JIRIMIA 42 - Kok Borok (Re-edited) Bible (BSI)

Bororok Jirimiano bórokni bagwi suri san di hwn kha

¹ Hakhe bebak sengkrak ojamarok tei Kareani bwsajla Johanan bai Hoseani bwsajla Ajaria tei kotoi bai kolok kotor bebak bororok gana-o phai lai kha,

² tei diyari Jirimiano hai hwnwi sa lai kha, “Chini sanmano khna ja di, tei nwng Subraiyung nini Kaitorni thani chini bagwi phiya o tong rwknairokni bagwi suri ja di. Tamni hwn ba aswk kwbángmani se chwng kisicha se tong rwk si-o, abono nwng nuk kha.

³ Bo lama tẃi chwng thángnai tei chwng tamo khlaithai, abono Subraiyung nini Kaitor chwngno saui man rw thung.”

⁴ Jirimia diyari bórokno hai hwnwi sa kha, “Ang norokni kókno khna kha; nai di, ang norokni koima tẃi’-no Subraiyung norokni Kaitorni thani suri sannai tei Subraiyung norokno samarokno ang norokno sa anw, mungsano kók phano norokno khogwi tonjak glak.”

⁵ Hakhe bórok Jirimiano hai hwnwi sa lai kha, “Subraiyung nini Kaitor chwngno sanani bagwi nono rohoro, tumungno chwng abo hai khlai ya hwn khe Subraiyungno khoroksa chini bagwi kubui tei poito khlaijaknai kók mukumu wng thung.

⁶ Abo kaham phano wng thung eba hamya phano wng thung, chwng nono rohormani chini Kaitor a Subraiyungni kókno chwng khnanai, abo hai khe Subraiyung chini Kaitorni kók khnaui chini kaham wng anw,”

Jirimiani surimano Subraiyung sakhlaimani

⁷ Nokha salchini páithago Subraiyungni kók Jirimiani thani sók phai kha.

⁸ Aboni bagwi bo Kareani bwsajla Johanan tei bini mángsongrokno, bebak sengkrak ojamarokno tei kotor bai kotoirok tei bebak bororokno ringwi

⁹ bórokno hai hwnwi sa kha, “Norok ano koinani bagwi rohorma a Subraiyung Israilni Kaitor hai hwnwi sa-o:

¹⁰ ‘Tumungno norok o hani kutul yaui tong khe ang norokno songchaui tisanai khiklai glak; ang norokno káinai, phuicha glak; tamni hwn ba ang norokni saka-o hamya khlaimarokni bagwi bwkha kham kha.

¹¹ Norok Babilonni ha bubagrano kiriui tongmani, bono ta kiri di; Subraiyung sa-o bono ta kiri di, tamni hwn khe norokno mwthangna bagwi tei bini yakni norokno phiyókna bagwi ang norok bai tongo.

¹² Ang norokno khairoganw phiya bo norokno khaironai tei norokni ha-o kiphilwi rohornai.’

¹³ “Phiya ba norok Subraiyung norokni Kaitorni kók khna ya wngwi, ‘Chwng o ha-o tong ya,’

¹⁴ chwng ha Ijibo’-no tháng lainai aro chwng choba nukna nang glak, totro khorang khnanani nang glak tei biyalo klaiwi ok khuiwi tongnani bo nang glak, chwng aro’-no tongwinai hwnwi sa khe;

¹⁵ Hakhe tabuk o Juda-o tong rwknai norok bebakno Subraiyungni kókno khna di, sengkrakrokni Subraiyung, Israilni Kaitor hai hwnwi sa-o, ‘Tumungno norok ha Ijibo thángnani bagwi bwkha tong khe tei aro’-no tongnani bagwi tháng khe,

¹⁶ hakhe nwng kirijakmani a sengno Ijip ha-o nono rom anw; tei nwng kirimani a asaribo ha Ijibo nono rwktharnai; tei norok aro’-no thwi anw.”

¹⁷ Ha Ijibo thángwi tongwina bagwi bwkha thonnai bebak bororok seng bai, asari bai tei bokrok bai ma thwinai, ang bórokni saka-o hamyarok tubumani bai bórokni bere khoroksa phano kwthang tong glak.

¹⁸ “Tamni hwn khe, sengkrakrokni Subraiyung, Israilni Kaitor hai hwnwi sa-o; Jerusalemo tongnairokni saka-o ani jolima thamchi lukhlaimani hai norok Ijip ha-o tháng khe abo hai kheno ani thamchi norokni saka-o lukhlaijak anw. Norok naislerjak, bati nangjak tei buini mwnwimung borok wng bai anw. O hano nwng tei nuk glak.

¹⁹ O ha Judani tong rwknai bebak bororok, Subraiyung norokno, ‘Ha Ijibo ta tháng di,’ hwnwi sa-o. Tini ang norokno ragdama khlai rwmano muitu narwk di,

²⁰ Norok katswi cha ya khlai kha. Tamni hwn ba norok ano ‘Subraiyung Kaitorni thani chini bagwi suri ja di; bo samano’-no abono bebakno chwngno sa di hakhe chwng abono khlainai,’ hwnwi rohorma se bla.’

²¹ Hakhe ang norokno o kókno sakhlai kha, phiya ba norokno sa di hwnwi ano rohornai Subraiyung norokni Kaitorni kókno norok kisa phano khna liya gwja.

²² Aboni bagwi kaham khe si di; norok thángwi tongwina hwn thani, norok seng bai asari bai tei bok manjagwi ma thwi bainai.”