JIRIMIA 40 - Kok Borok (Re-edited) Bible (BSI)

Jirimia Gedalia bai tongmani

¹ Sengkrak ojama Nebujaradan Jirimiano Rama-o phiyógwi rohorma ulo bo bono tei kubun Jerusalem bai Judani bebak choba-o romjaknairok bai khe sorduk bai khaui, Babilono tlangjak phuru angbo aro tongo. Aphuru Subraiyung Jirimiano hai hwnwi sa kha.

² Mwrwknai ojama Jirimiano yachagwi bono hai hwnwi sa kha, “Subraiyung nini Kaitor o hano tẃiwi’-no hamya sakhlaimani;

³ tei tabuk Subraiyung abono phnang kha, bo samani haino khlai kha. Tamni hwn khe, norok Subraiyungno kebengwi sumsok khlai kha tei bini kókno khna li ya, aboni bagwino norokni thani omo hairok wngo.

⁴ Tabuk, nai di, tini ang nini yago sorduk khajakni nono phiyók kha. Nwng ang bai baksa Babilono phaina muchung kha hwn khe phai di, ang nono kaham khe naikini khlainai phiya ba ang bai Babilono phainani muchung ya khe, ta phai di. Nai di bebak harok nini bwskango tongo, nwng kaham tei chúknai hwnwi uansukma’-ono tháng di.”

⁵ “Tumungno nwng tong khe hakhe nwng Saphanni busuk, Ahikamni bwsla Gedaliani thani kiphilwi tháng di, Babilonni habugra bono Judani kamiyungrokni bokhorok chong kha, nwng bo bai khe sakni bororok bai tongwi mano; eba nwng chajak thani’-no tháng di.” Hakhe mwrwknai sengkrak ojama bono lamani nangma chámung-nungmungrok tei sokat yapharwi bono nairwgwi rohor kha.

⁶ Hakhe Jirimia Mijpa-o Ahikamni bwsajla Gedaliani thani thángwi aro tong rwknai bororok bai baksa tongwi kha.

Gedalia Judani hastepha

⁷ Sengkrak ojamarokni bere romjak liyarok, Jerusalemni phataro tong bainairok tei bórokni bororok khna kha Babilonni habugra Ahikamni bwsla Gedaliano hano naikolna bagwi tangphang chongjak kha tei Babilono romwi tlangjakyarok bebak chwla, bwrwi tei chwrairok tei aro-o tong rwknairokni bisingo bigra kukrokno bini thani yaphar kha,

⁸ Nethaniani bwsla Ismael, Kareani bwsla Johanan, Tanhumetni bwsla Seraia, Netophatsa Ephaini bwslasong, Makatsani bwsla Jesania tei bórokni sengkrak bodolrok bórok Mijpani Gedaliani thani tháng lai kha.

⁹ Saphanni busuk Ahikamni bwsla Gedalia bórokni thani tei bórok bororokni thani hai hwnwi swmai tangwi sa kha, “Norok kolodiasongno monnano ta kiri di, a ha-ono tong laiwi, Babilonni habugrano mon di, abo bai norokni kaham wng anw.

¹⁰ Ang khe Kolodiasong chini oro phai kha hwn khe norokni adong wngwi bórokni bwskango tongsokna bagwi Mijpa’-ono tong anw; phiya ba norok hwn khe angur bwtwi bai tangbla molni bwtháirokno, thokrokno thum di tei norokni manwi-o khatiui ton di tei norokni yapha-o nama kamiyungrogo tong di.”

¹¹ Abo hai khe Moabo, Ammonni bwsarokni bisingo tongnairok, Idomo tei kubunni haktorni bebago tongnai Judairok khna lai kha. Babilonni habugra Judani tong rwknairokni bagwi Saphanni busuk, Ahikamni bwsla Gedaliano aroni hastepha chong kha.

¹² Aphuru Judairok bebakno rwkhlai rohorjakma a hani kiphilwi phai kha. Juda hani Mijpa-o Gadaliani thani sók phai kha; tei kwbángma angur bwtwi bai tangbla molni bwtháirok thum lai kha.

Gedalia butharjakmani

¹³ Tabuk Kareani bwsla Johanan tei sengkrakrokni bebak ojamarok Mijpa-o Gedaliani thani phai lai kha,

¹⁴ tei bono hai hwnwi sa kha, “Ammonsa habugra Balis nono butharnani bagwi Nethaniani bwsla Ismaelno rohormani nwng saui da man?” Phiya ba Ahikamni bwsla Gedalia bórokno poito khlai glak.

¹⁵ Ulo Kareani bwsla Johanan Mijpa-o Gedaliano tepsa khe hai hwnwi sa kha, “Ang thángwi Nethaniani bwsla Ismaelno butharwi anw, abo khoroksa phano saui man glak. Tamni bagwi bo nono butharnani nai? Abo hai wng khe nini thani kuthum laijak bebak Judairok piring-poroi wng bainai tei Juda-o tong rwknairok komor bainai.”

¹⁶ Tamo khe Ahikamni bwsla Gedalia, Kareani bwsla Johananno hai hwnwi sa kha, “Nwng omo hairok ta khlai di, tamni hwn khe Ismaelno tẃiwi nwng kók samarok abo tatal.”