JIRIMIA 44 - Kok Borok (Re-edited) Bible (BSI)

Ijip ha-o tongnai Israilrokni thani Subraiyung kók sahorma

¹ Ijipni Migdol, Tapanhes, Moph tei Pathros ha-o tongwi tongnai Judairokni bagwi Jirimiani thani o kók sók phai kha,

² sengkrakrokni Subraiyung Israilni Kaitor hai hwnwi sa-o; norok norokni mokol baithangno ang Jerusalemni saka-o tei Judani kamiyungrokni saka-o bebak digi-sigi tubumani nuk kha. Nai di, tini abórok bebak bukcha wng kha, khoroksa phano aro tongnai kwrwi,

³ bororok samung hamya khlaiwi ano joli rw-o, bórok norok tei norokni chuchusongbo sini ya abo tẃi kubunni mwtairokno satrai sógwi monnani bagwi thángo.

⁴ Hai phano ang ani bebak seleng diyarirokno norokni thani cho yaui rohorwi hai hwnwi sa rohor kha, “Ang norokno sa-o, norok ang naislerma tei selengjakma samung sitrarokno ta khlai di!”

⁵ Phiya ba bórok sak sakni samung sitrano mwthakna bagwi tei kubunni mwtairokno satrai sógwi mon yaui tongna bagwi kók khna li ya tei khunju bo kaichom li ya.

⁶ Aboni bagwi tini Judani kamiyungrokni saka-o tei Jerusalemni lama thwgwi ani thamchi bai jolima lukhlaijak kha. Hakhe tabuk jora abo bukcha, khibijak wng bai kha.

⁷ Tabuk sengkrakrokni Subraiyung Israilni Kaitor hai hwnwi sa-o; norok tamni bagwi sak sakno kebengwi aswk cha ya samung khlaiwi tong, abo bai norokni chwlarok, bwrwirok, chwrairok tei abuktwi chánai kwlwi bwsarokno Judani sokomor bai anw, norokni bisingo khoroksano phano phiyógwi klang glak.

⁸ Norok tamni Ijip ha-o tongnani bagwi phaiwi ba norok sak sakni samung bai tei kubun mwtairokno satrai sógwi khulumui ano joli rw? Aboni bagwi norok norjaknai tei swraimung nangnai phiya ha sakani bebak dopharok bai naislerjaknai.

⁹ Norok norokni chuchusongni samung sitrarok, Judani ha bubagrarok, bórokni bihiksong, norokni sakni tei norokni nihiksongni samung sitrarok, Juda ha-o tei Jerusalemni lama thwgwi khlaijakmarokno pok kha hai de?

¹⁰ Bórok tabuk jora phano khorok bom ya kho gwja, kibo kiri ya tei ang norokno tei norokni chuchusongno kerong tei raida rwma hai khebo bórok tong lai ya gwja.

¹¹ Aboni bagwi Sengkrakrokni Subraiyung, Israilni Kaitor hai hwnwi sa-o; “Nai di, ang norokno kebengwi norokni saka-o hamya khlainani tei bebak Judarokno nornani bagwi bwkha-o chong kha.

¹² Hakhe Juda-o tong rwknairokno tei ha Ijibo thángwi tongwina bagwi uansuknairokno ang tlangnai tei bórok sokomorjaknai; Ijip ha-o bórok klainai; okrani simi chwrairok seng bai tei asari bai thwi bainai; tei bórok swraimung nangjak, sundrujak, buini sejama tei mwnwi mung wngnai.

¹³ Ang Ijip ha-o tongnairokno Jerusalemo tongnairokno sátokma hai kheno seng bai asari bai tei bemuk hamya bai khe majra rwnai,

¹⁴ hakhe Juda-o tong rwknai ha Ijibo tongna hwnwi phainairok bórokni bere khoroksa phano yógwi man glak eba kwthang tong glak, eba bórok thángwi tongwina hwnwi uansukma a Juda ha-o bo kiphilwi thángwi man glak; tamo khe kisicha simi se kiphilnai.”

¹⁵ Aphuru khe bebak chwlarok bórokni bihiksong kubunni mwtairokni thani satrai sógo hwnwi saui mannairok tei gana-o bacha lainai tongnai bwrwirok, borok kwbángma kuthumjakrok tei Ijip hani Pathros amchoi-o tongwi tongnairok bebakno Jirimiano uphilwi hai hwnwi sa lai kha:

¹⁶ “Subraiyungni bumung bai nwng chwngno samani kókno chwng khna glak.

