JIRIMIA 39 - Kok Borok (Re-edited) Bible (BSI)

Jerusalem mechenjakmani

¹ Jedekia Judani habugra chámani nokha bisi chukuni nokha talchi-o, Babilonni habugra Nebukadrejar bini bebak sengkrakrokno tubu-ui Jerusalemno kebengwi bacha kha tei gerebwi ton phai kha;

² Jedekia habugra chámani nokha bisichisani nokha talbrwini salchukuni salo a kamiyung swbai rwjak kha.

³ Jerusalem segwi najak khe, Babilonni habugrani bebak tangphang adongrok duglam kwcharo phaiwi achuk phai lai kha. Bórok wng kha Nergal-sarejer, Samgar-nebo, Rabsarisni Sarsekim, Rabmagni Nergal-sarejer tei Babilonni habugrani tong rwk bainai bebak tangphang adongrok.

⁴ Judani habugra Jedekia bai bini bebak sengkrakrok bórokno nuk khe, bórok horo habugrani bwthái bwlwng lamani deual kwnwi kwcharni duglam tẃi kamiyungni phataro ongkhorwi Araba bwkhak khárwi tháng lai kha.

⁵ Tamo khe Kolodiani sengkrakrok bórokno riphrigwi Jerikoni hapharo khe Jedekiano riphrigwi rom kha tei bono romwi Hamat hani Ribla-o Babilonni habugra Nebukadrejarni thani tubu kha. Hakhe bo bono majra rwna dagi kha.

⁶ Babilonni habugra Ribla-o Jedekiani bwsajlasongno bini mokol bwskango’-no tan kha; tei Babilonni habugra Judani bebak borok kotorrokno tanwi buthar bai kha.

⁷ Hakhe bo Jedekiani mokol ekhregwi khibi kha tei bono Babilono tlangna bagwi sorduk bai kha ka.

⁸ Kolodiasong habugrani noyung bai borok kosongrokni nokrokno hór phnangwi rw kha tei Jerusalemni chokdeualrokno bo swbaiwi rw kha.

⁹ Hakhe mwrwknai sengkrak okra Nebujaradan kamiyungo tong rwk bainai bororokno bono khibiui thángnai bororokno tei kubun tong rwk bainai bororokno Babilono khaui tlang bai kha.

¹⁰ Mwrwknai sengkrak okra Nebujaradan mungsa kwrwi bigra bororokno Juda-o yakarwi klang kha tei a salo’-no angur bari bai hapharbo bórokno rwui klang kha.

Jirimia phiyókjakmani

¹¹ Babilonni habugra Nebukadrejar Jirimiano tẃiwi bini mwrwknai bokhorok Nebujaradanno hai hwnwi dagi kha,

¹² “Nwng bono yachagwi kaham khlainai di tei bono mungsa phano hamya ta khlai di, phiya bo sama hai kheno nwng bono ton di.”

¹³ Hakhe mwrwknai sengkrak okra Nebujaradan, Rabsarisni Nebusasban, Rabmagni Nergal-sarejer tei Babilonni habugrani bebak tangphang okrarok,

¹⁴ borok rohorwi mwrwknaini nokhlani Jirimiano nahar phai kha. Bono nogo tlangna bagwi Saphanni busuk, Ahikamni sajla Gedaliano berwi rw kha. Hakhe bo bini bororok bai tong phai kha.

Ebed-melekni khatungmani

¹⁵ Jirimia mwrwknairokni nokhla-o chopjagwi tong phuru-o Subraiyung bono hai hwnwi sa kha:

¹⁶ Nwng Ithiopiasa Ebed-Melekno thángwi hai hwnwi saui di, Sengkrakrokni Subraiyung, Israilni Kaitor hai hwnwi sa-o, kahamni bagwi ya, hamyani bagwi se ang o kamiyungo ani kókrokno nang rwnai, a jora-o norokni mokol bwskango’-no abórok wng anw.

¹⁷ Phiya a salo ang norokno mwthang anw tei nwng kirima borokni yago nono yapharwi rw glak hwnwi Subraiyung sa-o.

¹⁸ Tamo khe ang nono sói’-no kati rwnai tei nwng choba-o klai glak; phiya choba-o sokat rwjakma hai khe nwng nini langmano mannai, tamni hwn khe nwng ano poito khlai kha hwnwi Subraiyung sa-o.