JIRIMIA 45 - Kok Borok (Re-edited) Bible (BSI)

Barukno Kaitor kók rwmani

¹ Josiani bwsla Judani habugra Jehoiakim habugra chámani bisik brwi-o, aphuru Neriani bwsajla Baruk o bebak kókrok Jirimiani khugo khnaui bijabo swi kha, aphuru diyari Jirimia bono o kókrokno sa kha:

² O Baruk, Subraiyung Israilni Kaitor nono hai hwnwi sa-o;

³ nwng hai hwnwi sa kha, “Ang bati nang thung! Subraiyung ani sama saka-o se teibo dukhu manju-ui rw phi kha; ang kengai máng kengai máng lengpra súk kha, srapsa phano lenglana jora man ya.”

⁴ Nwng bono o kók sa di, Subraiyung hai hwnwi sa-o; “Nai di ang snammani abono swbaiwi khibina nai tongo, ang o ha gwnangwi kaimano phuichaui khibina nai tong kha.

⁵ Nwng sak sakni bagwi kotor wngnanino da naitugwi tong? Abórokno ta naituk di; tamni hwn ba ang bebak bororokni saka-o hamya tubuna naiwi tongo, hwnwi Subraiyung sa-o; tamo khe nwng bebak choba-o thángma ha-o nini langmano hili hai khe nono rwnai.”