¹⁷ Phiya ba chwng swmai tangma tẃi’-no khlainai, nokhani bubagrajwkni bagwi yapharnai tei nungmungrok lukhlainai, chwng khe chini chuchusong, chini habugrasong tei chini samung tang okrasong khlai tẃi’-no Juda hani kamiyung brúm tei Jerusalemni lam thwgwi abo khlainai, aphuru chwng chámung nungmungrok biyal wng glak phiya hamchanai tei mungsa hamya wng glak.

¹⁸ Tamo khe chwng nokhani bugrajwkno satrai sókmani tei nungmung lukhlaima mwthak phuruni simi chwng bebakni’-no biyal wng kha tei choba, asari bai thwi bai kha.”

¹⁹ Hakhe bwrwirok hai hwnwi sa lai kha, “Chwng nokhani bubagrajwkni thani yaphar phuru tei nungmungrok lu phuru tei bini mang hai auan snam phuru chini sak sakni saisongno karwi abórokno khlai-o hwnwi da bwkha ka?”

²⁰ Hakhe Jirimia bebak bororokno, chwlarokno tei bwrwirokno bini a kókno uphilwi sanairokno o kók sa kha;

²¹ “Judani kamiyung brúm tei Jerusalemni lama thwgwi norok tei norokni chuchusong norokni habugrarok bai samung tang okrarok tei hani bororok yapharmarokno Subraiyung muitu khlai glak diba? Abórok bebakno bo bwkha-o muitu manjak glak diba?

²² Subraiyung norokni samung sitra selengmasingcha hamya tangmungrokno tei soiwi man li ya; aboni bagwino tabuk jora norokni ha tabuk tongma hai bukcha, khibijak swraimung nangjak tei borok tongnai kwrwi wng kha.”

²³ Norok satrai sókmani bagwi Subraiyungni thani sumsok khlaimani bagwi Subraiyungni kók na ya, bini kerong dagimano tẃi tong ya tei raidarokno tei dagimungrok tẃi tong yani bagwi, o digi-sigi norokni sago klai kha, omo tini jora nangwi’-no tongo.

²⁴ Jirimia bebak bororokno tei bebak bwrwirokno hai hwnwi sa kha, “O Ijip ha-o tongnai bebak Judarok norok Subraiyungni kókno khna di.

²⁵ Hakhe Sengkrakrokni Subraiyung, Israilni Kaitor hai hwnwi sa-o; norok bai norokni hiksong búkhúk bai sa lai kha tei yak bai abono khlaiwi, nokhani isrino satrai sóknai tei bono nungmung baroknai hwnwi chwng hwnmano khlainai, kók rwmano chwng narwknai hwnwi sa lai kha. Hakhe tabuk abo hai khwbo khlai di tei kókbo narwk di.”

²⁶ Aboni bagwi o Ijip ha-o tongwi tongnai bebak Judarok, Subraiyungni kókno khna di; nai di; “Ang ani mung kotor bai swmai tang kha, kwthang Kaitor Subraiyungni bumungno ha Ijibo tongnai bebak Judarok Subraiyung Kaitor tong sak bórokni búkhúk bai ani bumungno khúk ta per thung.”

²⁷ Ang bórokno naikhlaiwi tongnai, abobo hamya khlaina bagwi se, kaham khlaina bagwi ya, abo bai ha Ijibo tongwi tongnai bebak Judarok khoroksa kwrwi tẃi seng tei asari bai komornai.

²⁸ Bórokni bere kisicha bororok se sengni yógwi ha Ijipni Juda ha-o kiphilwi phainai. Aboni ulo Judani tong rwknai Ijibo tongna hwnwi phainairok bórok saui man anw saboni kók kubui ani kók da eba bórokni kók!

²⁹ Norokni hamyani bagwi ani kók nang suknai hwnwi saui manna marini bagwi ang norokno orono majra rwnai, hwnwi Subraiyung sa-o.

³⁰ Subraiyung hai hwnwi sa-o, “Nai di ang Judani ha bubagra Jedekiano Babilonni habugra Nebukadrejarni yago yapharma hai khe Ijipni ha bubagra Pharao Hophrano bo bini ari tei bono butharna nainairokni yago yaphar anw.”