok wng lai di tei kap lai di; Arnonno o kók sa di, ‘Moab swbai bukcha khe tonjak kha. Tamo khe bo báikhlaiwi klai kha,’ norok chiri-mokorok khe tei kap lai di. Arnono hai hwnwi sa di, ‘Moab swbai sukhrupjak kha.’

²¹ “Haphar miligo, Holono, Jajaso, Mephato buj sók phai kha,

²² Dibon, Nebo, Bet-diblathaimo

²³ tei Kiriathaimo, Bet-gamulo, Bet Meono,

²⁴ Kerioto, Bosra-o tei Moab hani sampha tei hakchal bebak kamiyungrokni saka-o buj sók phai kha.

²⁵ Moabni bokorong tansujak kha tei bini yaktwk báijak, hwnwi Subraiyung sa-o.”

Moab tong kwchang wng anw

²⁶ Norok bono chuak phek rw di, tamni hwn khe bo Subraiyungno kebengwi sakno kotor khlai-o, aboni bagwi Moab bini kwbatwi-o goirok anw tei bo’-bo buini mwnwimung wng anw.

²⁷ Israil nini mwnwijakmung tongnai diba? Bo sikhokrokni bisingo khopjak ya diba? Norok bono tẃiwi kók sa lai brúmno khorok jangriui tong lai-o hai ya da?

²⁸ O Moabo tongnairok, norok kamiyung yakar di, holongthai-o thángwi tongwi di! tongkhor búkhúk gana-o bothop thupnai pharukrok hai wng di.

²⁹ Chwng Moabni kung chukma kókno khna kha, bo belaino kung chuk kha, bini sak kotor wngma tei bini kung chukma, kók khna ya wngma tei thamchi tungmarokno khna kha.

³⁰ Ang bini thamchi tungmano saui mano, hwnwi Subraiyung sa-o; bini kung chukmarok ereng ereng se, bini samungrokbo ereng ereng.

³¹ Aboni bagwi ang Moabni kókno tẃiwi subuk subuk khe kapnai; Moabni bagwi chirigwi kapnai; tamni hwn khe ang Kir-heresni bororokni bagwi kap anw.

³² O Sibmani angur buphang, Jaserni slái ang nini bagwi kap anw! Nini bedekrok twijlang láiwi tháng kha, abo Jaser jora sógwi kha; nini tangbla jorani bwthái thái kumun bai angur bwtháirokno bupraui sokomornairok phaiwi sók phai kha.

³³ Bwthái kupulung khe tháinai haphar Moab khá srangma tei tongthokmarok tlangwi thángjak kha; ang angur pheremanio’-no angur bwtwi bukcha khlaiwi; bororok tongthokma bising tẃi tei angur phere lai glak, a tongthogwi chirikhók laima tong glak.

³⁴ Hesbon bai Eleale kap lai-kok lai wng lai kha; aboni khorang Jahas jora khna hor kha, Joarni simi Horonaim tei Iglat-selisia jora khorang sógwi kha. Tamni hwn khe Nimrimni twirokbo ranwi bukcha wng kha.

³⁵ Phiya ang Moabni háyá kuchukrogo ratharnairok bai a mwtairokni thani satrai motom sóknairokno pái súk rwnai.

³⁶ Aboni bagwi Moabno tei Kir-heresno tẃiwi ani bwkha-o sumui khorang hai khe bwkha nangwi kabo; aboni bagwi bini aswk ajimarok kwma bai kha.

³⁷ “Tamni hwn khe bebakni bokhorok siljak bai kha tei bebakni khochai siljak kha; bebakni yago kwsa chajak tei bwchango rí soroi kanjak.

³⁸ Moabni bebak núkhúng khúngchili-o tei bini bebak lampra-o kapmani khorang simi’-no khna-o, tamni hwn khe, Subraiyung hai hwnwi sa-o, ang Moabno kaisa samung nang ya manwi hai khe swbaiwi khibi kha.

³⁹ Omo bahai khe bái kha! Bórok bwswk se kap lai kha! Moab lachima manẃi bahai khe uphil kha! Hakhe omo hai kheno Moab bono kitingwi tongnai bebak bororokni thani mwnwimung tei sundrujakthai wng kha.”

Moabni bagwi yókna lama kwrwi

⁴⁰ Tamo khe Subraiyung hai hwnwi sa-o: “Nai di, bórok toling hai khe birwi phai anw tei Moabno kebengwi bini bwkrangno phehel anw;

⁴¹ Kamiyungrok bebak buini yago, nok kwrakrok bebak sekjak bai kha. A salo Moabni choba nang lainairokni bwkha sak kengna phuru bwrwirokni kengaima hai wng anw.

⁴² Moab sokomorjak anw tei borok hwnwi lekhajak glak, tamni hwn khe bo Subraiyungno kebengwi sakno bólai kha.

⁴³ Subraiyung hai hwnwi sa-o, o Moabo tongnairok! kirimung, hakhor tei khẃi nini bwskango phaiwi tong kha.

⁴⁴ Khoroksa swk kiriui khárwi tháng khe bo hakhoro klai anw hakhorni kasaui phainai khe khẃi-o nang phai anw. Tamni hwn khe ang Moabno yagul sumani bisi-o omorokno tubu anw, hwnwi Subraiyung sa-o.

⁴⁵ “Hesbonni saklomo huijagwi tongnairok phan kwrwi wngwi bathagwi tongnai; tamni hwn khe Hesbonni hór bai Sihonni noksingni hórjlai nongkhor kha tei Moabni kwpal bai kók kotor sanaini bokhorok charano khampro rw kha.

⁴⁶ O Moab nwng bati nang di! Kemosni bororok komor bai kha; tamni hwn khe nini nwslasong khaui tlangjak bai kha tei nini nwsajwksongbo romwi tlangjak bai kha.

⁴⁷ Hai phano páithakni salo ang Moabni mwkhangno kiphilwi rwnai, hwnwi Subraiyung sa-o.” Aswk jora tẃi’-no Moabno buj thummani kók.