JIRIMIA 47 - Kok Borok (Re-edited) Bible (BSI)

Subraiyung Philistiasongni kók samani

¹ Pharao Gajano butharmani swkang Philistiasarokni kókno tẃiwi Subraiyung Jirimia Diyarini thani o kókno sa kha.

² Subraiyung hai hwnwi sa kha, “Nahar di, salgrabai phaisingni twi torsaui phai-o, tei abo twi torwi kochok rwnai twi tur gwnang wngnai; abo bebak hano lomsa rwui supungnai, kamiyungno tei aro tongnai bebakno swklwk bainai. Bororok chiri-mokorok wng lai anw, Ha saka-o tongnai bebakno swlwgwi kap lai anw.

³ Bórokni koraini yapri khorang bai korai malkhungni khorang bai, korai malkhung malmani gorgorini khorang khna anw, buphasong bórokni bwsarokno uphilwi naisigwinai glak, tei bórokni yak belwi phan kwrwi wng kha,

⁴ tamni hwn khe, bebak Philistiasongno sokomorna sal, tei Tur tei Sidonni bebak tong rwknai chubanairokno butharwi páina sal sók phai kha. Tamni hwn khe Subraiyung Philistiasarokno tei twi rukungni ha Kepthorni tong rwknai bororokno sokomor bainai.

⁵ Gajani khorok pilanda wng kha, Askelon Komor bai kha. O Anakimni tong rwknairok, nwng tei bwswk jora sak sakni bwsakno ra sinai?

⁶ O Subraiyungni seng! Nwng tei bwswk dwgwi siring siring tongnai? Nwng sakni sengkhogo habwi lengla di, tei siring siring wng di!

⁷ Subraiyung se nono barja rw khe bahai khe siring siring wngwi mannai? Askelon tei twi rukungno kebengwi bo bono chongwi rw kha.”