JIRIMIA 46 - Kok Borok (Re-edited) Bible (BSI)

Ijip Karkamiso choba-o chenmani

¹ Jirimiani diyarini thani Subraiyung Dopharokno tẃiwi samani kókrok.

² Ijipni hani kókrok Josiani bwsajla Judani habugra Jehoiakim habugra chámani nokha bisik brwini jora-o Babilonni habugra Nebukadrejar, Ijipni ha bubagra Pharao-Neko sengkrak bodolno mechen kha, abo wng kha Uphratis twima rukungni Karkamiso:

³ Seng tei phui tẃiwi chobani bagwi tiyar wngwi bwskango him di!

⁴ Korairokno tiyar khlai di tei korai kanai sengkrakrok korai saka-o kasa di! Khorok katijaknaino thubui bwskango bacha di; nini chakhlarokno hul di; chobani kamchwlwi chum di!

⁵ Ang tamo omono nuk lang? Bórok kirima cháui uklok uslu kha. Bórokni choba kwrwngrok mechenjak bai kha; doui khár bai kha; Bórok uphilwi nahar lang li ya, ayang uyang bebakno kirimasingcha! hwnwi Subraiyung sa-o.

⁶ Kodorok khárwi man li ya, choba nang lainairokbo yók li ya gwja; Salgrabai Uphratis twima rukungo bórok thutaiwi klai bai kha.

⁷ Abo sabo? Nil twimano kosol khe kasa kha, twimani twi aphal kasama hai khe kasaui phai?

⁸ Ha Ijip Nil twima hai khe bachaui phai kha, twimarokni twi hai khe twi aphal kasajak. bo hai hwnwi sa-o, ang bachanai tei ha gwnangwi lom rwnai, ang kamiyung bai tei aro-o tongnairokno sokomor bainai.

⁹ O korairok, bwskango tháng di, tei o korai malkhungrok kobor hai khe swkangwi tháng di! Choba nang lainairok bwskango tháng di; Ithiopia tei phui tẃinairok, tei badukhung kokna kwrwngrok Ludimsong nongkhorwi phai di.

¹⁰ O sal wng kha sengkrakrokni Subraiyungni Kaitorni sal, bini arirokno yagul sunani sal. seng bororokno butharwi bwkha kochom suknai, bórokni thẃi nungwi ok pung suknai. tamni hwn khe salgrabai-o Uphratis twima rukungo sengkrakrokni Subraiyung Kaitorno ratharwi yapharmungni panda khlaiwi tongo.

¹¹ O sikla kwthar Ijipni sajwk! Nwng Giliado thángwi, phulna bagwi bithi tubu di, nwng kwbángma samungo chúk ya bithirok phul kha; abo bai nini hamna kwrwi.

¹² Dopharok nini lachimasingchano khna kha, tei nini kapmani khorang ha gwnangwi pung kha; phiya choba nang lainai bai nang lainai thutai lai kha; bórok kwnwnwi’-no baksa khe klai lai kha.

Nebukadrejar phaimani

¹³ Ha Ijipno mechenwi butharna bagwi Babilonni habugra Nebukadrejar phaimano tẃiwi Subraiyung Jirimiano hai hwnwi sa kha;

¹⁴ Ijip ha-o sakhlai di; Migdolo sakhlai di; tei Moph bai Tapanheso sakhlai di; hai hwnwi sa di, tiyar khe bacha di, tamni hwn khe seng nono kitingwi monokna nai tong kha.

¹⁵ Apis tamni bagwi khárwi tháng kha? Tamni bagwi nini phan gwnangrok bacha li ya gwja? Tamni hwn ba Subraiyung bórokno dagarwi khiklai rw kha.

¹⁶ Nini borok kwbángma thutaiwi klai laiwi kaisa bai kaisa hai hwnwi sa lai kha, “Phai di sátoknairokni sengni yókna bagwi, chwng bachaui sakni bororokni thani, tei chini achaima ha-o kiphilwi tháng lai anw.”

¹⁷ Ijipni habugra Pharaoni mungno, “Golok golok wngwi sep keplenai,” hwnwi phar di.

¹⁸ “Ang Phankrak Subraiyung, bubagra o kók sa-o, ang kwthang Kaitor omono sa-o, hachukrokni bere Tabor hachuk hai tei twijlangni ganani Karmel hathái hai omo hai khoroksa phainai.

¹⁹ O ha Ijibo tongnai bororok norok khaui tlangjaknani bagwi sak sakno tiyar ton di! Tamni hwn khe, Moph bukcha wngnai, borok tongnai kwrwi wngnai.

²⁰ “Ijip wng kha naithok musuk damri hai, tamo khe salgrabaini kusupna bagwi chaprang phaiwi tongo.

²¹ Bini bisingo bini solok tubujaknai sengkrakrokbo, kuphung musuk bwsa hai gwja; bórokbo kiphil kha, tei baksa khe khár lai kha, bórok bathagwi tong lai li ya. tamni hwn khe bórokni digi-sigini sal tei majra rwjakma jora, bórokni thani sók phai kha.

²² “Kena ari sengkrakrok gana-o phai phuru, aphuru bo chibuk hai phu-phu khorang khlaiwi khárwi tháng lai anw; buphang tannairok hai khe kena arirok rua tubu-ui Ijipsongno kebengwi phai lai anw.

²³ Subraiyung hai hwnwi sa-o, bórok bini bolong hok bai anw; abo kutuk phano tei bórok kúkthorani slái phano kwbáng; abórokno lekha bai ya.

²⁴ Ijipni bwsajwk lachi rwjak anw, bo salgrabairokni yago yapharjak anw.”

²⁵ Sengkrakrokni Subraiyung, Israilni Kaitor hai hwnwi sa-o: Nai di ang Thebesni Amonno majra rwnai, Pharao bai Ijipno tei bini mwtairok bai habugrarokno Pharaono bwkha beranairokno bebakno majra rwnai.

²⁶ Ang bórokno butharna nainai, Babilonni habugra Nebukadrejar bai bini samung tang ojamarokni yago yapharnai. Phiya ba aboni ulo Ijip ha swkangni haino bororokni tongthai wng phinai hwnwi Subraiyung sa-o.

Subraiyung bini bororokno mwthangnai

²⁷ “Tamo khe o ani seleng Jakob, ta kiri di, o Israil bwkha ta bái di; tamni hwn ba ang nono hakchalni simi mwthangnai, tei khajagwi tongma hani nini bosongno mwthangnai. Jakob kiphilwi phainai, kirima kwrwi tei uana ya khe tong anw, khoroksa phano bono sikiriui man glak.

²⁸ Subraiyung hai hwnwi sa-o: O ani seleng Jakob, nwng ta kiri di, tamni hwn khe ang nwng bai tongo. Ang nono khárwi tlangmani a harokno tei dopharokno pái rw suknai, tamo khe, ang nono swkwmasuk glak. Ang nono sra rwna bagwi bunai, bú yaui yakarwi le rw glak.”