JIRIMIA 41 - Kok Borok (Re-edited) Bible (BSI)

¹ Nokha talsnini talo habugrani bosongni’-no Elisamani busuk Nethaniani bwsajla Ismael, khoroksa samung tangphang bokhorok, bo Mijpa-o Ahikamni bwsajla Gedaliani thani khorokchi chwlarokno tubu-ui phai kha. Bórok aro thansa khe chá laiwi tong lai phuru,

² Nethaniani bwsajla Ismael tei bini a khorokchi chwlarok bachaui Babilonni habugra a hani bagwi hastepha chongjak Saphanni busuk Ahikamni bwsajla Gedaliano seng bai tanwi buthar kha.

³ Ismael Mijpa-o Gedalia bai tongnai bebak Judairokno bo buthar bai kha. Tei aro-o Kolodiani sengkrak tongnairokbo buthar bai kha.

⁴ Gedaliano butharmani teini salo khoroksa swk phano si ya sini swkang,

⁵ khorokchichar chwlarok Sekemni, Siloni tei Samariani sók phai bai kha, bórok khochairok silwi kamchwlwirok chirwi sak-sakni bwsakrogo rachik baiwi Subraiyungni noktharo yapharna hwnwi bwthái bwchlwi bai satrai motom tubu-ui phai lai kha.

⁶ Nethaniani bwsajla Ismael khe kap twtwi bórok bai malaina bagwi Mijpani ongkhorwi phai kha. Bo bórokno malai kheno, “Ahikamni bwsajla Gedaliani thani him ja di.” hwnwi hwn kha.

⁷ Bórok kamiyung bisingo sógwi phuru kheno Nethaniani bwsajla Ismael bai bórok bai baksa tongnai chwlarok bórokno tanwi twikhoro khiklaiwi rw kha.

⁸ Tamo khe bórokni bere khorokchirok khe Ismaelno hai hwnwi sa kha, “Chwngno ta buthar ja di, hapharo chini gom, barli, thok tei piya bwtwi huijak tongo.” Aboni bagwi bo bórokno phiyógwi rw kha, bórokni tei palsongrok bai baksa bórokno buthar li ya.

⁹ Bororokno butharwi Ismael kwthwi mangrokno khiklaiwi rohorma twikhor wng kha belaino kotor twikhor, abo habugra Asa Israilni habugra Basanno kiriui sakno kati rwnani bagwi snammani, Nethaniani bwsla Ismael abono butharmani mang kwthwirok bai khe supung kha.

¹⁰ Aboni ulo Ismael Mijpa-o tong rwknai bebak bororokno khaui tlang bai kha, habugrani bwsajwksongno tei bebak Mijpa-o tong rwknairokno Nebujaradan mwrwknai sengkrak oja Ahikamni bwsla Gedaliani thani yaphar kha. Abórokno Nethaniani bwsla Ismael khaui Ammonsarokni thani tlangwi thángna bagwi lam rw kha.

¹¹ Phiya ba Kareani bwsla Johanan tei bo bai baksa tongnai bebak sengkrak ojamarok Nethaniani bwsajla Ismael se a samung sitrarok khlai-o hwnwi khna kha.

¹² Aphuru khe bórok bebak bororokno tlangwi Nethaniani bwsajla Ismael bai choba nang laina tháng lai kha. Hakhe bórok Gibeonni pukhiri kotor rukungo malai lai kha.

¹³ Aphuru Ismael bai baksa tongnairok bórok Kareani bwsajla Johanan tei bini mángsong sengkrak ojamarokno nugwi tongthokjak kha.

¹⁴ Hakhe Ismael khaui Mijpani tlangwi thángma a bororok kiphilwi phai lai kha tei Kareani bwsajla Johananni thani kiphilwi tháng kha.

¹⁵ Phiya ba Nethaniani bwsajla Ismael khe borok khorokcharrokno tẃiwi Johananni bwskangni khár kha tei Ammonsarokni thani tháng kha.

¹⁶ Hakhe Kareani bwsajla Johanan bai bebak sengkrak ojarok Nethaniani bwsajla Ismael, Ahikamni bwsajla Gedaliano butharwi Mijpani khaui tlangjaknai sengkrakrokno, bwrwirokno, chwrairokno tẃiphangrokno Johanan Gibeonni kiphilwi tubu kha.

¹⁷ Hakhe bórok Ijip ha-o thángna uansugwi Betlehem ganani Gerut Chimhamo bathagwi kha.

¹⁸ Tamni hwn khe Nethaniani bwsajla Ismael Babilonni ha bubagra bai chongjak hastepha Ahikamni bwsajla Gedaliano buthar kha. Aboni bagwi bórok Kolodiasongno kirijak bai-o.